Read Bhaibhiri Idzva rechiShona Jeremiya 45 Bible Online

Jeremiya 45 - Bhaibhiri Idzva rechiShona bible

Jeremiya 45

¹Shoko romuporofita Jeremiya raakataurira Bharuku mwanakomana waNeriya paakanyora mashoko aya mubhuku achiaudzwa naJeremiya mugore rechina rokutonga kwaJehoyakimu mwanakomana waJosiya mambo wokwaJudha,

²achiti, “Zvanzi naTenzi, Mwari waIsiraeri, kwauri iwe Bharuku:

³wakati iwe, ‘Ndine nhamo ini nokuti Tenzi akawedzera kusuwa pakurwadziwa kwangu. Ndaneta nokugomera kwangu, handiwani zororo.’

⁴Saka taura izvozvo kwaari uchiti, Zvanzi naTenzi, Chinzwa, zvandakavaka zviya ndava kuzozvipaza uye zvandakasima ndava kuzozvidzura zvichireva nyika yose.

⁵Imi munozvitsvakira zvinhu zvikuru here? Regai kuzvitsvaka nokuti chionai, ndava kuzounza nhamo kuzvisikwa zvose, ndizvo zviri kutaura Tenzi. Asi iwe ndichaita kuti upunyuke noupenyu hwako.”