Read Bhaibhiri Idzva rechiShona Jeremiya 36 Bible Online

Jeremiya 36 - Bhaibhiri Idzva rechiShona bible

Jeremiya 36

¹Mugore rechina[34] rokutonga kwaJehoyakimu mwanakomana waJosiya mambo wokwaJudha, shoko iri rakauya kuna Jeremiya richibva kuna Tenzi richiti,

²“Tora bhuku rokumononora unyore mariri mashoko ose andakakutaurira akanangana nenyika yokwaIsiraeri neyokwaJudha namarudzi ose kubvira musi wandakataura kwauri, kubvira mumazuva aJosiya kusvikira nhasi uno.

³Zvimwe vemba yokwaJudha vanganzwe zvakaipa zvose zvandiri kufunga kuvapinza mazviri zvikaita kuti munhu wose asiyane nenzira yake yakaipa kuti ndivaregerere uipi hwavo nechitadzo chavo.”

⁴Ipapo Jeremiya akadaidza Bharuku mwanakomana waNeriya. Bharuku akazonyora mubhuku rokumononora, mazwi achibva mumuromo maJeremiya, mazwi ose aakanga ataurirwa naTenzi.

⁵Jeremiya akarongera Bharuku kuti, “Ini handichabvumirwi kutsika kumba yaTenzi.

⁶Saka iwe unofanira kuendako uri musi wokutsanya. Vanhu vose vachizvinzwira kudaro, mumba yaTenzi imomo, unofanira kuverenga mazwi aTenzi mubhuku rokumononora iri rawanyora zvandakutaurira. Unofanira kuaverengerawo vanhu vose vokwaJudha vanenge vabva kumaguta kwavo vazvinzwire.

⁷Minyengetero yavo pamwe ingasvike pana Tenzi uyewo kuti munhu wose angabva asiyana nenzira yake yakaipa nokuti Tenzi akataura akatsamwa akashatirwa zvakaipisisa kwazvo nezvavanhu ivava ava.”

⁸Saizvozvowo Bharuku mwanakomana waNeriya akaita zvose zvaakanzi nomuporofita Jeremiya aite zvokundoverengera mazwi aTenzi omubhuku iroro mumba yaTenzi.

⁹Mugore rechishanu rokutonga kwaJoyakimu, mwanakomana waJosiya mambo wokwaJudha, mumwedzi wechipfumamwe, vanhu vose vomuJerusaremu pamwechete navanhu vakanga vabva kumaguta okwaJudha vakauya kuJerusaremu vakazvitemera zuva rokutsanya pana Tenzi.

¹⁰Ipapo, vanhu vose vachizvinzwira, Bharuku akabva averenga mazwi aJeremiya aya mubhuku riya mumba yaTenzi mune imwe imba yaGemariya mwanakomana waShafani munyori wapadare yakanga iri nechokumusoro kwenhandare kwaipindwa nako kuSuo Guru Idzva remba yaTenzi.

¹¹Mikaya mwanakomana waGemariya mwanakomana wokwaShafani paakanzwa mashoko ose aTenzi achiverengwa mubhuku iroro,

¹²akadzika kumuzinda wamambo akasvikopinda mumba yomunyori. Izvozvo machinda ose akanga ageremo. Paiti munyori Erishama, pouya Dheraya mwanakomana wokwaShemaya tevere Erinatani mwanakomana wokwaAkibhori, uyewo Gemariya mwanakomana wokwaShafani, kozoti Zedhekiya mwanakomana waHananiya namachinda ose.

¹³Mikaya akavarondedzera mazwi ose aakanga anzwa paiverenga Bharuku bhuku riya vanhu vachizvinzwira.

¹⁴Machinda ose ndopaakatuma Jehudhi mwanakomana waNetaniya mwanakomana waSheremiya mwanakomana waKushi neshoko kuna Bharuku rokuti zvanzi, “Tora mumaoko mako bhuku rokumononora rawaverengera vanhu vachinzwa uuye.” Saizvozvo Bharuku mwanakomana waNeriya akatora mumaoko bhuku racho rokumononora ndokuenda kwavari.

¹⁵Ivo vakamuti, “Gara pasi uri verenge.” Bharuku akavaverengera bhuku iroro.

¹⁶Vakatarisana vava kutya vakabva vati kuna Bharuku, “Tinofanira kundonyatsopira mashoko aya kuna mambo nezvinhu zvose zvarehwa izvozvi.”

¹⁷Vakabvunza Bharuku voti, “Tiudze. Zvakambouya sei chaizvo kuti iwe uzonyora mazwi ose iwaya?

¹⁸Zvaibva mumuromo make here izvi?” Bharuku ndokupindura achiti, “Akaita zvokunditaurira mazwi ose iwaya ini ndichinyora neingi mubhuku rokumononora irori.”

¹⁹Machinda iwayo akabva aruma nzeve Bharuku oti, “Chiendai mundohwanda, iwe naJeremiya parege kuva kana nomumwe anoziva kwamuri.”

²⁰Saizvozvowo vakaenda mudare kuna mambo vasiya vaisa bhuku rokumononora riya mumba yomunyori Erishama, vakapira kuna mambo mashoko ose iwayo.

²¹Mambo akabva atuma Jehudhi kundotora bhuku iroro rokumononora akandoritora mumba yomunyori Erishama muya, Jehudhi akariverengera mambo namachinda ose anokuta mambo.

²²Iwoyo wakanga uri mwedzi wechipfumbamwe, mambo agere hake mumba yake yenguva yechando. Izvozvo paiva nomoto wairirima muchoto iye achigota moto hake.

²³Jehudhi aingoti akati verengei zvikamu zvaro zvitatu kana zvina, mambo aibva agwishura zvikamu izvozvo nekapanga obva azviti chi-i mumoto mumbaura kudzamarara bhuku rokumononora rose rapera kutsva nomoto waiva mumbaura.

²⁴Zvakadaro zvazvo pakati pamambo namakurukota ake akanga anzwa mashoko iwaya ose hapana kana nomumwe wavo akatya kana kubvarura hanzu dzavo neshungu.

²⁵Kunyangewo Erinatani naDheraya naGemariya pavaiteterera kuna mambo kuti arege kupisa bhuku rokumononora iroro, mambo haana kumbovateerera.

²⁶Asi mambo akatoudza Jerahimieri, mwanakomana wamambo naSeraya mwanakomana wokwaAzirieri uyewo Sheremiya mwanakomana waAbhudhieri kuti vabate Bharuku munyori nomuporofita Jeremiya, asi Tenzi akavahwandisa.

²⁷Zvino mushure mokunge mambo apisa bhuku rokumononora riya ramazwi akanyorwa naBharuku achibva mumuromo maJeremiya, shoko raTenzi rakauya kuna Jeremiya rikati,

²⁸“Tora rimwe bhuku rokumononora unyore mariri mazwi ose aya aiva mubhuku rokumononora rokutanga riya rakapiswa naJehoyakimu mambo wokwaJudha.

²⁹Zvaunofanira kunyora zvichinangana naJehoyakimu mambo wokwaJudha ndezvizvi zvokuti, ‘Zvanzi naTenzi, handiti wapisaka iwe bhuku rokumononora iri’ uchiti, ‘Wakanyorerei mariri kuti mambo weBhabhironi achauya chete kuzoparadza nyika ino achitsakatisa mairi vanhu nemhuka?’

³⁰Naizvozvo Tenzi ari kutaura nezvaJehoyakimu mambo wokwaJudha kuti haazofa akawana wokwake anozogara pachigaro choumambo hwokwaDhavhidhi uye chitunha chake chichakandwa panze chitsve nezuva masikati usiku chichitonhorwa nechando.

³¹Ndichamuranga iye nezvizvarwa zvake navaranda vake ndichivarangira uipi hwavo. Ndichaunzira vanhu ava navagari vomuJerusaremu navanhu vokwaJudha zvakaipa zvose zviya zvandakati zvivawire asi ivo havana kuteerera.”

³²Jeremiya akatorawo rimwe bhuku rokumononora akaripa kunyanzvi yomutemo, Bharuku mwanakomana waNeriya akabva anyora mariri mazwi ose aibva mumuromo maJeremiya, mashoko ose omubhuku riya rakanga rapiswa mumoto naJehoyakimu mambo wokwaJudha achiisawo mamwe mazwi akawanda akaita saiwawo.