Read Bhaibhiri Idzva rechiShona Jeremiya 37 Bible Online

Jeremiya 37 - Bhaibhiri Idzva rechiShona bible

Jeremiya 37

¹Zedhekiya mwanakomana waJosiya akanga aitwa mambo munyika yokwaJudha naNebhukadhireza mambo weBhabhironi akatonga panzvimbo paKoniya mwanakomana waJehoyakimu.

²Asi iye kana makurukota ake navanhu venyika havana kuteerera zvakataurwa naTenzi nomuromo womuporofita Jeremiya.

³Mambo Zedhekiya akatuma Jehukaru mwanakomana waSheremiya nomupristi Zefaniya mwanakomana waMaaseya kumuporofita Jeremiya neshoko rokuti, “Tinamatirewo kuna Tenzi, Mwari wedu.”

⁴Izvozvo Jeremiya akanga achiri kufamba fambawo zvake mukati mavanhu nokuti akanga asati aiswa mujeri.

⁵Hondo yaFarao yakanga yabuda kuIjipiti, izvovo pazvakasvika munzeve dzavaKaridhea vaiva vakatokomba Jerusaremu vakabva vabva paJerusaremu.

⁶Izwi raTenzi rakauya kuna Jeremiya muporofita richiti,

⁷“Zvanzi naTenzi, Mwari weIsiraeri heinoi mhinduro yokundopa mambo wokwaJudha akakutumai kuzonzwa kuti ini ndinoti kudii. Ndinoti, chinzwai, iyo hondo yaFarao yakauya kuzokubatsirai yava kutoda kudzokera kuIjipiti kunyika kwayo.

⁸Zvino vaKaridhea vachadzokazve vozorwisa guta rino, vacharitora vagoriroromesa nomoto.

⁹Zvanzi naTenzi musazvifurire henyu muchizviti, ‘VaKaridhea havachambofa vakatsika kwatiri kuno,’ nokuti havasi kuzorega kuuya kuno.

¹⁰Ndinodaro nokuti kunyange mukakurira hondo yose yavaKaridhea vari kukurwisai, zvokungosara kwavari ikoko varwi vakakuvadzwa chete, vari mumatendhe avo, ivavo vaitomuka, vagopisa guta rino nomoto.”

¹¹Zvino hondo yavaKaridhea zvayakanga yabva Jerusaremu kudaro nokuuya kwakanga kuchiita hondo yaFarao,

¹²Jeremiya akasimuka muJerusaremu oenda kunyika yokwaBhenjamini, kundogoverwa nhaka yake pakati pavanhu.

¹³Paakasvika paSuo Guru rokwaBhenjamini mumwe mugariri wepo ainzi Iriya mwanakomana waSheremiya mwanakomana waHananiya, akabata muporofita Jeremiya achiti, “Kutizira kuvaKaridhea kwawava kuitaka iwe!”

¹⁴Jeremiya ndokuti, “Handizvo! Handisi kutizira kuvaKaridhea ini!” Asi Iriya haana kumbomuteerera, akabata Jeremiya akamuunza kumachinda.

¹⁵Machinda akabva apengera Jeremiya nehasha, vakamurova vakamuisa mujeri mumba yomunyori, Jonatani nokuti yakanga yaitwa jeri.

¹⁶Jeremiya paakanga aiswa mujeri rapasi, agaramo mazuva mazhinji,

¹⁷mambo Zedhekiya akatuma vanhu kundomutora ndokubva amugamuchira. Mambo akamubvunza muchivande mumuzinda make kuti, “Pane shoko rabva kuna Tenzi here?” Jeremiya akati, “Hongu riripo.” Akabva ati, “Imimi muchaiswa mumaoko amambo weBhabhironi.”

¹⁸Jeremiya akatizve kuna mambo Zedhekiya, “Chii chaizvo chandakakutadzirai imi namakurukota enyu navanhu ava chakakonzera kuti mundiise mujeri?

¹⁹Varipiko zvino vaporofita venyu vaya vaikutaurira vachiti, ‘Mambo weBhabhironi haasi kuzokurwisai kana kuzorwisa nyika ino?’

²⁰Zvino chinzwai imi changamire wangu, mambo! Ndateterera hangu donzwaiwo chichemo changu murege kundidzosera kumba kwaJonatani, munyori uya, ndingadaro ndikafirako.”

²¹Nokudaro mambo Zedhekiya akatema zvaifanira kuitwa, vanhu vakabva vachengetera Jeremiya munhandare yevachengetedzi vokwamambo. Izvozvo Jeremiya akanga ava kupiwa chingwa chimwechete pazuva chichibva kumugwagwa weguta wainzi Wavabiki Vechingwa kusvikira chingwa chose chomuguta chapera. Saizvozvo Jeremiya akaramba ari munhandare yavachengetedzi vokwamambo.