Read Bhaibhiri Idzva rechiShona Jeremiya 2 Bible Online

Jeremiya 2 - Bhaibhiri Idzva rechiShona bible

Jeremiya 2

¹Shoko raTenzi rakauya kwandiri richiti,

²“Enda undoparidza, Jerusaremu ichizvinzwa, kuti zvanzi naTenzi: “Ndinorangarira mwoyo wokuda zvokunamata wawaiva nawo pauduku hwako norudo rwawaiva narwo semwenga nokunditevera kwawaindiita murenje, munyika isina chinorimwamo.

³“Isiraeri yakanga ichiera kuna Tenzi iri michero yake chaiyo yokutanga kukohwa, vose zvavo vakaidya vakapara mhosva vakapinda nhamo ndizvo zviri kutaura Tenzi.”

⁴Inzwai shoko raTenzi imi vemba yokwaJakobho, imi mose vemadzinza emba yaIsiraeri.

⁵Zvanzi naTenzi: “Ndechipiko chakaipa chakaonekwa namadzibaba enyu mandiri zvavakabva vatoenda kure neni kudai votevera zvinhu zvisina maturo vachibva vavawo vanhu vasina maturo?

⁶“Havana kumbobvunzawo kuti, iye Tenzi aripiko akatiburitsa munyika yeIjipiti, akatitungamirira murenje, munyika yamagwenga namakoronga, munyika yakaoma, nyika yezarima, munyika isina anopfuura nomo, kusina anogarako?

⁷“Ndakakuunzai munyika ine ivhu rakanaka kuti mudye henyu michero yayo nezvakanaka zvayo. Asi imi pamakapinda mairi makan'oresa nyika yangu mukaita kuti nhaka yangu ive chinhu chinosemesa.

⁸“Vapristi havana kubvunza kuti, ‘Tenzi ari kupi?’ Vanoona nezvomutemo havana kundiziva. Vafudzi vavanhu vakandipandukira, vaporofita vakaporofita nomweya waBhaari vachitevedza zvinhu zvisina chimuko.

⁹“Zvanzi naTenzi, naizvozvo ndichakugadzai dare, ndichagadzawo vana vavana venyu

¹⁰nokuti yambukirai kumahombekombe eSaipurasi muone, kana kutumira nhume kuKedhari dzindonyatsoongorora kwazvo muone kana kwakamboitika chinhu chakadai.

¹¹Kuno rudzi here rwakambochinjanisa vaMwari varwo, kunyange zvazvo ivo vasiri vamwari? Asi vanhu vangu vakatsinhanisa Mbiri yavo vachiitsiva nezvinhu zvisingabatsiri.

¹²“Matenga ngaakatyamarewo nezvakadai izvi akangaidzwe, apazaniswe musoro, ndizvo zviri kutaura Tenzi;

¹³nokuti vanhu vangu vakanditadzira nezvizvi zviviri zvokuti vakandifuratira ini tsime remvura mhenyu vakatozvicherera mazigaringiro emvura mazigaringiro akabamuka asingagone kuchengeta mvura.

¹⁴“Nyika yeIsiraeri nyika yevaranda here? Vakaberekerwa muuranda here? Sei vava nyama yamagora.

¹⁵Shumba dzakamudzovera dzichiita ruzha chairwo kudzvova. Nyika yeIsiraeri vaiita kuti ingova nyika isina zvayo chinhu, maguta ayo ava matongo asisina anogaramo.

¹⁶“Uyewo vanhu vokuguta reMemufisi nereTapanesi vakatsemura Isiraeri musoro.

¹⁷Hazvisi zvokuzviparira here izvi nokufuratira kwawakaita Tenzi, Mwari wako iye achingunokutungamirirai mugwara?

¹⁸“Ko zvino chii chamunowana nokuenda kuIjipiti, kundonwa mvura yomuna Nairi [3] nhai? Uye chii chamunowana nokuenda kuAsiria, kundonwa mvura yomuna Yufuratesi here?

¹⁹Uipi hwako huchakupfukira; umhandupandu hwako ndohuchakugadzira. Chaunofanira kuziva nokuona ndechokuti chinhu chakaipa chinorwadza, kufuratira Tenzi, Mwari wako zvokunditya mauri hamuna ndizvo zviri kutaura Tenzi Mwari wehondo nehondo.”

²⁰“Ndinodaro nokuti kare kare wakatyora iwe Joko rako ukadambura zvitorobho zvako uchiti, ‘Handichakushandirai.’ Heeka, pachikomo chose chose zvacho napasi pomuti wose zvawo wakasvibira wakapfugamidzapo sepfambi.

²¹“Asi ini ndakanga ndakusima somugirepisi wakanakisisa chaizvo, chaiwo une mhodzi dzakasvika. Zvauya sei kuti ubva wasanduka kudai, kubva wava somugirepisi womudondo zvawo?

²²“Kunyange zvako ukazvishambidza nesoda nesipo ine simba chaizvo uchiipupumisa kwazvo kutindivara kwemhosva yako ndinenge ndichingokuona chete ndizvo zviri kutaura Tenzi Mwari.

²³“Ko ungagoti sei, handina kun'ora ini, handina kutevera vanaBhaari? Tarisa uone gwara rako mumupata, uzive twawakaita. Uri tsiru renghamera rabindura risina kugadzikana rinodimuranisa nyika.

²⁴Uri dhongi zvaro romusango rajairira zvomurenje rinongofemhedza mhepo nokubindura kwaro! Ndiani angaridzore pahavi dzaro? Hapana mikono inenge ichiritsvaga inofanira kuzvinetsa zvayo, mumwedzi waro wokubindura inotoriwana chete.

²⁵Ngwarirai kuti muchasvuuka tsoka mugooma pahuro nenyota. Asi wakati iwe, ‘Hazvina basa nokuti ndinodanana navamwari vechirudzi saka changu ini kwangova kundenderedzana navo ikoko.’ ”

²⁶“Sokunyara kunoita mbavha kana yabatwa, ndokunyara kuchaita vemba yaIsiraeri, ivo, namadzimambo avo namachinda avo, navapristi vavo navaporofita vavo.

²⁷Vanhu vanototi kumuti ‘Ndimi baba vangu,’ vachiti kudombo, ‘Ndimi makandibereka, nokuti vakandipa gotsi'va vakandivanza uso.’ Asi kana pava panhamo zvino ndopovoti, ‘Simukai mutinunureiwo.’

²⁸“Ko vamwari vako vawakazvigadzirira varipi? Ngavasimukeka ivo kana vachikwanisa kukununura zvaunenge wapindwa nenhamo kudaro nokuti iwe Judha kuwanda kwakaita maguta ako, ndokuwanda kwakaitawo vaMwari vako.

²⁹“Chamunondipira mhosva chii ipapa? Makandipandukiraka imi mose zvenyu, ndizvo zviri kutaura Tenzi anoti:

³⁰Kubangorangawo zvangu vana vako neshamhu, havana kana kumbodzoreka zvavo. Mapakatwa ako iyewe ndiwo aparadza vaporofita vangu seshumba inorura.

³¹Imi vechizvarwa chino ichi, chinzwai munzwe zviri kutaurwa naTenzi. Iyeni ndabva ndaita segwenga here kuvaIsiraeri? Kana kuti senyika yezarima zvayo? Ko vanhu vangu zvovotozuwa zvavo vachiti: ‘Tochiita pamadiro zvino, kwamuri hatichambokutsikazve?’

³²Mhandara ingakanganwe zvishongo zvayo here, kana kuti mwenga[4] kukanganwa hanzu yake yomuchato here? Asi vanhu vangu vakandikanganwa kwamazuva asingaverengeki.

³³Inga unoziva kwazvo kurondorodza zvikomba zvako! Kunyange vakadzi vakaipa wakatovadzidzisa maitiro ako.

³⁴Kunyange pambatya dzako pakatsvuka ropa ravarombo vasina mhosva. Hauna kuvawanikidza vachipaza. Kunyange zvose izvozvi zvakadai

³⁵iwe ndopaunoti, handina mhosva, zvokundishatirirwa haachambondishatirirwa. Chinzwa, ndichakupa chirango chokukurangira muromo wako iwoyo wokuti, ‘Handina kutadzira Mwari.’

³⁶Unongoti pano batu, pano batu zvisina netsarukano yese. Uchanyadziswa neIjipiti sokunyadziswa kwawakaitwa neAsiria.

³⁷Naikokozve uchadzoka wakabata gotsi nokuti Tenzi akaramba vaunovimba navo vacho. Chaunowanawo iwe uchibatsirwa navanhu ivavo hapana.”