Read Bhaibhiri Idzva rechiShona Jeremiya 29 Bible Online

Jeremiya 29 - Bhaibhiri Idzva rechiShona bible

Jeremiya 29

¹Haanoi mashoko etsamba yakatumirwa naJeremiya ichibva kuJerusaremu ichienda kuvakuru vakuru vose vevakatapwa vaya, nokuvapristi nokuvaporofita nokuvanhu vose vakanga vatapwa naNebhukadhineza muJerusaremu vachiendwa navo kuutapwa kuBhabhironi.

²Izvozvo maiva mushure mokunge mambo Jekoniya naamai vamambo uyu navayuniki namachinda okwaJudha neveJerusaremu nenyanzvi dzamabasa amaoko nemhizha dzezvoutare dzabva muJerusaremu.

³Tsamba iyi yakatumidzirwa namaoko aErasa mwanakomana waShafani aina Gemariya mwanakomana waHirikiya akatumwa naZedhekiya mambo wokwaJudha kuBhabhironi kuna Nebhukadhineza mambo weBhabhironi ichiti:

⁴“Zvanzi naTenzi wehondo nehondo, Mwari weIsiraeri kunemi nhapwa dzose dzandakaendesa kuBhabhironi kuutapwa dzichibva kuJerusaremu:

⁵“Vakai dzimba mugaremo zvenyu, simai mapindu mudye zvinobudamo.

⁶Roorai vakadzi muve navana vakomana navasikana. Roorerai vakadzi vanakomana venyu muroodzewo vanasikana venyu kuti vabereke vana vakomana navasikana muwande ikoko murege kushomeka.

⁷Vavarirai kuti guta randinenge ndakuendesai muutapwa rive norugare murinamatire kuna Tenzi nokuti kugarika kwaro ndiko kugarikawo kwenyu.

⁸Chandinodariro ndechokuti, zvanzi naTenzi, Mwari wehondo nehondo Mwari weIsiraeri, Musanyengedzwe navaporofita venyu vari mukati menyu. Musanzwe zviroto zvavanorotomoka

⁹nokuti inhema dzavanoprofita kwamuri muzita rangu. Handina kumbovatuma, ndizvo zviri kutaura Tenzi.

¹⁰“Nokuti zvanzi naTenzi, kana Bhabhironi yapedza makore makumi manomwe, ndichazokushanyirai ndigokuitirai zvandavimbisa ndigokudzoserai kunzvimbo ino,

¹¹nokuti ini ndinoziva zvandakakurongerai, ndizvo zviri kutaura Tenzi. Zvirongwa zvacho ndezvokuti zvinhu zvikunakirei kwete kuti zvikuipirei, kuri kukupai upenyu muneramangwana hune chitarisiro.

¹²Ipapo muchazochema kwandiri muchiuya kuzondinamata, ini ndichakunzwai.

¹³Muchanditsvaka mugondiwana kana manditsvaka nemwoyo wose.

¹⁴Muchandiwana ndizvo zviri kutaura Tenzi ndigokudzoserai makomborero enyu ndigokukokorodzai kumarudzi ose nokunzvimbo dzose kwandakudzingirai ndichikudzoserai kwandakambokubvisai pandakakuendesai kuutapwa, ndizvo zviri kutaura Tenzi.

¹⁵“Pamusana pokuti imi mava kuti Tenzi azotimutsira vaporofita muBhabhironi,

¹⁶hezvinoi zviri kutaura Tenzi nezvamambo agere pachigaro choumambo hwokwaDhavhidhi uye nezvevanhu vose vagere muguta rino ivo hama dzenyu dzisina kuenda nemi kuutapwa.

¹⁷Tenzi wehondo nehondo anoti, ‘Regai muone, ndava kuvatumira bakatwa neshangwa yenzara nedenda. Uye ndivaite samaonde akaora kwazvo aipa zvokuti haadyiki.’

¹⁸Ndichavaronda nebakatwa neshangwa yenzara nedenda ndichiita kuti vave chinhu chinotyisa kunyika dzose dzapasi pano charengererwa rushambwa chinodederwa, chinoridzirwa tsamwa nechiseko zvacho mukati memarudzi kwandakavadzingira

¹⁹nokuti vakaramba kuteerera mashoko angu ndizvo zviri kutaura Tenzi; andakaramba ndichitumira kwamuri navaranda vangu vaporofita. Asi imi zvokuteerera, makaramba ndizvo zvinotaura Tenzi.

²⁰Ipapo inzwai shoko raTenzi, imi mose nhapwa dzandakabvisa kuJerusaremu ndichidziendesa kuBhabhironi inzwai shoko raTenzi.

²¹Zvanzi naTenzi wehondo nehondo, Mwari weIsiraeri nezvaAhabhu mwanakomana waKoraya uye nezvaZedhekiya mwanakomana waMaaseya vari kuporofita kwamuri muzita rangu, chinzwai, ndichavaisa mumaoko maNebhukadhireza mambo weBhabhironi achavauraya makatarisa.

²²Ivava ava vachakonzera kuti nhapwa dzose dzokwaJudha dziri muBhabhironi dzizogarotaura tsumo yorushambwa yokuti: ‘Tenzi ngaakuite hwaZedhekiya naAhabhu vakakangwa mumoto namambo weBhabhironi’

²³nokuti vanoita zvinhu zvoupenzi muIsiraeri, vakaita upombwe namadzimai evamwe vavo vakataura muzita rangu zvinhu zvokunyepa zvandisina kumbovatuma. Ini iyeni ndinozviziva uye ndini chapupu chacho. Ndizvo zvinotaura Tenzi.”

²⁴Kuna Shemaya wokuNeheramu iti:

²⁵“Zvanzi naTenzi wehondo nehondo Mwari weIsiraeri: ‘Wakatumiraka iwe matsamba muzita rako kuvanhu vose vari muJerusaremu nokunaZefaniya mwanakomana wokwaMaaseya mupristi, nokuvapristi vose’ uchiti,

²⁶‘Tenzi akuita mupristi panzvimbo pomupristi Jehoyadha kuti uve mukuru wokuona nezvomumba maTenzi uye benzi rose rinenge richiporofita riri pasi pako kuti uriise muchitokisi nesimbi muhuro.’

²⁷Zvino wakarega nei kutsiura Jeremiya wokuAnatoti ari kukuporofita?

²⁸Hezvi akatitumira shoko kuBhabhironi rokuti, ‘Kuchaita nguva ndefu chaiyo muri kuutapwa. Chivakai dzimba mugaremo henyu musime mapindu mudye michero yawo.’ ”

²⁹Mupristi Zefaniya vakaverenga tsamba iyoyi muporofita Jeremiya achizvinzwira.

³⁰Izwi raTenzi rakabva rauya kuna muporofita Jeremiya rikati,

³¹“Endesa shoko kunhapwa dzose rokuti hezvinoi zviri kutaurwa naTenzi zvakanangana naShemaya wokuNeheramu. Pamusana pokuti Shemaya akaporofita kwamuri ini ndisina kumutuma akakuitai kuti muvimbe nenhema,

³²naizvozvo Tenzi anoti ndicharanga Shemaya wokuNeheramu nezvizvarwa zvake. Hapana kana nomumwe wokwake achava mupenyu kuti azoonawo zvakanaka zvandichaitira vanhu vangu, ndizvo zviri kurehwa naTenzi nokuti akataura mazwi okupandukira Tenzi.”