Read Bhaibhiri Idzva rechiShona Jeremiya 28 Bible Online

Jeremiya 28 - Bhaibhiri Idzva rechiShona bible

Jeremiya 28

¹[30] Hananiya anokakavadzana naJeremiya. Mugore rakarero, mukutanga kutonga kwaZedhekiya mambo wokwaJudha mumwedzi wechishanu wegore rechina, Hananiya mwanakomana wokwaAzuru, muporofita wokuguta reGibheoni akataura kwandiri mumba yaTenzi, vapristi navanhu vose varipowo achiti:

²“Zvanzi naTenzi wehondo nehondo, Mwari weIsiraeri ndatyora joko ramambo weBhabhironi.

³Mumakore maviri ndichadzosera munzvimbo muno midziyo yose yemba yaTenzi yakatorwa naNebhukadhineza mambo weBhabhironi munzvimbo muno achiiendesa kuBhabhironi.

⁴Ndichadzoserawo kunzvimbo ino Jekoniya mwanakomana waJehoyakimu, mambo wokwaJudha navakatapwa vose vokwaJudha vakaenda kuBhabhironi ndizvo zvinotaura Tenzi. Ndinodaro nokuti ndichatyora joko ramambo weBhabhironi.”

⁵Muporofita Jeremiya akabva ataura kumuporofita Hananiya, vapristi varipo navanhu vose vakanga vamire muTemberi yaTenzi.

⁶Muporofita Jeremiya akati, “Ameni Tenzi ngaaite saizvozvo, Tenzi ngaaite kuti shoko ravaporofita riitike pachokwadi adzoserewo kunzvimbo ino midziyo iya yemba yaTenzi navakatapwa vose achivatora kuBhabhironi.

⁷Asi chinzwa zvino shoko iri randinokutaurira iwe uchizvinzwira vanhu vose zvavo vachinzwawo.

⁸Vaporofita vakatitangira ini newe kubvira karekare, vakaporofita nezvehondo neshangwa yenzara nedenda zvaizowira nyika zhinji noumambo hune simba.

⁹Kwaiti kana muporofita akaporofita nezvorugare, shoko romuporofita iyeyo rikazoitika, ndopaizozikanwa kuti zvechokwadi Tenzi ndiye akatuma muporofita iyeyo.”

¹⁰Ipapo muporofita Hananiya akakumura joko mumutsipa momuporofita Jeremiya akarityora.

¹¹Hananiya ndokutaura vanhu vose vachinzwa achiti, “Zvanzi naTenzi, ndichatyorawo saizvozvi joko raNebhukadhineza mambo weBhabhironi ndichiribvisa mumutsipa wamarudzi ose avanhu mumakore maviri.” Asi muporofita Jeremiya akabva aenda hake.

¹²Garegare, mushure mokunge muporofita Hananiya atyora joko mumutsipa womuporofita Jeremiya, izwi raTenzi rakauya kuna Jeremiya rikati,

¹³“Enda undoudza Hananiya kuti zvanzi naTenzi, wakatyoraka iwe joko rechimuti asi uchatogadzira[31] joko resimbi rokuritsiva naro

¹⁴nokuti zvanzi Tenzi wehondo nehondo, Mwari weIsiraeri, ndaisa pamutsipa yamarudzi ose avanhu joko resimbi, rouranda hwokushandira Nebhukadhineza mambo weBhabhironi. Vanofanira kumushandira nokuti ndatomupa kunyange nezvikara zvesango.”

¹⁵Muporofita Jeremiya ndokuti kumuporofita Hananiya, “Chinzwa Hananiya! Tenzi haana kumbokutuma iwe! Asi uri kuita kuti vanhu ava vavimbe namanyepo.

¹⁶Naizvozvo zvanzi naTenzi, ‘Chinzwa, ndava kukupfuudza pamusoro payo nyika.’ Iro gore rino chairo uchafa nokuti wakaburitsa mazwi okupandukira Tenzi.”

¹⁷Mugore rakarero, mumwedzi wechinomwe, muporofita Hananiya akabvawo afa.