Read Bhaibhiri Idzva rechiShona Jeremiya 13 Bible Online

Jeremiya 13 - Bhaibhiri Idzva rechiShona bible

Jeremiya 13

¹Tenzi akandirayira kuti, “Enda utenge jira romutikisha uusungirire muchiuno mako, asi rega kuunyika mumvura.”

²Saizvozvo ndakatengawo jira romutikisha maereranowo neshoko raTenzi, ndikarisungira muchiuno mangu.

³Zvino shoko raTenzi rakauyazve kwandiri rwechipiri rikati,

⁴“Tora jira riya romutikisha rawakatenga rawakasungira muchiuno, mako usimuke uende kurwizi rwaYufuratesi urivige mumutswe wedombo ikoko.”

⁵Saizvozvo ini ndakaenda ndikandoriviga muna Yufuratesi sezvandakaudzwa naTenzi.

⁶Mushure memazuva akawanda, Tenzi akati kwandiri, “Chisumuka uende kurwizi rwaYufuratesi undotora ikoko jira romutikisha riya randakati urivige ikoko.”

⁷Ipapo ndakaenda kuna Yufuratesi ndikafukura ndikatora jira romutikisha riya paya pandakanga ndariviga onei jira riya ramvungunjika risisina basa.

⁸Izwi raTenzi ndoparakauya kwandiri richiti,

⁹“Zvanzi naTenzi saizvozvi ndokusakadzawo kwandichaita kuzvikudza kwaJudha nokuzvikudza kukuru kweJerusaremu.

¹⁰Vanhu vakaipa ivava ava, vanoramba kunzwa zvandinotaura vanoita zvavo musikanzwa vachiita zvomusoro wavo. Vava kushandira vamwe vamwari vachivanamata vachaita sejira irori iri risisina basa.

¹¹Chiripo ndechokuti sokunyatsobata kunoita jira iroro muchiuno chomunhu ndozvandakaita ini ndikaita kuti imba yose yokwaIsiraeri nemba yose yokwaJudha vanyatsoti kwati kwati neni kuitira kuti ndivewo navanhu uye kuti ndive nezita nomukurumbira nembiri. Asi vakaramba kuteerera, ndizvo zviri kutaura Tenzi.”

¹²Zvaunofanira kuvataurira ndezvizvi zvokuti, “Zvanzi naTenzi, Mwari weIsiraeri, ‘Chirongo chose chichazadzwa newaini.’ Ivo vachakuti, ‘Ko isu hatizvizivi here kuti chirongo chose chichazadzwa newaini?’

¹³Saka iwe uvataurire kuti, zvanzi naTenzi, ‘Chomochiziva ndechokuti ini ndichararadzisa vagari vose venyika ino, madzimambo anogara pachigaro choumambo chokwaDhavhidhi navapristi navaporofita navagari veJerusaremu vose.’

¹⁴Ndichavadhumanisa, madzibaba navana vavo vakomana pamwechete, ndizvo zviri kutaura Tenzi. Handisi kuzovanzwira tsitsi kana kuvarega kana kuvanzwira nyasha kuti ndirege kuvaparadza.”

¹⁵Teererai munzwe, regai kuzvikudza nokuti Tenzi ava kutaura.

¹⁶Ipai mbiri kuna Tenzi, Mwari wenyu asati aunza rima, musati matatarika pamakomo paita karimarima uye pamunotarisira kuwana chiedza, iye ndopaanotoita kuti rive zarima achiita kuti rive rima rakati kwirindindi.

¹⁷Asi kana mukarega kuteerera ndichakuchemai zvangu muchivande pamusana pokuzvikudza kwenyu ndichisvimha misodzi ichimokoteka zvinosiririsa nokuti vedanga raTenzi vatapwa.

¹⁸Udza mambo namambokadzi wake kuti, “Garai pachigaro chakazvidzika nokuti mukurumbira wechiremba chenyu wakutunuka mumusoro.

¹⁹Maguta okuNegevhu azarirwa; hapasisina wokuazarura. Judha yose zvayo yatapwa, yose zvayo yaendwa nawo kuutapwa.”

²⁰Simudzai musoro muone vanhu vari kubva nokuchamhembe. Varipi vedanga rawakanga wapiwa vedanga rako rinoyevedza.

²¹Muchazoti kudii pavanenge ivo vazviita vatungamiriri venyu vamakadzidzisa imi pachenyu kuti vave vashamwari venyu? Hazvizokurwadzai here samarwadzo omukadzi ari pakusununguka?

²²Kana ukazozviti nechomumwoyo zvauya sei kuti ndiwirwe nezvinhu izvozvi izvi? Chadariso, kukombodza kwouipi hwako saka wafukurwa marokwe wavawo kuitirwa zvoutsinye.

²³Ko munhu muEtiopia angasandure ganda rake here kana iyo ingwe mavara ayo? Kana zvakadaro iwewo ungatoitawo zvakanaka iyewe wajairira kuita zvakaipa.

²⁴Ndichakutii mwarara sehundi iri kupeperetswa nemhepo yokugwenga.

²⁵Ndochakowo ichochi, mugove wandakukamurirawo ndizvo zviri kutaura Tenzi nokuti wakandikanganwa ukavimba nezvinhu zvenhando.

²⁶Ini iyeni ndichakufukura marokwe ndikukwidibire uso nawo uonererwe.

²⁷Ndakaona zvinhu zvako zvandisingade, uye unzenza hwako nokuhwihwidzira somukono webhiza noufeve hwako hwakafumuka pazvikomo musango'mu. Zvichakuwana Jerusaremu! Kusvikira riniko wakangodai kun'ora.