Read Bhaibhiri Idzva rechiShona Jeremiya 3 Bible Online

Jeremiya 3 - Bhaibhiri Idzva rechiShona bible

Jeremiya 3

¹“Kana murume akarambana nomudzimai wake, iye akaenda akandova mudzimai womumwe murume, murume uyu angadzokerana naye here? Nyika iyoyo haingan'oreswe zvakanyanya here? Wakaitaka zvoufeve nezvikomba zvakawanda, ungadzokere here, iwe, kwandiri? Ndizvo zviri kurehwa naTenzi.

²Simudza musoro utarisewo kumitunhu yakatunhumara kusina miti. Ndapapi pausina kuitira chakaipa? Mudzinzira waigara wakamirira zvikomba zvako, sokuhwandira kunoita muArabhu mugwenga. Wan'oresa nyika iwe nounzenza hwako hunosemesa.

³Ndokusaka mvura yakambomiswa kunaya, mvura yomunhuruka ikarega kuturuka. Asi iwe une uso hwepfambi, haunyari.

⁴“Handiti iye zvino unonditi, ‘Baba vangu,’ uchinditi, ‘Muri shamwari yangu kubvira pauduku hwangu,

⁵mucharamba makangotsamwa here narini wose; mucharamba makangoshatirwa kusvikira kumagumo here?’ Tarisa uone kuti izvi kutaura unotaura zvako asi iwe wakaita zvakaipa paunokwanisira napo.”

⁶Mumazuva amambo Josiya, Tenzi akati kwandiri, “Wakaona here zvakaitwa nomukadzi akapanduka uya, Isiraeri kunekura kwaaiita nezvikomo zvose nepasi pomuti wose wose wakasvibira achiitira ufeve hwake imomo?

⁷Ndakafunga kuti, kana apedza kuita kwake kwose ikoko achadzokera kwandiri, asi haana kudzoka, izvozvo munyengedzi munun'una wake Judha uyu, zvaiva mumazisowo make.

⁸Judha akaona kuti pamusana poupombwe hwomukadzi asingavimbiki uya, Isiraeri, ini ndakamuramba netsamba yegupuro. Asi munun'una wake, munyengedzi, Judha, hazvina kumbomurovesa hana. Asi ndopaakatondoitawo unzenza.

⁹Pamusana pokufumuka kwake nounzenza akan'oresa nyika ino achiita zvounzenza hwokunamata matombo nemiti.

¹⁰Kunyange zvose izvi zvakadaro zvazvo, munyengedzi munun'una wake Judha haana kudzokera kwandiri nomwoyo wose asi zvechipameso chete, ndizvo zviri kutaura Tenzi.”

¹¹Tenzi akati kwandiri, “Iye Isiraeri mukadzi akapanduka uya, anozvionesa somunhu asina mhosva pane munyengedzi uyu Judha.

¹²Enda undoparidza kuchamhembe mazwi aya utaure uchiti: “Zvanzi naTenzi, chidzoka iwe Isiraeri mhandupandu yomunhu. Handichakutsvukisira meso nehasha nokuti ndine ngoni, ndizvo zviri kutaura Tenzi handicharamba ndakashatirwa nokusingaperi.

¹³Chako iwe chete, bvuma uipi hwako kuti wakapandukira Tenzi, Mwari wako ukatoti zvako mwarara kurasira makomborero ako kuvamwari vasivo pasi pomuti wose zvawo wakasvibira ubvumewo kuti wakarega kuteerera izwi rangu, ndizvo zviri kurehwa naTenzi.

¹⁴“Zvanzi naTenzi dzokai imi vana vasina kutendeka nokuti ini ndini tenzi wenyu. Ndichakutorai ndichiti muguta iri ndotora mumwechete, mumhuri iyi ndichitora vaviri, ndozokuunzai kuguta reZioni.

¹⁵“Ndichakupai vafudzi vangu vapamwoyo vachakupai chokudya choruzivo nokunzwisisa.

¹⁶Zvanzi naTenzi pamazuva iwayo kana zvino maberekana kwazvo mawanda munyika ino, havachazombodoma kuti, ‘Bhokisi rechitenderano chaTenzi.’ Harisi kana kuzombouya zvaro mumusoro mavo kunyange kurirangarira zvako kana kumborisuwirwawo, harisi kuzombogadzirwa zvakare.

¹⁷Panguva iyoyo guta reJerusaremu rinenge rava kunzi, ‘Chigaro chaTenzi choumambo’. Ndudzi dzose dzavanhu dzichakotonokerako kuJerusaremu muzita raTenzi. Izvozvo vanenge vakanda pasi zvokuomesa musoro nokufuririka nomwoyo wavo wakaipa.

¹⁸Mumazuva iwayo vemba yokwaJudha vachabatana nevemba yokwaIsiraeri. Vachadzoka pamwechete vachibva kunyika kuchamhembe vachiuya kunyika yandakapa madzibaba enyu kuti ive nhaka yavo.”

¹⁹Ini Tenzi ndakati, “Zvaizofadza seiko kukubatai somumwe wevanakomana vangu ndichikupai nyika yakanaka, nhaka yakanakisisa pane yamamwe marudzi ose. Ndaifunga kuti maizondidaidza kuti, ‘Baba vangu’ musisandifuratire morega kunditevera.

²⁰Zvinongoita mudzimai anenge apanduka achisiya murume wake, ndokusatendeka kwawakaita iwe imba yaIsiraeri ndizvo zviri kutaura Tenzi.”

²¹Pane kuchema kuri kunzwika pamutunhu wakatunhumara pasina miti, kuhwihwidza nokuteterera kwevanakomana veIsiraeri nokuti vaminamisa gwara ravo, vakanganwa Tenzi, Mwari wavo.

²²Dzokai imi vanakomana vakapanduka ndichakurapai mwoyo wokupanduka. Hezvika, tauya kwamuri nokuti imi ndimi Tenzi, Mwari wedu.

²³Zvomuzvikomo izvi kuzvinyengedza, ndizvo zvimwechetezvo nezhowezhowe inoitwa mamakomo'mu. Chokwadi ruponeso rwedu ruri muna Tenzi, Mwari wedu.

²⁴“Asi kubvira pauduku hwedu Chakafumuka[5] chakaparadza zvose zvakanga zvashandwa namadzibaba edu zvinoti: matanga emombe nezvimwe zvipfuwo navanakomana vavo navanasikana vavo.

²⁵Ngatitii pasi ware ware kurara nenyadzi, kunyara kutikwidibire nokuti takatadzira Tenzi, Mwari wedu, isu namadzibaba edu kubvira pahuduku hwedu kusvikira pari nhasi. Uye hatina kuteerera izwi raTenzi, Mwari wedu.”