Read Bhaibhiri Idzva rechiShona Jeremiya 20 Bible Online

Jeremiya 20 - Bhaibhiri Idzva rechiShona bible

Jeremiya 20

¹Izvozvo mupristi Pashuri mwanakomana waImeru akanga ariye mukuru mukuru aiona yezvepamba paTenzi akanzwawo Jeremiya achiporofita zvinhu izvi.

²Ipapo Pashuri akarova muporofita Jeremiya akamuisa muchitokisi chaiva paSuo Guru rokwaBhenjamini rokumusoro kwemba yaTenzi.

³Ramangwana racho, Pashuri paakasunungura Jeremiya muchitokisi, Jeremiya akati kwaari, “Tenzi haana kukupa zita rokuti Pashuri[21] asi rokuti, ‘Nyakukombwanezvinotyisa.’

⁴Nokuti Tenzi ari kuti; ‘Chiona ndichakupinza mune zvinotyisa iwe neshamwari dzako dzose. Vacharakatiswa nebakatwa revavengi vavo iwe makatarisa nameso ako. Uye ndichaisa Judha yose mumaoko mamambo weBhabhironi, achavatapa oenda navo kuBhabhironi achivauraya nebakatwa.

⁵Uyewo ndichapa upfumi hwose hweguta rino nezvose zvarinowana nezvinokosha zvaro zvose nezvinhu zvose zvazvo zvinokosha zvamadzimambo okwaJudha mumaoko mavavengi vavo, vachavapamba vachivabata vachiendwa navo kuBhabhironi.

⁶Zvino iwe Pashuri, navose vagere mumba mako muchaendwa nemi kuutapwa. KuBhabhironi munotokuenda, ikoko ndokwamuchandofira, ikoko ndokwamuchavigwa, iwe neshamwari dzako dzose dzawaitaurira chiporofita chenhema.’ ”

⁷Imi Tenzi makandinyengedza, ini ndikabvuma kunyengedzwa. Imi makasimba kupinda ini uye imi makandikurira. Ndava chiseko chenyika zuva rose. Munhu wose anondisvoveredza.

⁸Nokuti pandinoti nditaure, ndinoshevedzera ndichidaidzira ndichiti, “Hecho chisimba noumharadzi!” Nokuti shoko raTenzi rave kwandiri chinhu chinondishoresa nokundisekesa zuva rose.

⁹Ndikati nditi, “Handichambofunga nezvake kana kutaurazve nezita rake,” mumwoyo mangu munoita somune moto unopisa wakapfigirwa mumapfupa angu, zvandikunda ini, handichazvigona.

¹⁰Nokuti ndiri kunzwa vazhinji vachiita kazevezeve, mativi ose zvangove zvinotyisa. “Mumhan'arirei! Ngatimumhan'arirei,” ndizvo zviri kutaura shamwari dzangu chaidzo dzose dzakangotarisira kuti pangu pandiperere, vachiti zvimwe angafuririke tikamukurira tobva tamutsividza.

¹¹Asi Tenzi aneni somurwi wehondo anotyisa. Naizvozvo vanondionesa ndondo vachagumburwa uye havambondikunda. Vachanyadziswa zvikuru nokuti havasi kuzombobudirira. Kunyadziswa kwavo kusingaperi hakusi kuzombofa kwakakanganikwa.

¹²Imi Tenzi wehondo nehondo munoedza wani vakarurama, imi munoona mumwoyo nomupfungwa dzomunhu, itai henyu kuti ndione imi muchivatsividza nokuti ndazviturira mumaoko menyu.

¹³Imbirai Tenzi rumbidzai Tenzi nokuti akanunura upenyu hwavasina chavanacho mumaoko mevaiti vezvakaipa.

¹⁴Ngarive norushambwa zuva randakaberekwa musi wandakaponwa namai vangu, ngaurege kuva musi wakakombererwa.[22]

¹⁵Ngaapinde rushambwa munhu akaunza kuna baba vangu shoko rokuti, “Maberekerwa mwana mukomana,” achivaita kuti vafare zvikuru kwazvo.

¹⁶Munhu iyeyo ngaaitwe samaguta akaparadzwa naTenzi asingaanzwirwi tsitsi. Ngaanzwe mhere yokuchema mangwanani nemhere yokuyambira, masikati

¹⁷nokuti akarega kundiuraya ndichiri munhumbu maamai zvokuti amai vangu ndivo vangadai vakava guva rangu, nhumbu yavo yakaramba zvayo yakakura.

¹⁸Chaizvoizvo ini ndakabudirei munhumbu ini, kuzoona nhamo ndichisuruvara kudai nokupedzera mazuva angu mukunyadziswa?