Read Bhaibhiri Idzva rechiShona Jeremiya 22 Bible Online

Jeremiya 22 - Bhaibhiri Idzva rechiShona bible

Jeremiya 22

¹Zvanzi naTenzi, “Dzika kumba yamambo wokwaJudha undotaurako shoko iri

²rokuti: ‘Iwe mambo wokwaJudha ugere pachigaro choumambo chokwaDhavhidhi, iwe namakurukota ako navanhu vako vanopinda napamisuo mikuru iyi, zvanzi naTenzi.

³Zvanzi naTenzi itai zvinhu zvine ruenzaniso, zvakarurama muchinunura munhu anenge apambwa mumaoko maanenge achimuonesa nhamo achimudzvanyirira. Uye musakanganisire kana kuitira utsinye mutorwa kana nherera kana chirikadzi kana kudeura ropa risina mhosva munzvimbo ino.’

⁴Ndinodaro nokuti mukanyatsoteerera chaizvo shoko irori, pamisuo mikuru yemba ino iyi pachazopinda madzimambo achazogara pachigaro choumambo hwokwaDhavhidhi vari mungoro dzehondo napamabhiza, ivo namakurukota avo navanhu vavo.

⁵Asi kana mukarega kuteerera mazwi aya, zvanzi naTenzi, ndinopika neni pachangu kuti imba ino ichava dongo,

⁶nokuti zviri kutaura Tenzi zvinonangana nemba yamambo wokwaJudha ndezvizvi zvokuti: “Kwandiri ini, iwe unoyevedza senyika yokwaGireadhi kudai uye somutunhu chaiwo wakakwirira weRebhanoni asi ndichanyatsokuita gwenga zvaro, guta risina ageremo.

⁷Ndichavarongera mharadzi dzokuvapadza imwe neimwe nezvombo zvayo zvehondo. Dzichatemera pasi iyo misidhari yako yakaisvonaka vagoikanda mumoto.

⁸“Marudzi avanhu akawanda achadarika napaguta irori, munhu wose achitaurirana nomumwe wake achiti, ‘Tenzi akadarirei chaizvo kubva aita chinhu chakadai kuguta iri rakakura sezvizvi?’

⁹Ipapo vachapana mhinduro yokuti, ‘Chikonzero chacho ndechokuti vakafuratira chitenderano chaTenzi, Mwari wavo vakanamata vamwe vamwari vachivashandira.’ ”

¹⁰Anenge afa musamucheme kana kuchema nhamo yake asi kuti motohwihwidza kuchema zvinosiririsa uyo anoenda nokuti haachadzokizve kuzoona nyika yaakaberekerwa

¹¹nokuti zvanzi naTenzi nezvaSharumu naSharumu mwanakomana waJosiya mambo wokwaJudha uya akazotonga panzvimbo yababa wake Josiya, Sharumu uya akazoenda achibva kunzvimbo kuno, “Haasi kuzombodzokazve kuno.

¹²Asi kuti kwaanenge aendwa naye senhapwa, ndokwaachafira ikoko uye nyika ino haazombofa akaionazve.”

¹³Ane nhamo munhu anovaka imba yake nokusarurama, dzimba dzake dzemunhurikidzwa achidzivaka nezvinhu zvisiri pamutemo achiita kuti mumwe amushandire pasina, asina kana chaanomutambirisa

¹⁴achizviti, “Regai ndizvivakire zimba gurusa, rine munhurikidzwa ine dzimba dzakafara kwazvo.” Izvozvo anoichekera muhwindo achiiti kumadziro uku tsveete kuroverera musidhari nokuipenda nependi tsvuku.

¹⁵Heya wava kutofungawo kuti uri mambowo nhai pamusana pokukwikwidzana navamwe nezvomusidhari izvozvi izvi? Handiti baba vako vaidya nokunwa vachiita zvinhu zvine ruenzaniso zvakarurama? Saka zvinhu zvakavafambirawo zvakanaka.

¹⁶Vaitonga zvichemo zvavarombo nezvavasina chavanacho zvikabva zvavafambira zvakanaka. Zvanzi naTenzi, “Hakusiri iko kundiziva here ikoko?

¹⁷“Asi meso nomwoyo wenyu zviri pakubiridzira chete nokudeura ropa risina mhosva nokuita udzvinyiriri noutsinye.

¹⁸“Ndokusaka Tenzi achitaura nezvaJehoyakimu mwanakomana waJosiya mambo weJudha achiti: “Havasi kuzombomuchema. Vachiti, ‘Maiwe-e hama yangu!’ Kana kuti, ‘Yowe-e hanzvadzi kani!’ Havasi kuzombozviita zvokuchema vachiti, ‘Maiwe-e kani Tenzi!’ Kana kuti, ‘Changamire kani!’

¹⁹“Achavigwa sedhongi zvaro achiita zvokuzvuzvurudzwa napasi agonzi hupukupu kukandwa kunze kwemisuo mikuru yeJerusaremu.”

²⁰Kwira kuRebhanoni uridze mhere ubongomore uri kuBhashani uridze mhere uri kuAbharimu nokuti vadiwa vako vose vaparadzwa.

²¹Ndakataura newe uchakagarika, asi iwe wakati, “Zvokuteerera, handidi!” Ndiwo maitiro ako kubvira pauduku hwako okurega kuteerera inzwi rangu.

²²Mhepo ndoichafudza vafudzi vako vose. Vadiwa vako vose vachaendeswa kuutapwa. Ipapo uchanyara uchikangaidzwa nazvo, pamusana pouipi hwako hwose.

²³Iwe chidza cheRebhanoni nyakurererwa mudendere pakati pemisidhari uchanzwisa tsitsi pauchabatwa namarwadzo, marwadzo soumukadzi ari pakusununguka mwana.

²⁴“Zvanzi naTenzi, hezvino ndiripo kudai, kunyange zvazvo iye Koniya mwanakomana waJehoyakimu mambo wokwaJudha ariye ringi rechidhindo rokuruoko rworudyi rwangu asi ini ndichakubvarura

²⁵ndigokuisa mumaoko avanotsvaka kupfuudza upenyu hwako, mumaoko aivo vaunotya, mumaoko aNebhukadhireza mambo weBhabhironi uye mumaoko mevanhu vechiKaridhea.

²⁶Iwe namai vakakubereka ndichakukandai kune imwe nyika kwamusina kuberekerwa ikoko ndokwamuchafira.

²⁷Asi kunyika kuno kwavanenge vosuwira kudzokera, havasiri kuzodzokerako.

²⁸“Ko iye Koniya wava munhu akashoreka here kana kuti hari zvayo yakaputsika, mudziyo usina ani anouchengeta? Ko iye navana vake vanzarirwei kubva vakandwa kunyika yavasingazive?”

²⁹Nhai nyika! Nyika wee! Iwe nyika! Teerera shoko raTenzi!

³⁰Zvanzi naTenzi, “Nyora munhu uyo somunhu asina mwana, munhu asingazofa akabudirira mumazuva ake oupenyu nokuti hapana nomumwe wechizvarwa chake achazombogara pachigaro choumambo hwokwaDhavhidhi achitongazve kwaJudha.”