Read Bhaibhiri Idzva rechiShona Jeremiya 26 Bible Online

Jeremiya 26 - Bhaibhiri Idzva rechiShona bible

Jeremiya 26

¹Mukutanga kutonga kwaJehoyakimu mwanakomana waJosiya mambo wokwaJudha, shoko iri rakabva kuna Tenzi rokuti,

²“Zvanzi naTenzi mira muruvanze rwemba yaTenzi utaurire vamaguta ose zvawo okwaJudha vanouya kuzonamata mumba yaTenzi mashoko ose andinokuudza kuti uvataurire, rega kuva neshoko rimwe zvaro raunovanza.

³Zvimwe vangateerere, munhu wose akatendeuka pakuita kwake kwakaipa kuitira kuti ndirege kuita kwavari chakaipa chandanga ndavarongera pamusana pezvakaipa zvavakaita.

⁴“Unofanira kuvataurira kuti zvanzi naTenzi kana mukarega kunditeerera kuti mufambe mumurau wangu wandakaisa pamberi penyu,

⁵kana kunzwa mazwi avaranda vangu vaporofita vandinokutumirai zvechimbichimbi kunyange zvazvo imi musina kumboita hanya nazvo,

⁶nezvo Temberi[29] iyi ndava kuiita sezvandakaita yokuShiro uye guta rino ndichariita kuti rive guta rakarengererwa rushambwa pamarudzi ose apasi pano.”

⁷Vapristi navaporofita navanhu vose vakanzwa Jeremiya achitaura mazwi iwaya mumba yaTenzi.

⁸Jeremiya paakanga apedza kutaura zvose zvaakanga audzwa naTenzi kuti ataurire vanhu vose, ipapo vapristi navaporofita vakamubata vachiti,

⁹“Unotopafa chete! Waporofitirei muzita raTenzi uchiti Temberi ino ichaitwa sezvakaitwa yokuShiro uye kuti guta rino richava dongo risina anogaramo?” Izvozvo vanhu vose vakaunganira Jeremiya imomo mumba yaTenzi.

¹⁰Machinda okwaJudha paakanzwa zvinhu izvi akabuda achibva mumuzinda wamambo achienda kumba yaTenzi akasvikogara muzvigaro zvawo panopindwa napo kuSuo Guru Idzva remba yaTenzi.

¹¹Vapristi navaporofita vakataurira machinda navanhu vose kuti, “Murume uyu anofanira kutongerwa rufu nokuti aporofita achinangana neguta rino iri sezvamazvinzwirawo imi nenzeve dzenyu.”

¹²Jeremiya ndokubva ataura kumachinda ose nokuvanhu vose achiti, “Tenzi akandituma kuzoporofita ndakanangana nemba ino uye neguta iro rino mashoko ose amanzwa.

¹³Saka zvino chitogadziridzai nzira dzenyu nezviito zvenyu mugoteerera inzwi raTenzi, Mwari wenyu. Tenzi achadzora mwoyo orega kuita kwamuri zvaakareva nezvenyu.

¹⁴Kana ndiri ini, hezvika ndiri mumaoko menyu, itai henyu neni zvamunoona kuti zvakanaka uye zviri pamwero.

¹⁵Asi munofanira kunyatsoziva kuti kana mukandiuraya muchapfukirwa neropa risina mhaka, imi, neguta rino navagari varo nokuti zvechokwadi Tenzi akandituma kwamuri kuzotaura mashoko ose iwaya muchizvinzwa nenzeve dzenyu.”

¹⁶Machinda navanhu vose vakabva vati kuvapristi nokuvaporofita, “Murume uyu haafanire kutongerwa rufu nokuti ataura kwatiri muzita raTenzi, Mwari wedu.”

¹⁷Ipapo vamwe vakuru vakuru venyika iyi akasumuka akataurira gungano ravanhu vose ivavo kuti,

¹⁸“Mika wokuMoresheti akamboporofita mumazuva aHezikiya mambo wokwaJudha achitaurira vanhu vose vokwaJudha achiti: “Zvanzi naTenzi wehondo nehondo guta reZioni richarimwa somunda, Jerusaremu ichava murwi wamatongo gomo reTemberi richasara rava sango zvaro riri pakatunhumara.

¹⁹Ko Hezekiya mambo wokwaJudha neJudha yose vakamuuraya here? Haana here kutya Tenzi akateterera kuti Tenzi amuitire tsiye nyoro? Uye Tenzi haana here kuzodzora mwoyo orega kuita kwaari zvakaipa zvaakanga avazivisa? Asi isu tava kutozvidenhera nhamo huru!”

²⁰Kune mumwe murume akaporofita muzita raTenzi, ainzi Uriya mwanakomana wokwaShemiya anobva kuKiraitijearimu. Iyeyo akaporofitawo achinangana neguta iro rino iri nenyika ino namazwi akafanana neari kutaurwa naJeremiya.

²¹Mashoko iwayo paakasvika munzeve dzamambo Jehoyakimu pamwechete navarwi vake vehondo namachinda ake, mambo akada kumuuraya. Asi Uriya paakazvinzwawo akatya ndokubva atiza akaenda kuIjipiti.

²²Mambo Jehoyakimu akazotumira kuIjipiti vamwe varume, vanoti Erinatani mwanakomana waAkibhori navamwewo varume vaaiva navo.

²³Vakandotora Uriya kuIjipiti vakauya naye kuna mambo Jehoyakimu, mambo akamuuraya nebakatwa akakanda chitunha chake munzvimbo yokuviga voruzhinji.

²⁴Asi Jeremiya akachengeteka mumaoko maAhikamu mwanakomana wokwaShafani zvokuti haana kuzoturirwa kuvanhu kuti vamuuraye.