Read Bhaibhiri Idzva rechiShona Jeremiya 16 Bible Online

Jeremiya 16 - Bhaibhiri Idzva rechiShona bible

Jeremiya 16

¹Izwi raTenzi rakauya kwandiri richiti, “Haufanire kuroora mukadzi

²kana kuva zvako navanakomana kana vanasikana munzvimbo ino

³nokuti zvanzi naTenzi nezvavanasikana ivavo vanoberekerwa munzvimbo ino uye nezvamadzimai vakavabereka uye nezvemadzibaba akavabereka munyika muno zvinoti:

⁴vachafa nezvirwere zvakaipisisa. Havazochemwi kana kuvigwa, vachati pasi pwata pwata sendove pavhu, vapera nebakatwa neshangwa yenzara. Zvitunha zvavo zvichava ndizvo chokudya cheshiri dzedenga nemhuka dzesango.

⁵“Chiripo ndechokuti zvanzi naTenzi, usapinde kana kuenda kuimba iine rufu kundoungudza kana kuvachema nokuti rugare rwangu ndarubvisa mukati mavanhu ava uye ndabvisa mavari mwoyochena wangu nomutsa wangu.

⁶Vose zvavo vakuru navaduku vachafa munyika muno, havachazovigwa, hapana achavachema kana kuzvicheka-chekera vafi vacho kunyange kuzviveurira ivavo muparavara.

⁷Hakuna achazodya nomumwe achimunyaradza kana afirwa, kana kuwanawo chaanonwa nomumwe anenge afirwa nababa kana naamai vake achimunyaradza.

⁸“Iwe usapinde mumba yemabiko kundogara uchidya nokunwa navo

⁹nokuti zvanzi naTenzi wehondo nehondo, Mwari weIsiraeri: chiona, ndichagumisa munzvimbo ino imi muchizviona nameso enyu, mumazuva enyu, chikwe-e chokuseka ichi kana mheremhere yokufara nokupemberera mwenga kana kufarira murume wacho.

¹⁰“Pauchataurira vanhu ivava zvinhu zvose izvozvi, ivo vachakuti, ‘Ko Tenzi atemereiko kuti tiwirwe nepfumvu huru yakadai? Takapareiko? Chitadzo chatakapara kuna Tenzi Mwari wedu ndechei?’

¹¹Iwe unofanira kuvataurira kuti, ‘Chikonzero ndechichi chokuti madzibaba enyu akandifuratira, ndizvo zviri kutaura Tenzi uye vakatevera vamwe vamwari vakavashandira nokuvanamata. Uye vakandifuratira vakarega kuchengeta mutemo wangu

¹²uye nokuti imi makaita zvakaipa zvinodarika zvakaitwa namadzibaba enyu nokuti mumwe nomumwe wenyu ava kungotevedza zvake musikanzwa womusoro wake muchiramba kunditeerera.

¹³Naizvozvo iniwo ndichakukandai kunze kwenyika ino ndichikurasirai kunyika yamusingamboziva imimi kana madzibaba enyu. Ikoko muchashandira vamwe vamwari siku nesikati nokuti handisi kuzokunzwirai tsitsi.’

¹⁴“Naizvozvo chinzwai munzwe, zvanzi naTenzi, mazuva ari kuuya achapera zvokuti, ‘NaTenzi chaiye mupenyu, akaburitsa vanhu veIsiraeri munyika yeIjipiti’

¹⁵asi kutoti, ‘NaTenzi chaiye mupenyu akaburitsa vanhu veIsiraeri kunyika yokuchamhembe, kubva kunyika dzose kwaakanga avadzingira nokuti ndichavadzorera kunyika yavo yandakapa kumadzitateguru avo.’

¹⁶“Chinzwai, zvanzi naTenzi ndichatuma varauri vazhinji vavabate. Mushure macho ndichatuma vavhimi vazhinji vakuvhimei mumakomo mose nomuzvikomo zvose nomumapako

¹⁷nokuti kuita kwavo kwose ndinokuona mumaziso mangu, hapana chakavanzika kwandiri. Kunyange kuipa kwavo hauna kuvandika mumaziso mangu.

¹⁸Zvino ndava kutanga kuvarangira kakapetwa uipi hwavo nechitadzo chavo nokuti vakan'oresa nyika yangu nezvitunha zvezvifananidzo zvavo zvokunamata zvinosemesa vachizadza nhaka yangu nezvinhu zvavo zvandisingadi.”

¹⁹Imi Tenzi imi simba rangu nenhare yangu yokuhwanda hondo diziro rangu pazuva renhamo, kwamuri ndokuchauya marudzi avanhu achibva kwakaperera nyika achiti, “Madzibaba edu akawana nhaka yezvinhu pasina, zvinhu zvamanyepo zvinhu zvisina maturo, zvisina chimuko.

²⁰Ko munhu angazvigadzirire vamwari here? Zvinhu zvakadaro hazvisi vamwari.

²¹“Naizvozvo, chinzwa, ndichaita kuti vazive, rwendo runo ndichaita kuti vazive simba rangu noukuru hwangu ndipo pavachazoziva kuti ini ndini ndinonzi Mwari.