Read Bhaibhiri Idzva rechiShona Jeremiya 21 Bible Online

Jeremiya 21 - Bhaibhiri Idzva rechiShona bible

Jeremiya 21

¹Herinoi shoko rakauya kuna Jeremiya richibva kuna Tenzi, mambo Zedhekiya paakatuma kwaari Pashuri mwanakomana wokwaMarikiya nomupristi Zefaniya mwanakomana wokwaMaaseya neshoko rokuti,

²“Tibvunzireiwo kuna Tenzi tinzwe kuti anoti kudii nokuti Nebhukadhireza mambo weBhabhironi ari kurwa hondo nesu. Zvimwe Tenzi angadaro akatiitira zvinoshamisa zvose zvaanosiita akaita kuti asiyane nesu aende.”

³Jeremiya akabva ati kwavari,

⁴“Endai mundotaurira Zedhekiya kuti, zvanzi naTenzi, Mwari weIsiraeri, ndichaita kuti zvombo zvehondo zvamakapakata mumaoko menyu zvamuri kurwisa nazvo mambo weBhabhironi muchirwisa vanhu vechiKaradhia vakakukombai nechokunze kwetsvingo zvikupindukirei. Ndichazviunganidza pamwechete mukati meguta rino.

⁵Ini ndichakurwisai noukuru hwangu nesimba guru roruoko rwangu ndakaviruka nehasha ndakashatirwa zvikuru kwazvo.

⁶Izvozvo ndicharova vagari veguta rino, vanhu pamwechete nemhuka zvichafa nedenda guru.

⁷Zvanzi naTenzi, mushure mezvo ndichaisa Zedhekiya mambo wokwaJudha namakurukota ake navanhu vomuguta rino vachapunyuka kudenda nokubakatwa nokushangwa yenzara mumaoko maNebhukadhireza mambo weBhabhironi, uye mumaoko mavavengi vavo, nomumaoko mavanhu vanotsvaga kupfuudza upenyu hwavo. Achavarakasha nebakatwa asinganzwire tsitsi kana kuvasiya vari vapenyu kana kuvaitira tsiye nyoro.”

⁸Kuvanhu ivava ava enda undoti, “Zvanzi naTenzi, chinzwai, ndaisa pamberi penyu, uku nzira yokuupenyu uku nzira yokurufu.

⁹Anenge agara muguta rino achafa nebakatwa neshangwa yenzara nedenda. Asi anenge abuda kundozviisa mumaoko avaKaridhea vakakukombai achararama uye upenyu hwake ndohwaachawana somubayiro wehondo

¹⁰nokuti zvino ndanyatsotarisana chaizvo neguta rino kuti ndiripinze nhamo kwete kuriitira zvakanaka. Ndizvo zviri kutaura Tenzi, richaiswa mumaoko amambo weBhabhironi acharipisa nomoto.”

¹¹Kune vemba yamambo wokwaJudha, “Inzwai shoko raTenzi

¹²imi vemba yokwaDhavhidhi! Zvanzi naTenzi: “Tongai zvine ruenzaniso achiri mangwanani, mununure waro mumaoko omunhu anoonesa vamwe ndondo; munhu anenge apambwa ndingadaro ndikaviruka nehasha somoto unopisa usina angaudzimure pamusana pezviito zvenyu zvakaipa.

¹³“Zvanzi naTenzi, chinzwa, izvozvi handichawirirana newe iwe mugari womubani, iwe dombo romubani. Imi munozviti, ‘Ndiani chaizvo angadzike kuzotidenha, ndiani chaizvo angapinde mudzimba dzedu isu?’

¹⁴“Ndichakuranga zvakakodzerana nezvinobva mukuita kwako, ndizvo zviri kutaura Tenzi. Ndichabatidza moto mumasango mako[23] ucharoromesa zvose zviri munharaunda yako.”