Read Bhaibhiri Idzva rechiShona Jeremiya 31 Bible Online

Jeremiya 31 - Bhaibhiri Idzva rechiShona bible

Jeremiya 31

¹“Panguva iyoyo, zvanzi naTenzi ini ndinenge ndiri Mwari wedzimhuri dzose dzeIsiraeri naivowo vachava vanhu vangu.”

²Zvanzi naTenzi, “Vanhu vakapunyuka bakatwa vaya vakawana nyasha kurenje, paitsvaga Isiraeri runyararo.

³Ini Tenzi ndakazvionesa kwauri ndiri nechokure. Ndakakuda norudo rusina mugumo ndokusaka ini ndakaramba ndakangotendeka kwauri.

⁴“Ndichakuvaka, ugovakika, iwe mhandara, Isiraeri. Uchazvishongedza zvakare netambureni uendewo uchindodzana pamutambo navanenge vachifara.

⁵“Uyewo uchasima minda yamagirepisi mumakomo eSamaria. Vasimi vachasima vagofarira kudya nomuchero wacho

⁶nokuti kuchava nezuva rokuti vachengetedzi vachayambira vari munyika yokwaEfuremu yamakomo vachiti, ‘Simukai tikwire kuguta reZioni kuna Tenzi, Mwari wedu.’ ”

⁷Chikonzero ndechokuti, zvanzi naTenzi, “Imbai muchiita zvokutodaidzira muchifarira vokwaJakobho mushevedzere kwazvo muchiitira changamire wendudzi nendudzi dzavanhu, muparidze murumbidze muchiti, ‘Tenzi akanunura vanhu vake chitsama chavakasara veIsiraeri.’

⁸“Chinzwai ndichavauyisa ndichivabvisa kunyika yokuchamhembe ndichivakokorodza kure kure kwakaperera nyika chaiko pakati pavo paina mapofu nevakaremara nomudzimai akazvitakura pamwechete nomukadzi anenge achirwadzwa pakusununguka. Vachadzoka kuno vari gurusvusvu guru chairo.

⁹“Vachauya vachihwihwidza kuchema, ndichivanyaradza nokuvatungamirira pakudzoka. Ndichavafambisa nomuhova dzemvura, munzira yakati twasu mavasingazofa vakadzedzereka nokuti ini ndiri baba kuIsiraeri uye vokwaEfuremu ndivo dangwe rangu.

¹⁰“Inzwai shoko raTenzi, imi ndudzi nendudzi dzavanhu, muriparidze kure kunyika dzomumahombekombe megungwa. Itii, ‘Nyakumwararisa Isiraeri uya, achaikokorodzazve achizoichengeta sokuchengetedza kunoita mufudzi danga rezvipfuwo zvake.’

¹¹“Chikonzero chacho ndechokuti Tenzi akaponesa vokwaJakobho achivanunura mumaoko meane simba kukunda iye.

¹²Vachauya vagoimba vachiita zvokudaidzira pamutunhu wakatunhumara weZioni vachifarira mwoyo wakanaka waTenzi, vachifarira mbeswa newaini namafuta eorivhi, vachifarirawo vana vezvipfuwo zvavo nemhuru. Upenyu hwavo huchaita sebindu rinodiridzwa, havachazofazve vakazvidya mwoyo.

¹³“Ipapo ndopachapembera kufara, vasikana vodzana zvino, majaya navakura vachifara zvavo. Nhamo yavo yokuchema ndichaishandura kuva kupembera kufara. Ndichavanyaradza ndichivapa mufaro panzvimbo pokusuruvara.

¹⁴Ndichaita kuti vapristi vanakirwe mumwoyo nezvakawanda vanhu vangu vachigutswa nezvakanaka zvangu ndozvinoreva Tenzi.”

¹⁵Zvanzi naTenzi, “Izwi rinonzwika kuRama, kuungudza nokuhwihwidza kuchema Rakeri achiridzira mhere vana vake vachiramba kunyaradzwa nezvevana vake pamusana pokuti havasisipo.”

¹⁶Zvanzi naTenzi, “Izwi rako ngarichirega kana kuburitsa misodzi mumaziso mako nokuti uchapiwa mubayiro webasa rako, ndizvo zviri kutaura Tenzi, uye vachadzoka vachibva kunyika yomuvengi.

¹⁷Chitarisiro chichiripo choupenyu hwako hweramangwana ndizvo zviri kutaura Tenzi uye vana vako vachadzoka kunyika yavo.

¹⁸“Ndanzwa vokwaEfuremu vachichema nhamo Inga makandipingudza, ndakapinguka sejongosi risina kupingudzwa. Ndidzoserei kwakare ndiite sezvandakanga ndiri nokuti imi ndimi Tenzi, Mwari wangu.

¹⁹Ndinodaro nokuti mushure mokunge ndarasika ndakapinduka, uyewo mushure mokunge ndadzidziswa ndakaombera maoko ndakabatwa nenyadzi ndikadumbirwa nazvo nokuti ndaitenge ndakafumuka nezvandakaita kubvira pauduku hwangu.

²⁰“VokwaEfuremu ava mwanakomana wangu wapamwoyo here chaizvo? Ndiye here mwana wangu wandinodisa? Chinondipa kudaro ndechokuti pose pandinotaura zvokumuyambira ndinenge ndichingomufunga chete. Ndokusaka mwoyo wangu uchimusuwa, ndichatomuitira tsitsi chete, ndizvo zviri kutaura Tenzi.

²¹Zviisirei mucherechedzo mugwara muzvigadzirire zvikwangwani zvokuzotevedza, nyatsofungai mugwagwa mukuru, nzira yamakaenda nayo. Chidzoka nhai mhandara Isiraeri udzokere kumaguta ako iwaya.

²²“Kusvikira rini chaizvo uchingowaya-waya kudai, nhaiwe mwanasikana asina kutendeka? Chavapo ndechokuti Tenzi asika chinhu chitsva panyika chokuti munhukadzi ndiye ava kupfimba[33] munhurume.”

²³Zvanzi naTenzi wehondo nehondo, Mwari weIsiraeri, “Vachamutsiridzazve munyika yokwaJudha nomumaguta ayo pandinenge ndavadzosera makomborero avo, kutaura, chikomborero ichi chokuti: “Tenzi ngaakukomborere iwe musha wokururama iyewe chikomo chinoera!

²⁴Izvozvo nyika yokwaJudha namaguta ayo ose vachagarisana pamwechete navarimi vaya vanopota-pota zvavo namatanga avo ezvipfuwo

²⁵nokuti ini ndichagutsa mweya wakaneta ndichisimbaradza mweya wose wakarukutika.

²⁶“Ndakapepuka ndikaona kuti ihope dzangu dzanga dzichindinakira.

²⁷“Chinzwai, zvanzi naTenzi mazuva ari kuuya andichasima imba yokwaIsiraeri nemba yokwaJudha vanhu nemhuka.

²⁸Zvimwe zvichazoitika ndezvokuti sokuona kwandakaita vachidzipurwa nokupazwa vachikurirwa vachiparadzwa nhamo dzichivawira saizvozvo ndichatoonawo kuti vavakwa nokusimwa, ndizvo zviri kutaura Tenzi.

²⁹Mumazuva iwayo vanhu vacharega kutaura muromo wokuti: “Madzibaba akadya magirepisi anovava, nezvo vana vaita ugugu mumazino.

³⁰“Asi kutoti munhu wose anofanira kufira chitadzo chake, nyakudya magirepisi anovava ndiye ane mazino achaita ugugu.

³¹“Chionai, zvanzi naTenzi mazuva achasvika andichaita chitenderano chitsva nemba yokwaIsiraeri nemba yokwaJudha.

³²Chichange chisina kufanana nechitenderano chiya chandakaita namadzitateguru avo pandakavabata ruoko ndichivaburitsa munyika yeIjipiti, chitenderano changu chavakaputsa kunyange zvazvo ini ndiri ini ndaiva murume wavo, ndizvo zviri kutaura Tenzi.

³³Asi ichi ndochitenderano chandichaita nemba yeIsiraeri mushure memazuva iwayo, ndizvo zvinotaura Tenzi, chokuti: “Ndichauisa mutemo wangu mavari ndichiunyora pamwoyo pavo. Ini ndichava Mwari wavo, ivo vachivawo vanhu vangu.

³⁴Kuchange kusisina zvokudzidzisanazve mumwe nomumwe, hama nehama, munhu achiti, ‘Zivawo Tenzi,’ nokuti vose zvavo vachandiziva kubvira kumuduku-duku kusvikira kumukuru wacho ndizvo zviri kutaura Tenzi nokuti ndichavaregerera uipi hwavo uye chitadzo chavo handichazombochirangarirazve.”

³⁵Zvanzi naTenzi, iye anopa kuti zuva rivhenekere masikati nokurongera mwedzi zvokugara uchiita nenyenyedzi kuvhenekera usiku, iye anobvongodza gungwa zvokuti mafungu atinhire, zita rake ndiYahweh wehondo nehondo.

³⁶Kana urongwa ihwohu hukabva pamberi pangu, ndizvo zviri kutaura Tenzi ndopachozorega zvizvarwa zveIsiraeri kuva rudzi pamberi pangu narini wose.

³⁷Zvanzi naTenzi, “Kana matenga mudenga'mu achigona kuerwa, uye ugaro hwenyika muvhu umu huchigona kuongororwa, iniwo ndopandingarase zvizvarwa zvose zveIsiraeri ndichivarasira twose twavakabata, ndizvo zviri kutaura Tenzi.”

³⁸Chinzwai zvanzi naTenzi, “Mazuva achasvika achavakirwa Tenzi guta iri kubvira paNharire yokwaHananero kusvikira kuSuo Guru repakona.

³⁹Uye tambo yokueresa ichapfuudzwa ipapo yoti tande yakananga kuchikomo cheGarebhu yozotsaukira kuGoa.

⁴⁰Bani rose zvaro rezvitunha namadota uye namakura ose kusvikira kuKakova keKidhironi kudzamara kukona yeSuo Guru raMabhiza tonanga kumabvazuva richava rinoera raTenzi. Harisi kuzofa rakadzipurwa kana kukurirwazve kusvikira narini wose.”