Read Bhaibhiri Idzva rechiShona Jeremiya 4 Bible Online

Jeremiya 4 - Bhaibhiri Idzva rechiShona bible

Jeremiya 4

¹Zvanzi naTenzi “Iwe Isiraeri kana wafunga zvokudzoka, kwandiri ndokwaunofanira kudzokera. Kana ukabvisa pandiri pangu zvinondisemesa izvi usingaite mwoyo miviri

²uye kana ukapika uchiti, ‘NaTenzi chaiye mupenyu’ uchipika pachokwadi zviri pamwero chaipo zviri mukururama, ndudzi dzavanhu ndopadzichazviwanira zvikomborero pamusana pako; vachiwana mbiri pamusana pako.”

³Nokuti zvanzi naTenzi kuvanhu vokwaJudha nokuvagari veJerusaremu, “Rimai minda yenyu yakasaruka murege kudyara muminzwa.

⁴Zvidzingisirei Tenzi imi vanhu vokwaJudha nemi vagari veJerusaremu. Pakudzingiswa ikoko, chinobviswa chacho, ngachibviswe mumwoyo menyu, ndingadaro ndikakuvirukirai nehasha kunge moto unopisa usina ani angaudzimure pamusana pezvakaipa zvamunoita.”

⁵Paridzai maJudha'mu muzivise muJerusaremu muti, “Ridzai mabhosvo nomunyika mose mudaidzire kwazvo muchiti, ‘Unganai tiende tindopinda mumaguta etsvingo!’

⁶Simudzai mureza munange kuZioni tizai mundopotera, regai kugara, nokuti ndiri kuunza nhamo inobva kuchamhembe nokuparadza kwakakura kwazvo.

⁷Shumba yabuda mumajokochwa mayo; muparadzi wamarudzi avanhu abuda, asimuka achibva kwake, kuzoparadza nyika yako, maguta ako achava matongo, asisina anogaramo.

⁸Ipapo iwe chipfeka masaga uungudze ucheme nokuti Tenzi haana kurega kutivirukira kwazvo nehasha.”

⁹Zvanzi naTenzi, “Nomusi iwoyo, mambo namachinda vose zvavo vachapererwa nechivindi, vapristi vachadumbirwa nazvo vaporofitawo zvichivaomesa mate mukanwa.”

¹⁰Ini ndokuteterera ndichiti, “Ho baba iwe, nhai Tenzi Mwari, inga marega vanhu ava neJerusaremu iyi vachinyatsonyengedzwa vachinzi, ‘Zvichakunakirai,’ ihwo upenyu hwavo hwatova parumano nehondo yebakatwa.”

¹¹Panguva iyoyo zvichazonzi kuvanhu ivava uye kuJerusaremu, heyo mhepo inopisa inobva kumatunhu akatunhumara kugwenga ichivinga mwanasikana iyeyu, vanhu vangu kwete mhepo yokuurutsisa kana kuchenesa,

¹²mhepo ine simba kwazvo kwazvo yandinotuma ini. Iye zvino izvi ndini ndava kuvatemera chirango.

¹³Tarira uone, vouya samakore, hedzo ngoro dzake dzehondo sechamupupuri mabhiza ake, anomhanya anosara pasi. Tawira iwe, taparara!

¹⁴Iwe Jerusaremu shamba zvakaipa zvemwoyo wako kuti uponeswewo. Kusvikira rini chaizvo pfungwa dzouipi idzi dzakagara mauri?

¹⁵Nokuti kwaDhani kwabva shoko riri kuparidza, riri kuparidza nhamo iri kubva kuGomo rokwaEfuremu.

¹⁶Yambira marudzi avanhu kuti ava kuuya, muzivise Jerusaremu kuti, kuri kuuyiwa navakombi vamaguta vanobva kunyika iri kure. Vari kudaidzira kumaguta okwaJudha.

¹⁷Tenzi ari kuti vakomberana Judha savanhu vanochengetedza munda nokuti akandipandukira.

¹⁸Nzira dzako namaitiro ako ndozvakupfukira, ndokupera kwako ikoku. Zvinorwadza zvakusvika pamwoyo chaipo.

¹⁹Maiwe, maiwe, ndinobinduka nokurwadziwa, mwoyo wangu maiwe, mwoyo wangu uri kurova zvakanyanya. Handikwanisi kunyarara nokuti ndiri kunzwa kurira kwamabhosvo, iri yambiro yehondo.

²⁰Nhamo dzavirikidzana zvakaomarara, nyika yose yaparadzwa, misasa yangu yematendhe yangoerekana yaparara machira angu okudzikatirisa aparara nenguva isipi.

²¹Kusvikira riniko ndichingoona mureza uyu ndichingonzwa kurira kwamabhosvo

²²nokuti, “Vanhu vangu mazungairwa, ini handivazivi, mazirema evana, havanzwisisi. Vanochamirira kuita zvakaipa asi kuita zvakanaka havamboziva.”

²³Ndakatarisa panyika, ndikaona paparara, pasisina chiripo. Ndakatarisa kudenga, ndikaona kusina chiedza

²⁴Ndakatarisa makomo, ndikaona achindengendeka, zvikomo zvose zvichivheya uko nokoko.

²⁵Ndakatarisa ndikaona pasina kana munhu, kunyange shiri dzose dzedenga dzakanga dzatiza.

²⁶Ndakatarisa, onei, nyika yaibereka zvibereko zvayo yangove gwenga, maguta ayo ose angove matongo pamberi paTenzi uye nehasha dzake.

²⁷Ndinodaro nokuti zvanzi naTenzi, nyika yose ichaparara, asi handisi kuzoiparadza zvachose.

²⁸Nyika ichachema nokuda kwaizvozvo, denga kumusoro uko, richasviba nokuti ndizvo zvandatema, ndozvandada. Handimboteti kana kudzokera shure.

²⁹Pavanongonzwa mutsindo wamabhiza neyevemiseve, guta rose, munhu anobva angoti gumbo ndibereke, zvobva zvongoti runopinda mumajokochwa norunokwira mumatombo, maguta ose anosara angova maguta chete asina munhu anogaramo.

³⁰Zvino iwe Mushayavanhu, chaunobangopfekera hanzu tsvuku chii? Zvaunobva watozviti memete nezvishongo zvendarama kudai uye kutokudza-kudza meso ako nependi. Chaunozvishongedzera chaizvo hapana, zvikomba zvako izvozvo zvinokuzvidza. Chavanenge vachitotsvaga kukuuraya

³¹nokuti ndakanzwa kuchema kunenge kwomukadzi arwadzwa napamuviri kurwadzwa sokwemukadzi ari pakusununguka mwana wokutanga. Mhere yeJerusaremu, mukunda weZioni achitofemuruka achitambanudza maoko ake achiti, “Maiwe zvangu! Ndava kutofizuka zvangu pameso pemhondi.”