Read Bhaibhiri Idzva rechiShona Jeremiya 18 Bible Online

Jeremiya 18 - Bhaibhiri Idzva rechiShona bible

Jeremiya 18

¹Izwi rakauya kuna Jeremiya richibva kuna Tenzi rikati,

²“Chisumuka udzike kumba yomuumbi wehari, ikoko ndichaita kuti unzwe shoko rangu.”

³Saizvozvowo ndakadzika kumba kwomuumbi wehari onei achiumbira zvinhu pane chokuumbira chinotenderera.

⁴Zvino mudziyo waakanga achiumba nevhu iroro wakakanganisika uri mumaoko make kudaro akabva aumbazve mumwe mudziyo naro sokuda kwake.

⁵Izwi raTenzi ndokubva rauya kwandiri richiti,

⁶“Nhai imi vemba yeIsiraeri ndinotadza here kuita nemi zvaitwa nomuumbi uyu? Ndizvo zviri kutaura Tenzi. Chinzwai, sezvakangoita munyakwe uri mumaoko omuumbi ndozvamakangoita imi mumaoko mangu, imi vemba yaIsiraeri.

⁷Nguva yose yandinenge ndataura chinhu ndakananga rudzi rwavanhu, kana nyika kuti ndichaidzipura kana kuipaza kana kuiparadza

⁸uye kana rudzi rwavanhu ivavo rune zvandinenge ndataura zvacho rukapinduka pakuipa kwarwo neniwo ndinobva ndaregawo kuita zvakaipa zvandinenge ndambofunga kuti ndiite kwarwuri.

⁹Uyewo nguva yose zvayo yandinenge ndatemera rumwe rudzi rwavanhu kana imwe nyika kuti ndichaivaka ndigoisima,

¹⁰kana rudzi rwacho irworwo rukaita zvakaipa ruchirega kuteerera izwi rangu, ini ndinobva ndasandukawo ndorega kuruitira zvakanaka zvandakanga ndaronga kuruitira.

¹¹Saka zvino wochitaurira vanhu vokwaJudha navagari veJerusaremu kuti, ‘Zvanzi naTenzi, ndiri kukurongerai nhamo, ndiri kukurukirai mazano okukutsvatai. Pindukai, munhu wose akande pasi nzira dzake dzakaipa mugadziridze mafambiro enyu namaitiro enyu.’

¹²“Asi ivo vanoti, ‘Hazvina maturo izvi. Tinotevera zvirongwa zvedu mumwe nomumwe achitevera zvake zvomusoro wake zvakaipa.’ ”

¹³Naizvozvo, zvanzi naTenzi: “Imbobvunzaiwo pakati pevechirudzi kuti ndiani akambonzwawo zvakadai sezvizvi? Mhandara iyi, Isiraeri yakaita zvinhu zvakaipisisa kwazvo.

¹⁴“Chando cheRebhanoni chinombopera here pazvikangararwe zveGomo reSirioni?[20] Mvura yomugomo inombopwa here kuerera, tukova tune mvura inotonhorera?

¹⁵“Asi vanhu vangu vandikanganwa. Vanopisira rusenzi kuna vamwari vasirivo vanogumburwa munzira dzawo, nzira dzakare vakapinda mutwunzirawo zvatwo kwete mumigwagwa mikuru

¹⁶vachiita kuti nyika yavo ive chiseko chaicho chinhu chinoridzirwa zvacho tsamwa narini wose. “Munhu wose anopfuura nemairi anokatyamadzwa nazvo achidzungudza musoro wake.

¹⁷“Sezvinoita mhepo yokumabvazuva, ndichavamwayanisa kuvavengi. Ndichavapa gotsi ndisingambovatarisa pazuva ravo renhamo.”

¹⁸Vanhu ndopavakati, “Uyai tironge mazano okutsvata nawo Jeremiya nokuti kuvapristi mutemo hauzofa wakarova kunyange zano kuna vangwaru harimboperi, kana irowo shoko rinobva kumuporofita. Uyai timutape mukanwa, tirege kumboteerera zvedu zvaanotaura.

¹⁹“Imi Tenzi, Teererai munzwe chichemo changu.

²⁰Ko zvakaipa zvingave ndizvo here zvokutsiva nazvo zvakanaka? Asi vakandicherera hunza kuti vandiurayire imomo. Rangarirai kumira kwendakaita pamberi penyu ndichivareverera kuti mudzore hasha dzenyu kwavari.

²¹Naizvozvo pinzai vana vavo mushangwa yenzara vaparadzwe namapakatwa, vadzimai vavo vasare vasisina vana, dzangove chirikadzi varume ngavafe nedenda, majaya avo aurayiwe nebakatwa muhondo.

²²Mudzimba dzavo ngamuve nokuchema, pamunoerekana mavaunzira muurayi, nokuti vakandicherera hunza kuti ndiwiremo, vakateyera tsoka dzangu misungo.

²³Asi imi Tenzi munoziva bangano ravo rokuda kundiuraya. Musavaregerere uipi hwavo kana kubvisa chitadzo chavo pameso penyu. Vadzadzarisei pamberi penyu makashatirwa.”