Read Bhaibhiri Idzva rechiShona Jeremiya 17 Bible Online

Jeremiya 17 - Bhaibhiri Idzva rechiShona bible

Jeremiya 17

¹“Chitadzo chevokwaJudha chakanyorwa nepenzura yesimbi ine muromo wedhaimondi, chakaita zvokutemerwa pafendefa remwoyo wavo uye napazvinenge nyanga zvapakona dzeatari dzavo.

²Izvozvo vana vavo pfungwa dzinenge dziri kuatari dzavo nokuzvifananidzo zvavo zvokunamata zvinomiririra Ashera pasi pomuti wose wose wakasvibira nomuzvikomo zvirefu

³nomumakomo musango umu. Upfumi hwenyu nezvose zvamunazvo zvakakosha ndichaita kuti zvipambwe somubayiro wezvitadzo zviri munyika yenyu yose zvayo.

⁴Imi nhaka yandakakupai muchairegedza ndichikuitai kuti mushandire vavengi venyu munyika yamusingazivi nokuti ndaviruka nehasha, moto ukabaka unoramba uchingobvira.”

⁵Zvanzi naTenzi, “Ane rushambwa munhu anovimba nomunhu, anoti munhu, ndiye simba rake ane mwoyo wokufuratira Mwari.

⁶“Akafanana negwenzi riri mugwenga hapana chakanaka chaanowana. Achagara munzvimbo dzakaoma dzomugwenga, munyika yebare isingagare munhu.

⁷“Akakomborerwa munhu anovimba naTenzi, munhu ane chivimbo naTenzi

⁸akaita somuti wakasimwa pamvura unoendesa midzi yawo mukakova hauzozeza kupisa kana kuchiuya nokuti mashizha awo anoramba akasvibira uye hauzotyira gore rokushaikwa kwemvura nokuti haumborega kubereka muchero.

⁹“Mwoyo unonyengedza kupfuura zvinhu zvose zvazvo uye wakaora nouipi ndiani angaunzwisise husingarapiki.

¹⁰Ini Tenzi ndinoongorora mwoyo ndichipenengura pfungwa dzomunhu kuti ndipe munhu wose maererano nomugariro wake, uye maererano nezviito zvake.”

¹¹Sezvinoita hware kuunganidza nhiyo dzaisina kuchechenya, ndozvinoita munhu anowana upfumi zvisina mvumo. Huchamukurumuka pamazuva oupenyu hwake achagumisira ava benzi romunhu.

¹²Nzvimbo yedu Inoera, chigaro choumambo chomukurumbira chakaiswa pakakwirira kubvira pakutanga chaipo.

¹³Imi Tenzi, chitarisiro cheIsiraeri, vose vanokufuratirai imi vachanyadziswa. Vanenge vachiipa gotsi vachanyorwa pavhu nokuti vakafuratira Tenzi tsime remvura mhenyu.

¹⁴Ndirapeiwo Tenzi kuti ndipore ndinunureiwo ndipone nokuti ndimi wandinorumbidza.

¹⁵Hezvika vava kunditi, “Ko zvinorehwa naTenzi zvacho zviripiko? Ngazviuyeka!”

¹⁶Handina kukumanikidzirai kutumira zvakaipa kana kusuwira zuva renhamo, imi munozviziva. Hapana chakabuda pamuromo pangu chamusingazivi.

¹⁷Regai kundityisa imi ndimi diziro rangu pazuva renhamo.

¹⁸Nyadzisai vanonditambudza asi ini murege kundinyadzisa ngavavhiringike nazvo asi ini ndirege kuvhiringika. Vaunzirei zuva renhamo munyatsovaparadza zvokuparadza zviya.

¹⁹Tenzi akanditi, “Enda undomira paSuo Guru raVanhu panopindwa nokubudiwa napo namadzimambo okwaJudha uye nepamisuo yose mikuru yeJerusaremu,

²⁰uti, ‘Imi madzimambo okwaJudha nemi mose vokwaJudha navagari vose veJerusaremu vanopinda napamisuo mikuru iyoyi, inzwai shoko raTenzi.’

²¹Zvanzi naTenzi, zvichenjererei upenyu hwenyu murege kutakura mutoro musi weSabata kana kupinda nawo napamisuo mikuru yeJerusaremu.

²²Regaiwo kutakura mutoro muchibuda nawo mudzimba dzenyu nomusi weSabata kana kuita basa ripi neripi zvaro. Asi eresai zuva reSabata sokuudza kwandakaita madzibaba enyu.

²³Asi havana kuteerera kana kurerekera nzeve yavo asi kuti vakatoomesa musoro kuti varege kunzwa kana kudzidzisika.

²⁴“Tenzi ari kuti asi kana imi mukanditeerera mukaregawo kupinda nomutoro nomumisuo mikuru yeguta rino pazuva reSabata muchieresa zuva reSabata musingaite basa pazuva iroro,

²⁵pakadarowo madzimambo namadzishe anogara pachigaro choumambo hwokwaDhavhidhi vachapinda napamisuo mikuru yeguta rino vari mungoro dzehondo dzamabhiza ivo namachinda avo vanhu vokwaJudha navagari veJerusaremu uye guta rino richagarwa narini narini.

²⁶Vanhu vachakurumuka vachibva kumaguta okwaJudha nenzvimbo dzomunharaunda meguta reJerusaremu vachibvawo kunyika yokwaBhenjamini nokunyika yoKumanhika nokunyika yamakomo nokuNegevhu vachiuya nemipiro yokupisa nezvibayiro nemipiro youpfu hwembesanwa norusenzi vachiuyawo nemipiro yokutenda kumba yaTenzi.

²⁷Asi kana mukarega kunditeerera kuti muerese zuva reSabata muchirega kutakura mutoro nokupinda nayo napamisuo mikuru yeJerusaremu pamusi weSabata, nezvo ini ndichabatidza moto mumisuo mikuru yaro ucharoromesa mizinda yeJerusaremu usingadzimiki.”