Read Bhaibhiri Idzva rechiShona Jeremiya 25 Bible Online

Jeremiya 25 - Bhaibhiri Idzva rechiShona bible

Jeremiya 25

¹Shoko iri rakauya kuna Jeremiya rakananga kuvanhu vokwaJudha vose zvavo, muri mugore rechina rokutonga kwaJehoyakimu mwanakomana waJosiya mambo wokwaJudha. (Iroro ndiro gore raiva rechiposhi rokutonga kwaNebhukadhireza mambo weBhabhironi.)

²Muporofita Jeremiya akataura kuvanhu vose vokwaJudha nokuvagari vose veJerusaremu shoko irori rokuti,

³“Kwamakore makumi maviri namatatu, kubvira pagore regumi nechitatu rokutonga kwaJosiya mwanakomana waAmoni mambo wokwaJudha kusvikira pari nhasi, shoko raTenzi ranga richingouya kwandiri ini ndichirambawo ndichikutaurirai, asi imi hamuna kuteerera.

⁴Makaramba kuteerera kana kurerekera nzeve dzenyu kuti munzwe, kunyange Tenzi akaramba achingokutumirai varanda vake vaporofita

⁵achiti, ‘Chitodzokai izvozvi munhu wose asiyane nenzira yake yakaipa netwakaipa twaanobata mugogara munyika iyi yamakapiwa imi namadzibaba enyu kubvira kare kare nokusingaperi.

⁶Regai kutevera vamwe vamwari kundovashandira kana kuvanamata kana kundishatirisa nebasa ramunoita namaoko enyu. Kana madaro iniwo handizokukuvadzai.’

⁷Asi hamuna imi kunditeerera, ndizvo zviri kutaura Tenzi, kuti imimi mungadaro mukandishatirisa nebasa ramunoita namaoko enyu zvikazokukuvadzai.

⁸“Ndokusaka zvanzi naTenzi wehondo nehondo, zvamakarega kuteerera mashoko angu, chinzwai,

⁹‘Iniwo ndava kukoka vemadzinza ose okuchamhembe, ndizvo zviri kutaura Tenzi ndichikoka Nebhukadhireza mambo weBhabhironi, muranda wangu ndigovaunza kuzorwisa nyika iyoyi navagari vayo kuzorwisawo marudzi ose akaitenderera. Ndichavaparadza zvachose ndichivaita kuti vave chinhu chinokatyamadza, nechinhu chinoridzirwa tsamwa nechinhu chokutukisa nacho.

¹⁰Uyewo ndichagumisa mukati mavo chikwe-e chokuseka kana mheremhere yokufara nokupemberera mwenga kana kufarira murume wacho kana kurira kwemakuyo nemwenje werambi.’

¹¹“Nyika ino yose ichava dongo zvaro risina kana chinhu; marudzi ose iwaya achashandira mambo weBhabhironi kwamakumi manomwe amakore.

¹²Mushure mokunge kwapera makore makumi manomwe ndichazoranga mambo weBhabhironi nevechirudzi ivavo nenyika yevaKaridhea pamusana pouipi hwavo, ndizvo zviri kutaura Tenzi, nyika yacho ndichiiparadza zvachose.

¹³Ndichaita kuti nyika iyoyo iwirwe nezvose zvakabva pamuromo pangu zvichinangana nayo, zvose zvakanyorwa mubhuku rino zvakaporofitwa naJeremiya zvichinangana namarudzi evanhu ose zvawo.

¹⁴“Zvichavapo ndezvokuti ndudzi zhinji namadzimambo makuru chaiwo achatovaita varanda kunyange ivo. Ini ndichavapa zvinofambirana nezviito zvavo uye namabasa avanoita namaoko avo.”

¹⁵Nechikonzero ichochi Tenzi Mwari weIsiraeri akanditi, “Tambira mukombe uyu uri muruoko rwangu wewaini yehasha dzangu, ugoita kuti marudzi ose kwandinenge ndakutuma aunwe.

¹⁶Vachaunwa vagodhadharika vagopengeswa nebakatwa randichatumira pakati pavo.”

¹⁷Saizvozvowo ini ndakatora mukombe waiva muruoko rwaTenzi ndikaita kuti marudzi ose kwandakatumwa naTenzi aunwe,

¹⁸kuJerusaremu namaguta okwaJudha, uye namadzimambo ayo namachinda acho kuti ave matongo asina kana chinhu, ave chinhu chinoridzirwa tsamwa charengererwa rushambwa sezvazviri pari nhasi

¹⁹kwouya Farao mambo weIjipiti namakurukota ake namachinda ake navanhu vake vose

²⁰pamwechete namabvakure ose ari pakati pavo, madzimambo ose enyika yeUzi uye namadzimambo enyika yavaFirisitia ose zvawo (Ashikeroni neGaza neEkironi nechitsama chakasara chevokuAshidhodhi)

²¹kwouyawo Edhomu neMoabhu navanakomana vokwaAmoni

²²namadzimambo ose eTire uye madzimambo ose eSidhoni namadzimambo okumahombekombe kumhiri kwegungwa,[26]

²³kwoti Dhedhani neTema neBhuzi navose vanoveura makona evhudzi ravo

²⁴namadzimambo ose eArabhia namadzimambo ose avanhu vakasangana-sangana vagere kurenje

²⁵uye madzimambo ose okwaZimuri namadzimambo ose okuEramu namadzimambo ose okuMidhia

²⁶kozoti madzimambo ose okuchamhembe okure neepedyo mumwe nemumwe uyewo umambo hwose zvahwo hwapanyika pasi pose zvapo. Mushure mavo mambo Sheshaki[27] achazonwawo.

²⁷Wozobva wovataurira kuti, zvanzi naTenzi wehondo nehondo, Mwari weIsiraeri, “Inwai muraradze mugorutsa muputsike musingazomukazve pamusana pebakatwa randava kutuma pakati penyu.

²⁸“Kana vakaramba kugamuchira mukombe iwoyo muruoko rwako kuti vaunwe, vaudze kuti, zvanzi naTenzi wehondo nehondo, ‘Munofanira kutonwa chete!

²⁹Nokuti chionai, ndava kutotangisa kumutsira nhamo guta rinodaidzwa nezita rangu. Zvino imi ndipo pamungarege kurangwa here? Zvokurangwa hamumborega kurangwa nokuti ndiri kudaidzira bakatwa pavagari vose zvavo vepasi pano ndizvo zviri kutaura Tenzi wehondo nehondo.’

³⁰“Naizvozvo iwe unofanira kuvaporofitira uchivaudza mashoko aya ose uchivati: “Tenzi achadzvova mudenga umu, inzwi rake richibuda muNzvimbo yake Inoera. Achadzvovera vedanga rake zvinotyisa achidaidzira sezvinoitwa navanokanya magirepisi achinangana navagari vapanyika.

³¹Ruzha rwacho ruchariridza kusvikira kwakaperera nyika Nokuti Tenzi ane mhosva yaari kupa marudzi, ari kuzogadza dare vanhu vose, vakaipa achivauraya nebakatwa. Ndozviri kutaura Tenzi.”

³²Zvanzi naTenzi wehondo nehondo chionai, nhamo ichauira; ndudzi nendudzi dzavanhu, dutu guru remhepo riri kutangisa kuuya richibva kumiganhu yapasi.

³³Pazuva iroro vanenge vaurayiwa naTenzi vachati rakata kubvira kwainovambira nyika kusvikira kwainopererawo. Havachazochemwa kana kuunganidzwa kana kuvigwa. Vachava ndove zvayo pamusoro pevhu.

³⁴Ungudzai imi vafudzi mucheme muumburuke mudota, imi madzichangamire amatanga nokuti mazuva okuurayiwa nokupararira kwenyu asvika, uye imi muchati mwarara somudziyo[28] wakanakisa.

³⁵Pachasara pasina nzvimbo yokupotera yavafudzi kana yokupukunyukira yamadzichangamire amatanga.

³⁶Inzwa unzwe, kuchema kuri kuita vafudzi nokuungudza kuri kuita madzichangamire amatanga, nokuti Tenzi oparadza mafuro avo,

³⁷nezvo matanga akanyatsozvigarira zvawo anobva aparadzwa nokuda kwehasha dzinotyisa dzaTenzi.

³⁸Asimuka seshumba yabva painohwanda nokuti nyika yavo haisisina chinhu pamusana pebakatwa romudzvinyiriri napamusanawo pehasha dzaTenzi dzinotyisa.