Read Bhaibhiri Idzva rechiShona Jeremiya 15 Bible Online

Jeremiya 15 - Bhaibhiri Idzva rechiShona bible

Jeremiya 15

¹Tenzi akazoti kwandiri, “Kunyange dai Mosesi naSamueri vakamirira vanhu ava kwandiri handaimbodzora mwoyo wangu kwavari. Chivabvisa pameso pangu vaende!

²Kana vakazokubvunza kuti, ‘Kwotoenda kwacho ndokupi?’ iwe uvati zvanzi naTenzi: “Vedenda, vaende kudenda vebakatwa, kubakatwa, veshangwa yenzara, vaende kunzara vokuhutapwa, vaende kuhutapwa.

³“Ndichavasarudzira zvinhu zvina zvokuvaparadza nazvo, ndizvo zviri kutaura Tenzi, zvinoti bakatwa rokuvaurayisa nembwa dzokuvabvanzura uye shiri dzedenga nemhuka zvesango dzokuvazhanya nokuvaparadza.

⁴Ndichaita kuti zvionese ndondo nyika dzose dzapasi pano pamusana pezvakaparwa muJerusaremu naManase mwanakomana waHezekiya mambo wokwaJudha.

⁵“Ndianikowo achakunzwira tsitsi nhaiwe Jerusaremu, kana kuti ndianiwo achakuchema? Ndiani zvake achatsauka achikubvunzawo upenyu?

⁶“Wakandirambaka iwe[18] ndizvo zviri kutaura Tenzi. Unoramba uchingodzokera shure chete. Ndokusaka ndakazokubatira shamhu yokukuparadza nayo. Ndaneta nokukuitirai mwoyo murefu.

⁷“Ndakavawurutsa neforogo yokuwurutsisa mumaguta enyika iyoyi. Ndakaita kuti vaone nhamo yorufu ndikaparadza vanhu vangu, asi kusiyana nenzira dzavo havana.

⁸“Ndakaita kuti chirikadzi dzavo dziwande kudarika jecha rokumakungwa. Ndakaunzira vana amai vemajaya mharadzi zuva rakacheka nyika. Ndakaita kuti kurwadziwa nokutya zvingoyerekana zvavapinda.

⁹“Amai vavanomwe vatambura nokuchema, vakarezuka, rakavadokera masikati machena, akanyadziswa akafumurwa, vamwe vacho vose ndichavaurayisa nebakatwa rehondo mumaoko mavavengi vavo, ndizvo zviri kureva Tenzi.”

¹⁰Nhai amai we-e zvangu! Chamakandiberekera, ini zvangu munhu wenharo, ini matatapure munyika ino yose. Handina kukweretesa kana kukwereta munhu asi vose vanondirengerera rushambwa.

¹¹Tenzi akati, “Handina kukuramba here? Ndingarege here kukuunzira vavengi?[19]

¹²Munhu angagone here kutyora simbi, simbi yokuchamhembe nendarira?

¹³“Upfumi hwenyu nezvinhu zvenyu zvinokosha ndichazviita kuti zvipambwe mahara munyika yenyu yose pamusana pezvitadzo zvenyu.

¹⁴Ndichakuitai kuti mushandire vavengi venyu munyika yamusingazivi nokuti ndaviruka nehasha; moto ukabaka unoramba uchingobvira nokusingaperi.

¹⁵“Tenzi, imi ndimi munoziva ndirangarireiwo mundishanyire mungonditsividzirawo vanonditambudza. Pamusana pomwoyo wenyu murefu musandipfuudze munozviziva wani kuti kuzvidzwa kwandinako uku kuzvidzirwa imi.

¹⁶“Shoko renyu pandariwana ndarizeya mazwi enyu iwayo aindipa mufaro ariwo angu akanga ari mazwi apamwoyo andinofarira nokuti ndinodaidzwa nezita renyu imi Tenzi, Mwari wehondo nehondo.

¹⁷“Handina kumbogara muboka ravanhu vamafaro kana kumbopembera nokufara. Ndaingogara ndiri ndoga zvangu nokuti simba roruoko rwenyu raiva pandiri. Ndinodaro nokuti makandizadza nehasha.

¹⁸“Ko iko kurwadzwa kwangu kusingaperi kwakaita seiko, ronda rangu risingarapiki rakaita sei risingapori? Asi kwandiri, munoda kuita sakakova kanonyengedza, semvura inopwa?”

¹⁹Nokudaro zvanzi naTenzi, “Kana ukadzoka ndichakudzorera pabasa rako undishandire. Kana ukataura zvinhu kwazvo usingataure zvinhu zvisina maturo ndiwe uchava muromo wangu, vachadzokera kwauri asi iwewe haudzokere kwavari.

²⁰“Kuna vanhu ivava ava ndichaita kuti vave rusvingo rwendarira. Vachakurwisa asi havakukuriri nokuti ndinewe ndinokuponesa nokukununura, ndizvo zviri kutaura Tenzi.

²¹“Ndichakuponesa mumaoko mavakaipa ndichikununura kana wabatwa navanhu voutsinye.”