Read Bhaibhiri Idzva rechiShona Jeremiya 48 Bible Online

Jeremiya 48 - Bhaibhiri Idzva rechiShona bible

Jeremiya 48

¹Zvanzi naTenzi wehondo nehondo, Mwari weIsiraeri nezveMoabhu, “Zvazoriwana guta reNebho nokuti raparara, Kiriyataimu yanyadziswa, yatorwa, guta remasvingo rafumurwa rapazwa.

²Mbiri yeMoabhu hapasisina muguta reHeshibhoni imomo vakarirongera bangano rakaipa rokuti, ‘Uyai tiritsakatise sorudzi.’ Nairowo guta reMadhimeni richaitwa kuti riti zirikiti kunyarara, bakatwa richakuronda.

³“Heyo mhere yarira kuHoronaimu! Hero dongo zvaro, raparara zvokuparara zviya!

⁴Moabhu yaparara, heyo mhere yepwere dzacho[45]

⁵nokuti vanokwira mukwidza wokuRuhiti iri mhere chete kuhwihwidza nokuti pamateru okuHoronaimu heyo mhere yenhamo yokuparadzwa.

⁶“Tizai muzviponese. Itai sedhongi romusango murenje,

⁷pari pamusana pokuti makavimbaka imi namabasa enyu noupfumi hwenyu, newewo uchatotorwa iye mwari wenyu Kemoshi achaendwa naye kuutapwa, pamwechete navapristi vake namachinda ake.

⁸“Mharadzi ichasvika mumaguta ose pasina kana guta rinopapunyuka, nhika[46] ichaparara bani richiparadzwa sokureva kwakaita Tenzi.

⁹Ipa Moabhu mapapiro kuti abhururuke, maguta ayo achava matongo asina munhu ageremo.”

¹⁰Ngaawirwe norushambwa munhu asingaite basa raTenzi nomwoyo wose. Ngaawirwe norushambwa munhu anochengeta zvake bakatwa asingadeure ropa naro.

¹¹Moabhu yakagarika kubvira paupwere hwayo uye igere zvayo kudivi ramakomo kusina mhepo. Haina kana kumbokwengurwa zvayo, chirongo nechirongo kana kutomboendeswa muutapwa. Saka mukanwa mayo muchakangodaro kunhuwirira kwayo hakusatiwo kwasanduka.

¹²“Naizvozvo, zvanzi naTenzi chinzwai, ‘Mazuva ari kuuya andichaitumidzira vadeuri vachamurereka vagokwengura midziyo yayo vachipwanya-pwanya zvirongo zvayo.’

¹³Ipapo Moabhu ichanyara namwari wayo, Kemoshi, sokunyara kwakaita imba yeIsiraeri neBhetieri chivimbo chayo.

¹⁴“Chamungabangotaurirawo muchizviti, ‘Tiri magamba chaiwo chii, nemvumba chaidzo dzokurwa hondo,’

¹⁵Mharadzi dzeMoabhu namaguta ayo vakwidza kuno uku. Majaya ayo, ano chaiwo, akasvika achiti zvino rororo kufa. Ndizvo zviri kutaura Mambo ane zita rokuti Tenzi wehondo nehondo.

¹⁶Nyatwa yeMoabhu yasvika nhamo yayo iri kumhanya kuuya.

¹⁷Ichemei imi mose muri munharaunda yayo yakaitenderera nemi mose munoiziva nezita. Itii: ‘Zvauya sei chokwadi kuti tsvimbo huru youmambo ityoke, mudonzvo wacho wembiri.’

¹⁸Jitika pambiri yako apo ugarewo pasi pakati kukutu kuoma, iwe mugari weDhibhoni nokuti mharadzi yeMoabhu yakuvinga ikaparadza nzvimbo dzoko dzokuhwanda muhondo.

¹⁹Mira panzira utarise iwe mugari wokuAroero ubvunze mutizi nomupunyuki kuti, ‘Zvaita sei?’

²⁰Moabhu yanyadziswa nokuti yaputsika, hwihwidzai muchichema! Udza vanhu muna Arinoni kuti, Moabhu yaparara.

²¹“Yasvika nguva yokutongwa kwenyika yomuzanda wakasandarika neHoroni neJahiza neMefaati

²²neDhibhoni neNebho neBhetidhibhuratimu

²³neKiriyataimu neBhetigamuri neBhetimeoni

²⁴neKiriati neBhozira namaguta ose enyika yeMoabhu okure neepedyo.

²⁵Umambo hwekwaMoabhu hwaparara, simba reMoabhu rakaparara. Ndizvo zviri kutaura Tenzi.”

²⁶“Muraradzisei nokuti azvitutumadza kwazvo pana Tenzi muite kuti Moabhu isare yava kuumburuka mumarutsi ayo iyowo ive chiseko chenyika.

²⁷Handiti Isiraeri yanga iri chiseko chako iwe Moabhu. Iyo Isiraeri yakambowanikwa iri pakati pembavha here, zvaunobva wati paunongotaura nezvayo unobva wadzungudza musoro kudaro?

²⁸“Tamai mumaguta mundogara mubako, imi vagari veMoabhu. Itai hwenjiva inovaka dendere mumativi memipata yamakomo.

²⁹Guhu rokuzvikudza kweMoabhu takarinzwa, kuzvikudza kukuru kwazvo nokuzvitutumadza kwayo nokuzvizuwidza kwayo nokuzvidadisa kwayo nomwoyo wayo wokuzvinyundumadza.

³⁰“Ndinoziva unhunzvatunzva hwayo, kuzvikudza kwayo hakuna zviripo zviito zvayo hazvina maturo. Ndizvo zviri kutaura Tenzi.

³¹Ndokusaka ndichihwihwidza kuchema Moabhu, ndinobongomora mhere kuchema Moabhu yose, ndinochema vanhu vokuKiriheresi.

³²“Iwe mugirepisi weSibhuma, ndinokuchema kupinda gungwa reJazeru! Mapazi ako anotandira napamusoro pegungwa kusvikira nokuJazeru. Michero yako yapazhizha nezvinobva mumunda wamagiresi zvawirwa nomuparadzi.

³³“Rufaro nokupembera zvabviswa munyika inobereka zvakawanda, nyika yeMoabhu. Ndakaita kuti waini ipwe muzvisviniro zvewaini. Hapana achambokanya magirepisi nenziyo dzokufara, kudaidzira kwaro hakusisiri kwokufara.

³⁴“Maguta Heshibhoni neEreare aridza mhere nokuJahazi kwose vadudza nezwi ravo kubvira kuZoari kusvikira kuHoronaimu nokuEgiratishereishiya. Chiripo ndechokuti mvura yokuNimurimu yaperawo.

³⁵Izvozvi ndava kuita kuti Moabhu zvichiiperera, ndizvo zvinotaura Tenzi, iyo Moabhu inopira chibayiro panzvimbo yakatunhumara yokuteurira ichipisira rusenzi kuna mwari wayo.

³⁶Ndokusaka ndichidandaura mumwoyo senyere, ndichichema Moabhu. Mwoyo wangu uri kuchema senyere vanhu vokuKiriheresi nokuti upfumi hwavanga vazviwanira hwaparara.

³⁷“Musoro woga woga wakaveurwa, uye ndebvu dzose dzaguswa, akachekwachekwa maoko ose akasungira saga muchiuno.

³⁸Pamatenga ose edzimba dzeMoabhu napamisika yayo kunongova kuchema koga koga, nokuti ndakapwanya Moabhu sehari isina achaida. Ndizvo zvinotaurwa naTenzi.

³⁹Kupwanyika here ikoko! Kuungudza here ikoko! Kudzoka here ikoko kwakaita Moabhu achinyara! Moabhu yava chiseko chenyika nechinhu chinokatyamadza vose vomunharaunda yayo.”

⁴⁰Chiripo ndechokuti zvanzi naTenzi: “Mamboti maonei zvenyu, kuchaita munhu achabhururuka ari mhepo zvayo kumhanya segondo, achitambanudzira mapapiro ake kurwisa Moabhu!

⁴¹Maguta achatorwa uye nhare dzokuzvidzivirira muhondo dzichabvutwa. Mwoyo yavarwi veMoabhu, pazuva iroro, ichaita semwoyo womukadzi ari pakusununguka.

⁴²Moabhu ichaparadzwa isisazovazve rudzi, pamusana pokuti yakazvitutumadza ichirwisana naTenzi.

⁴³Kutyisa negomba nomusungo zvakumirira iwe mugari weMoabhu. Ndizvo zvinotaura Tenzi.

⁴⁴“Anenge atiza zvinhu zvinotyisa achawira muhunza anenge abuda muhunza imomo achabatwa nomusungo nokuti ndichapinza Moabhu muna izvozvi mugore rokurangwa kwavo, ndizvo zviri kutaura Tenzi.

⁴⁵Mumumvuri weHeshibhoni vatizi vanombomiramo simba ravaperera nokuti muHeshibhoni mabvira moto, murazvo wabvira mumba maSihoni. Waroromesa huma yeMoabhu, ndaza youmambo hwokuvanakomana vebongozozo.

⁴⁶“Zvakuwana iwe Moabhu! Vanamati vaKemoshi pavo pavaperera nokuti vanakomana venyu navanasikana venyu vakatapwa vaendwa navo kuutapwa.

⁴⁷“Zvakadaro zvazvo ndichadzosera Moabhu makomborero ayo mune ramangwana,” ndizvo zviri kutaura Tenzi. Zvarehwa izvozvi ndokutongwa kuchaitwa Moabhu.