Read Bhaibhiri Idzva rechiShona Jeremiya 27 Bible Online

Jeremiya 27 - Bhaibhiri Idzva rechiShona bible

Jeremiya 27

¹Pakutanga kutonga kwakaita Zedhekia mwanakomana waJosiya mambo wokwaJudha, kwakauya shoko iri kuna Jeremiya richibva kuna Tenzi.

²Tenzi akanditi, “Zvigadzirire joko nezvitorobho zvaro uzvibope naro pamutsipa pako

³utumire shoko kuna mambo weEdhomu namambo weMoabhu namambo wavanakomana vokwaAmoni namambo wokuTire namambo wokuSidhoni uritumire nenhume dzakauya kuJerusaremu kuna Zedhekiya mambo wokwaJudha.”

⁴Uvati vatakurire vakuru vavo shoko iri rokuti: “Zvanzi naTenzi wehondo nehondo, Mwari weIsiraeri

⁵zvino mochindozivisa vakuru venyu shoko iri rokuti, ‘Inini namasimba angu makuru nesimba roruoko rwangu ndini ndakasika nyika pamwechete navanhu nemhuka zviri panyika. Ndinozvipa kunaani zvake wandinenge ndaona kuti zvakakodzera kumupa.

⁶Pari zvino nyika dzose idzodzi ndadziisa mumaoko maNebhukadhineza, mambo weBhabhironi, muranda wangu. Ndakamupawo zvikara zvesango kuti zvimushandire.

⁷Marudzi ose avanhu achamushandira iye nomwanakomana wake nomuzukuru wake mukomana kusvikirawo jana renyika yakewo rasvika rokuti marudzi mazhinji namadzimambo makuru chaiwo vazomuitawo muranda wavo.’

⁸“Asi kuwana rudzi kana nyika zvayo yazoramba kushandira Nebhukadhineza mambo weBhabhironi uyu, ruchirega kurerekera mutsipa warwo pasi pejoko ramambo weBhabhironi, ndicharanga rudzi irworwo nebakatwa neshangwa yenzara nedenda kusvikira ndarutsakatisa nesimba roruoko rwake. Ndizvo zviri kutaura Tenzi.

⁹Saka imi chiregai kuteerera vaporofita venyu kana vashoperi venyu kunyange varoti venyu kana vafemberi venyu vemaminimini kana vanhu venyu vakaromba mushonga vari kukutii, hamusi kuzoshandira mambo weBhabhironi.

¹⁰Chiripo chaicho ndechokuti inhema chaidzo dzavari kukuporofitirai zvichakusvitsai pakubviswa muchiendeswa kure nenyika yenyu izvozvo ini ndichakudzingai muno mugoparara.

¹¹Asi rudzi rupi norupi runenge rwaunza mutsipa warwo pasi pejoko ramambo weBhabhironi rukamushandira ndicharusiya ruri munyika yarwo ruchirima rugeremo, ndizvo zviri kutaura Tenzi.”

¹²Ndakataurawo zvimwechetezvo kuna Zedhekiya mambo wokwaJudha ndichiti, “Rerekerai mitsipa yenyu pasi pejoko ramambo weBhabhironi mumushandire iye navanhu vake mugorarama.

¹³Ko imi navanhu venyu chii chaizvo chamungafire nebakatwa neshangwa nenzara nedenda sezvataura Tenzi pamusoro perudzi rupi norupi runenge rwaramba kushandira mambo weBhabhironi?

¹⁴Regai kuteerera zvinotaura vaporofita ivavo vari kukutii: ‘Hamusi kuzoshandira mambo weBhabhironi, nokuti vari kukuporofitirai nhema.’

¹⁵Zvanzi naTenzi ini handina kuvatuma, asi vari kuporofita zvenhema muzita rangu, zvichakonzera kuti ndikudzingei muchibva matsakatika imi pamwechete navaporofita vari kukuporofitirai vacho.”

¹⁶Ndakazotaurira vapristi navanhu vose ivava ndichiti: “Zvanzi naTenzi, musateerere zvinorehwa navaporofita venyu vari kukuporofitirai vachiti, ‘Chiregai muone zvenyu, midziyo yemba yaTenzi yava kutodzorerwa kuno izvozvi ichibva kuBhabhironi’ nokuti vari kukuporofitirai zvenhema.

¹⁷Regai kuvateerera! Shandirai mambo weBhabhironi murarame. Chii chaizvo chingaitirwe kuti guta rino rive dongo?

¹⁸Kana vari vaporofitawo uye kana vane shoko raTenzi, regaika vateterere kuna Tenzi wehondo nehondo kuti midziyo yasara mumba yaTenzi nomumba yamambo wokwaJudha nomuJerusaremu irege kuenda kuBhabhironi”

¹⁹nokuti zvanzi naTenzi wehondo nehondo nezvemisimboti nezibhavhu riya nezvigadzikiro zvaro nemimwe midziyo yose yakasara muguta rino,

²⁰zvisina kutorwa naNebhukadhineza mambo weBhabhironi paakatapa muJerusaremu Jekoniya mwanakomana waJehoyakimu mambo wokwaJudha navose vokumbahuru yokwaJudha neveJerusaremu achivaendesa kuBhabhironi,

²¹zvanzi naTenzi wehondo nehondo, Mwari weIsiraeri nezvemidziyo yakasara mumba yaTenzi nomumuzinda wamambo wokwaJudha nomuJerusaremu:

²²“Ichatakurwa igoendwa nayo kuBhabhironi igareko kusvikira musi wandichazofunga zvokuita nayo, ndizvo zviri kutaura Tenzi. Ndipo pandichaiunzazve kuno ndichiidzosera munzvimbo ino.”