Read Bhaibhiri Idzva rechiShona Jeremiya 33 Bible Online

Jeremiya 33 - Bhaibhiri Idzva rechiShona bible

Jeremiya 33

¹Shoko raTenzi rakauya kuna Jeremiya kechipiri paakanga achakapfigirwa munhandare yavachengetedzi vokwamambo

²rikati, zvanzi naTenzi, iye akasika nyika akaiumba akaisimbisa, zita rake ndiYahweh, anoti,

³“Daidzirai kwandiri ndinokupindurai ndichikuudzai zvinhu zvikuru zvakavanzika zvamusati mamboziva.

⁴Ndinodaro nokuti zvanzi naTenzi, Mwari weIsiraeri nezvedzimba dzeguta rino uye nezvemizinda yamadzimambo okwaJudha zvakapazirwa kuti pavakwe zvokuzvidzivirira nazvo kuhondo yezvimidhuri zvinenge musana wenzou nokubakatwa,

⁵vaKaridhea vari kuuya muno kuzorwisa nokudzizadza nezvitunha zvavanhu vandicharakatisa ndakatsamwa ndakashatirwa. Chandinodariro ndechokuti guta rino ndakatorifuratira pamusana pouipi hwavo vose.

⁶Chionai, ndichariwanisa utano nokuriporesa uye ndichavarapa ndichivaonesa kubudirira chaiko kwakanyanya nokuchengetedzeka.

⁷Ndichachinja utapwa hwevokwaJudha noutapwa hwevokwaIsiraeri, ndichavavaka kuti vaite sezvavaiva pakutanga.

⁸Ndichavachenura kuuipi hwavo hwose hwavakanditadzira nahwo ndigovaregerera uipi hwavo hwose hwavakanditadzira nahwo nokundipandukira kwavo.

⁹Jerusaremu ichandiwanisa zita rinopembererwa nokurumbidzwa nembiri kumarudzi ose apasi pano achanzwa zvakanaka zvose zvandinovaitira. Vachatya vakadedereswa nezvakanaka zvacho zvose izvozvo uye pamusana pokubudirira kwandichaiwanisa.”

¹⁰Zvanzi naTenzi, munzvimbo ino iyi yaunoti, “Yava dongo risina munhu kana mhuka, imo mumaguta okwaJudha nomumigwagwa yeJerusaremu zvaparara izvi zvisisina munhu ageremo kana mhuka, muchatozonzwikazve

¹¹chikwe-e chokuseka nemheremhere yokufara neyokupemberera mwenga nokufarira murume wacho nomumhanzi wevanoimba vachiuya nemipiro yokutenda kumba yaTenzi vachiti: “Tendai Tenzi wehondo nehondo nokuti Tenzi akanaka nokuti mwoyochena wake hauperi! Ndinodaro nokuti ndichachinja utapwa hwenyika iyoyi igova sapakutanga, ndizvo zviri kutaura Tenzi.”

¹²Zvanzi naTenzi wehondo nehondo, “Munzvimbo ino iyoyi yava dongo risisina munhu kana mhuka nomumaguta ayo ose, muchavazve nemisasa yavafudzi vachizorodza zvavo matanga avo.

¹³Mumaguta omunyika yamakomo nomumaguta okunyika yokunhika kuShefera uye nomumaguta okuNegevhu nokunyika yokwaBhenjamini munzvimbo dzose dzomunharaunda meJerusaremu nomumaguta okwaJudha, matanga ezvipfuwo achapfuura zvakare napasi poruoko rweanoaverenga ndizvo zviri kutaura Tenzi.

¹⁴“Chinzwai, zvanzi naTenzi, mazuva ari kuuya andichazadzisa nawo zvandakavimbisa imba yokwaIsiraeri nemba yokwaJudha.

¹⁵Mumazuva iwayo uye panguva iyoyo, ndichaita kuti rimwe Bukira rakarurama ritunge kuitira Dhavhidhi. Iye achazotonga zvine ruenzaniso nokururama munyika iyoyi.

¹⁶Namazuva iwayo nyika yokwaJudha ichaponeswa, Jerusaremu igonyatsogarika. Izvozvo zita raichazenge yava kudaidzwa naro nderiri rokuti: ‘Tenzisakururamakwedu.’

¹⁷Chinodariso ndechokuti zvanzi naTenzi, Dhavhidhi haasi kuzomboshaya murume wokwake wokugara pachigaro choumambo hweIsiraeri

¹⁸uye vapristi vechiRevhi havazombofa vashayawo mumwe wokwavo wokupira pandiri mipiro yokupisa uye kupisa mipiro youpfu hwembesanwa nokuita zvibayiro narini wose.”

¹⁹Shoko raTenzi rakauya kuna Jeremiya rikati,

²⁰“Zvanzi naTenzi, kana mukagona kutyora chitenderano changu chandakaitirana nesiku kana chitenderano changu chandakaitirana nesikati zvokuti masikati kana usiku zvibva zvarega kuuya nenguva yazvo yazvakatemerwa,

²¹kana zvadaro chitenderano changu naDhavhidhi chingatyorwewo zvacho zvokuti haazombofa akava nemwanakomana angazogara pachigaro choumambo hwokwake ndizvo zvimwechetezvo nechitenderano changu navapristi vechiRevhi vashumiri vangu.

²²Sezvakangoita gurusvusvu rezvinhu zvomudenga risina angariverenge uye jecha regungwa risingapimiki, izvozvo ndozvandichangoita kuti zvizvarwa zvokwaDhavhidhi muranda wangu zviwande navapristi vechiRevhi vanoshumira kwandiri.”

²³Shoko raTenzi rakauya kuna Jeremiya richiti,

²⁴“Zviri kutaura vanhu ava hauna kumbozviongororawo here zvokuti, Tenzi akaramba mhuri mbiri dzaakanga asarudza? Ipapo vanozvidza vanhu vangu zvokuti, kutaura kuno, vava kutovaona sorudzi pasina.

²⁵Zvanzi naTenzi, dai ndakanga ndisina kunge ndakaitirana chitenderano nesiku kana nesikati nezvirongwa zvedenga napasi

²⁶ndingadaiwo ndaizoramba zvizvarwa zvokwaJakobho nezvokwaDhavhidhi muranda wangu ndichibva ndarega kuzvisarudzira kana nomumwe zvake wechizvarwa chokwake wokuzotonga vembeu yokwaAbhurahamu naIsaki naJakobho nokuti ndichachinja utapwa hwavo ndichavanzwirawo ngoni.”