Read Bhaibhiri Idzva rechiShona Jeremiya 32 Bible Online

Jeremiya 32 - Bhaibhiri Idzva rechiShona bible

Jeremiya 32

¹Shoko iri rakauya kuna Jeremiya richibva kuna Tenzi mugore regumi rokutonga kwaZedhekiya mambo wokwaJudha riri gore regumi nechisere rokutonga kwaNebhukadhireza.

²Panguva iyoyo hondo yamambo weBhabhironi yakanga yakakomba Jerusaremu, izvozvo muporofita Jeremiya akanga akapfigirwa munhandare yavachengetedzi vokwamambo yaiva mumuzinda wamambo wokwaJudha.

³Zvakanga zvaitika ndezvokuti, Zedhekiya mambo wokwaJudha akanga amuisa mujeri achiti, “Unoporofitirei uchiti, zvanzi naTenzi regai muone ndava kuisa guta rino mumaoko amambo weBhabhironi uye acharitora?

⁴Zedhekiya uyu mambo wokwaJudha haasi kuzopunyuka mumaoko mavaKaridhea. Asi achatoiswa chete mumaoko mamambo weBhabhironi vagotaurirana vakatarisana chiso nechiso vachionana ziso neziso.

⁵Achaendesa Zedhekiya kuBhabhironi, achagara ikoko kusvikira ndazomushanyira, ndizvo zviri kutaura Tenzi. Kunyange zvazvo muchirwisana navaKaridhea sei, hamusi kuzokurira?”

⁶Jeremiya akati, “Izwi raTenzi rakauya kwandiri rikati

⁷chiona, Hananero mwanakomana wokwaSharumu babamudiki vako, achauya kwauri achiti, ‘Tengai zvenyu munda wangu uri kuAnatoti nokuti mvumo yokuununura muchiutenga ndeyenyu imi.’

⁸“Munun'una wangu Hananero akazouyawo kwandiri ndiri munhandare yevachengetedzi vokwamambo maererano neshoko raTenzi akati kwandiri, ‘Tengai henyu munda wangu uri kuAnatoti munyika yokwaBhenjamini nokuti imi ndimi mune mvumo yokutenga neyokuva mwene wawo. Dai henyu mukautenga!’ Ini ndokubva ndaziva kuti ndoshoko raTenzi riya.”

⁹Ini ndakatenga munda iwoyo kuAnatoti kumunun'una wangu Hananero ndikamuerera mari yacho yamashekeri esirivha gumi namanomwe.

¹⁰Ndakasaina zita rangu patsamba yechibvumirano chacho ndikaidhinda ndikawana zvapupu ndikaera mari iyoyo pazvikero.

¹¹Ndakatora tsamba yakadhindwa iyoyo yechibvumirano chokuutenga yakanga iine mitemo yakawiriranwa nezvaizofanira kutevedzwa zvacho neimwewo tsamba.

¹²Ndakapa tsamba iyoyo yechibvumirano chokuutenga kuna Bharuku mwanakomana waNeriya mwanakomana wokwaMahiseya. Ndakavapa munun'una wangu Hananero aripo, zvapupu zviya zvakanga zvasainwa patsamba yechibvumirano chokuutenga zviripowo. Izvozvo paivawo navaJudha vakanga vachiita dare munhandare yavachengetedzi vokwamambo.

¹³Ndakarayira Bharuku iyoyo aripo kuti,

¹⁴“Zvanzi naTenzi wehondo nehondo, Mwari weIsiraeri, tora tsamba idzi dzose dziri mbiri dzinoti yechibvumirano chokutengeserana yakadhindwa, neimwe tsamba iyi udzirongedze mumudziyo wevhu kuitira kuti dzichengetekemo kwenguva refu

¹⁵nokuti zvanzi naTenzi wehondo nehondo Mwari weIsiraeri: ‘Dzimba namapindu namapindu amagirepisi zvichatengeseranwazve imo munyika muno'mu.’ ”

¹⁶Mushure mokunge ndagamuchidza tsamba yechibvumirano chokutenga ichocho kuna Bharuku mwanakomana wokwaNeriya, ndakanamata kuna Tenzi ndichiti, “Nhai Tenzi Mwari,

¹⁷imimi ndimi makasika matenga napasi nesimba roruoko rwenyu rakakurisa. Hakuna chinokuomerai,

¹⁸imi munoitira mwoyochena zviuru nezviuru muchitsividza mhosva dzamadzibaba kuvana vavo vanouya mushure mavo. Imi ndimi Mwari mukuru mukuru ana masimba ane zita rokuti Tenzi wehondo nehondo,

¹⁹zvamunoronga zvikuru uye mabasa enyu makuru mune meso anoona nzira dzose dzavanhu munowanisa munhu wese mubayiro wezviito zvake maereranowo nezvinobva mukuita kwake.

²⁰Imi makaonesa zviratidzo nezvishamiso munyika yeIjipiti kusvikira pari nhasi muIsiraeri nomukati mavanhu vose zvavo mukazviwanira zita sezvazviri nhasi uno.

²¹Makaburitsa vanhu venyu vaIsiraeri munyika yeIjipiti nezviratidzo nezvishamiso nesimba guru roruoko rwenyu noukuru hwenyu uye nezvinhu zvinodederesa kwazvo.

²²Makazovapa nyika ino yamakatsidza kumadzitateguru avo kuti muchazovapa nyika yakanaka, yomukaka nouchi.

²³Vakapindamo vakaiitawo yavo, asi havana kuteerera izwi renyu kana kutevedza mutemo wenyu. Hapana kana chavakaita pazvinhu zvose zvamakavatemera kuti vaite. Ndokusaka imi makaita kuti nhamo iyi ivawire.

²⁴“Hezvika, zvimudhuri zvinenge musana wenzou zvokukomba nazvo zvazosvikirawo guta rino kuzoritora. Zvino bakatwa neshangwa yenzara nedenda zvakonzera kuti guta rino riiswe mumaoko mavaKaridhea vari kurirwisa. Zvamakareva zvaitika uye kana imi muri kutozviona.

²⁵Zvakadaro zvazvo, imi Tenzi Mwari makanditi, ‘Tenga gura iro nemari uve nezvapupu,’ kunyange zvazvo guta irori ratoiswa mumaoko mavaKaridhea.”

²⁶Izwi raTenzi rakauya kuna Jeremiya rikati,

²⁷“Chinzwa, ndini Tenzi, Mwari wechose chine mweya wokufema, pane chinhu chingabva chanyatsondiomera here?

²⁸Naizvozvo zvanzi naTenzi, chiona, ndava kuisa guta rino mumaoko mavaKaridhea nomumaoko maNebhukadhireza mambo weBhabhironi, iye acharitora.

²⁹VaKaridhea vari kurwisa guta rino vachauya vagotungidza guta rino nomoto varipise pamwechete nedzimba dzine pamatenga paipisirwa rusenzi kuna Bhaari pachiteurwa mipiro yezvokunwa kuna vamwe vamwari kuti vandishatirise.

³⁰Chandinodariro ndechokuti vanhu vokwaIsiraeri nevokwaJudha hapana chimwe chavakaita kusara kwouipi chete mumaziso mangu kubvira pauduku hwavo. Vanhu vokwaIsiraeri hakuna chimwe chavakaita kusara kwokungondishatirisa chete netwavanobata namaoko avo, ndizvo zviri kutaura Tenzi.

³¹Guta rino rakanditsamwisa rikandishatirisa kubvira musi warakavakwa kusvikira pari nhasi, zvokuti handichadi kuriona mumaziso mangu

³²raparirwa nouipi hwavanhu vokwaIsiraeri navanhu vokwaJudha hwavakaitira kuti vandishatirise, ivo namadzimambo avo namachinda avo navapristi vavo uye navaporofita vavo, vanhu vokwaJudha navagari veJerusaremu.

³³Vakatondipa gotsi vachirega kunditarisa uye kunyange zvazvo ndakaramba ndichivadzidzisa, ivo havana kana kumboteerera kuti vagamuchire zvavaiudzwa.

³⁴Vakatogadziki zvavo zvandisingade mumba inodaidzwa nezita rangu, kuin'oresa.

³⁵Vakavakira Bhaari nzvimbo dzakatunhumara dzokuteurira mubani romwanakomana wokwaHinomu pokupira vanakomana vavo navanasikana vavo sezvibayiro kuna Moreki, kunyange zvazvo ini ndisina kuvatuma uye hazvina kana kumbouya mumwoyo mangu kuti vazoita chinhu chandisingade ichi vachipinza vokwaJudha muchitadzo.

³⁶“Zvino ndokusaka zvava kunzi naTenzi, Mwari weIsiraeri, maererano neguta irori iri rawati, ‘Ratoiswa mumaoko mamambo weBhabhironi nebakatwa neshangwa yenzara nedenda:’

³⁷Chinzwa, ndichavakokorodza kunyika dzose kwandakavadzingira ndakatsamwa ndakashatirwa ndakapaka nehasha zvikuru kwazvo. Ndichavadzorera kunzvimbo ino vachizogara vakachengeteka.

³⁸Vachava vanhu vangu, ini ndichivawo Mwari wavo.

³⁹Ndichavapa mwoyo mumwechete nenzira imwechete kuitira kuti vagonditya narini wose kuti zvivanakire ivo zvichizonakirawo vana vavo vachauya mushure mavo.

⁴⁰Ndichaita chitenderano navo chokugara narini wose chokuti handizomborega kuvaitira zvakanaka. Uye ndichaisa mumwoyo mavo mweya wokunditya kuti varege kuzondifuratira.

⁴¹Ndichafarira kuti ndivaitire zvakanaka uye ndichavasima munyika muno nokutendeka ndichizviita nomwoyo wangu wose nomweya wangu wose.

⁴²“Chikonzero ndechokuti, zvanzi naTenzi, sezvandakangoita kupinza nhamo vanhu ava ndozvandichangoitawo, ndava kuvawanisa zvakanaka zvose zvandakavavimbisa.

⁴³Minda ichatengwa munyika iyo ino iyi yauri kuti yava renje risisina munhu kana mhuka yatoiswa mumaoko mavaKaridhea.

⁴⁴Minda ichatengwa nemari pachisainiranwa zvibvumirano zvichidhindwa zvine umbowo munyika ino iyi yokwaBhenjamini munzvimbo dzomunharaunda meJerusaremu nomumaguta okwaJudha nomumaguta okunyika yemakomo uye nomumaguta okunyika yokumanhika kuShefera uyewo nomumaguta okuNegevhu nokuti ndichavadzosera makomborero avo, ndizvo zviri kutaura Tenzi.”