Read Bhaibhiri Idzva rechiShona Jeremiya 30 Bible Online

Jeremiya 30 - Bhaibhiri Idzva rechiShona bible

Jeremiya 30

¹Shoko iri rakauya kuna Jeremiya richibva kuna Tenzi richiti,

²“Zvanzi naTenzi, Mwari weIsiraeri, nyora mubhuku mashoko ose andakakutaurira

³nokuti zvanzi naTenzi mazuva ari kuuya andichadzosera vanhu vangu vokwaIsiraeri nevokwaJudha makomborero, ndizvo zviri kutaura Tenzi. Uye ndichavaunzazve kunyika yandakapa kumadzibaba avo vagoiitazve yavo.”

⁴Aya mazwi akataurwa naTenzi achireva nezvevokwaIsiraeri novokwaJudha:

⁵“Zvanzi naTenzi, ‘Takanzwa mhere inodederesa inotyisa isina rugare.’

⁶“Imbobvunzai zvenyu muzvione, munhurume angapone mwana here? Zvamboita sei chaizvo kuti ini ndione murume wose akabata chiuno namaoko somukadzi ari pakusununguka? Uso hwomunhu wose kuchenuruka kudai zvaita sei chaizvo?

⁷“Hezvino ndakadai, ‘Zuva iroro izuva guru, hakuna kana nerimwe rakaita sairoro, inguva yenhamo chaiyo kune vokwaJakobho asi vachanunurwa zvavo mariri.’ ”

⁸Zvanzi naTenzi wehondo nehondo, “Musi iwoyo zvichaitika ndezvokuti ndichatyora joko ndichiribvisa mumutsipa mavo uye ndichagwishura tambo dzenyu,[32] vechirudzi havazombova madzichangamire avo.

⁹“Asi kutoti vachashandira Tenzi, Mwari wavo naDhavhidhi mambo wavo wandichavamutsira.

¹⁰“Zvino iwe Jakobho, muranda wangu, rega zvako kutya, kana kudumbirwa nazvo iwe Isiraeri, ndizvo zviri kutaurwa naTenzi, nokuti, chionai, ndichakununurai ikoko kunzvimbo iri kure. Vana vako ndichavanunura munyika youranda hwavo. VokwaJakobho vachadzoka vavave norunyararo norudekaro, hapana achavatyisidzira

¹¹nokuti ndinemi kuitira kuti ndikununurei, ndizvo zvinorehwa naTenzi. Nokuti marudzi ekwandakakumwararidzai ndichaaparadza imi handisi kuzokuparadzai zvachose, asi ndichakurangaiwo nemwerowo wakafanira, handisi kuzokuregai musina kurangwa.”

¹²Chikonzero ndechokuti, zvanzi naTenzi, “Kukuvara kwenyu hakucharapiki, ronda renyu rakakurisisa.

¹³Chichemo chako hachina achapipirira, hapana mushonga weronda rako, zvokupora haupore.

¹⁴“Vadiwa vako vose vakukanganwa, havana kana hanya newe nokuti ndakakurova nokurova kwomuvengi, chirango chomuvengi ane utsinye nokuti mhosva yako ihuru, nokuti zvitadzo zvako zvakawanda.

¹⁵Chaunochema kukuvadzwa kwako chii? Marwadzo ako haachapora Pamusana pokukura kwemhosva yako, pamusanawo pokuwanda kwezvitadzo zvako, ndokusaka ndakaitawo izvozvi kwauri.

¹⁶“Naizvozvo vose vanokuparadza vachaparadzwawo, uye vavengi vako vose zvavo, mumwe nomumwe wavo vachaenda kuutapwa. Vanokupamba iwe vachavawo nhapwa. Vose vanokuita nyama yamagora ini ndichavaitawo nyama yamagora

¹⁷nokuti ndichakudzosera utano hwako maronda ako ndichiaporesa ndizvo zviri kutaura Tenzi pamusana pokuti vakakutumidza kuti ‘Musemwa.’ Vachitokuti, ‘Zionimurambwanavose.’ ”

¹⁸Zvanzi naTenzi, “Chionai, ndichadzosera makomborero omumatende evokwaJakobho ndichiitira ngoni mavo mavagere. Guta richavakwa pachimudhuri charo muzindawo uchamira pawaiva.

¹⁹“Mazviri muchabuda nziyo dzokutenda nezhowezhowe ravaiti vemafaro. Ndichaita kuti vawande havasi kuzombova vashoma. Ndichaita kuti varemekedzwe vachange vasiri vanhuwo zvavo.

²⁰Vana vavo vachaita zvavakanga vari kare, gungano ravo richadzikazve midzi paneni iniwo ndicharanga vose vanovaonesa nhamo.

²¹“Jinda ravo richange riri mumwe wavo ivo, mutongi wavo achimuka mukati mavo imomo. Ndichamuswededza pedyo iye agobvawo asvika pandiri nokuti ndiani chaizvo angabva atofemera hake kusvika pandiri? Ndozviri kutaura Tenzi.

²²Muchavawo vanhu vangu ini ndichivawo Mwari wenyu.”

²³Hero dutu remhepo raTenzi rovhuvhuta rakashatirwa chaizvo riri chamupupuri chaicho chine simba chichaputikira musoro wavanhu vakaipa.

²⁴Hasha dzinotyisa dzaTenzi hadzimboserera kusvikira atopedza kuita zvaakaronga mumwoyo make. Mumazuva anotevera acho munozonyatsozvinzwisisisa kwazvo.