Read Bhaibhiri Idzva rechiShona Jeremiya 49 Bible Online

Jeremiya 49 - Bhaibhiri Idzva rechiShona bible

Jeremiya 49

¹Zvanzi naTenzi nezvevekwaAmoni, “KwaIsiraeri hakuna vanakomana here? Hakunawo here mudyi wenhaka? Ko Mirikomu adarirei kutorera vokwaGadhi nyika, vanhu vake vachitondogara mumaguta avo?

²“Naizvozvo chinzwai, zvanzi naTenzi, mazuva achasvika andichaitisa kuti ngondo inzwike yokurwisa guta reRabha yevokwaAmoni. Richava chimudhuri chedongo, misha yaro icharoromeswa nomoto. Isiraeri ndopaichapamba vaya vakamboipambawo. Ndizvo zvinotaura Tenzi.

³“Iwe guta reHeshibhoni hwihwidza kuchema nokuti guta reAi raparara! Ridzai mhere imi vanasikana veRabha! Sungai masaga muchiuno, ungudzai muchimhanya uko nokoko, mukati moruzhowa noruzhowa! Chatovapo ndechichi chokuti iye Mirikomu mwari wenyu achaendwa naye kuutapwa pamwechete navapristi vake namachinda ake.

⁴“Chaunozvitutumadzira namapani ako chii, iwe mwanasikana asina kutendeka, iwe unovimba noupfumi hwako uchizviti, ‘Ndiani chaizvo angauye kuzondirwisa?’

⁵Chinzwa, zvanzi naTenzi Tenzi wehondo nehondo ndiri kukuunzira kutya kuchibva kumativi munharaunda mako. Muchatandaniswa muchiburitswa kunze munhu wose achitiza nepaakananga napo ipapo pasina anokokorodza vanenge vatiza.

⁶“Asi gare gare ndichazodzosera zvangu makomborero evokwaAmoni ndizvo zviri kutaura Tenzi.”

⁷Kune veEdhomu zvanzi naTenzi wehondo nehondo: “Ko munyika yeTemani ungwaru hamusisina here? Vangwaru vapererwa namazano here? Uchenjeri hwavo hwavatiza here?

⁸“Pishinukai mutizire kundohwanda munzvimbo dzakadzika-dzika, imi vagari vokuDhedhani nokuti ndichaunza nyatwa yokwaEsau pavari panguva yandichavaranga.

⁹“Kuri kuti mavingwa navatanhi vamagirepisi, havangakusiyirei kana mamwe okufuhwa here? Kuri kuti mbavha dzauya nousiku, handiti dzinongopaza pokuzvibatsira idzo chete here?

¹⁰Asi vokwaEsau ndakavasiya vasisina chavanacho. Pavanohwanda ndakapaisa pachena, kuzvivanza haachagoni. Vana vake vakaparadzwa pamwechete navakoma-navanun'una vake, vavakidzani naye vakapararawo, naiyewo hapasisina.

¹¹Siyai zvenyu nherera dzenyu, ndichadzichengeta dziri mhenyu uyewo chirikadzi dzenyu ngadzivimbe neni.

¹²“Nokuti zvanzi naTenzi: ‘Kana vanhu vakanga vasingakodzeri kunwa mukombe iwoyo vakaunwa, ko iwe ndiwe ungazogare here usina kurangwa? Haumborega kurangwa, unotounwa chete.’

¹³Nokuti ndakapika neni pachangu, ndizvo zvinotaurwa naTenzi, kuti Bhozira ichava chinhu chinokatyamadza. Ichava chiseko nerenje zvaro nechinhu chine rushambwa uye maguta aro ose achava matongo okugara nokugara.”

¹⁴Ndakanzwa dama rakabva kuna Tenzi nenhume yakatumwa mukati memarudzi avanhu ichiti, “Kokorodzanai pamwechete murwise Edhomu musimuke murwe hondo

¹⁵nokuti, chionai, ndava kukudukupisai pakati pamarudzi ose kukuitai vanhu vakashoreka mukati mavamwe.

¹⁶Kutyisidzira okuzvikudza kwenyu zvakakufurirai, imi munogara mumikaha yamatombo iyemi munotonga misoro muri pameso pamakomo. Kunyange zvazvo mukaisa matendere enyu padengadenga segondo, ini ndichakutozomorai ipapo. Ndizvo zviri kutaura Tenzi.

¹⁷“Edhomu ichava chinhu chinokatyamadza. Munhu ose anodimura nemo achakanhamara achiridza muridzo pamusana petsaona dzaro,

¹⁸sezvakaita Sodhomu neGomora pamwechete namaguta akanga akavakidzana nawo paakaparadzwa. Ndizvo zvinotaura Tenzi. Hapana munhu achaita musha imomo kana munhu wokugara kwekanguva chete imomo.

¹⁹Regai muone, ndichaita seshumba yabva mujokochwa romuna Jorodhani ichauya kumafuro, vachaerekana ndava kuvaitisa chimwandamwanda kubva muEdhomu. Ndichaisarudzira chero wandinenge ndada kuti aitonge. Ndinodaro nokuti ndiani akaita seni? Ndiani chaizvo angandigadze dare? Ndoupi mufudzi angamirisane neni?

²⁰Naizvozvo chinzwai chirongwa charongerwa Edhomu naTenzi nezvaari kuda kuita kuvagari vokwaTemani ivavo chokuti: Kunyange notwana twedanga irori tuchandundurutswa, danga ravo rigonyatsodumbirwa chaizvo nomugumo wavo.

²¹Kurira kwokuputsika kwavo kuchadederesa nyika, mhere yokuchema kwavo ichinzwika kuGungwa Dzvuku.

²²Chinzwai mumwe achakwira mudenga ari mhepo zvayo kubhururuka segondo agovinga guta reBhozira akatambanudza mapapiro. Izvozvo mwoyo wavarwi vokuEdhomu musi iwoyo uchaita somwoyo womukadzi ari mumarwadzo pakusununguka.

²³“Izvi ndizvo zvakataurwa nezveDhamasikusi zvokuti, Hamati neAripadhi vatenderera musoro nokuti varikunzwa mashoko akaipa, vaparara nokutya. Vabvongodzeka segungwa risinganyarari.

²⁴Dhamasikusi yaondoroka yapishinuka ikatiza. Yabatwa nokutya, yarwadziwa mwoyo yasuruvara somukadzi ene mimba yarwadza.

²⁵Zvauya sei kuti guta risuwe, guta rangu, guta rorufaro.

²⁶“Naizvozvo majaya aro achati rakata munhandare dzaro, masoja aro ose achaparadzwa zuva iroro. Ndizvo zviri kureva Tenzi wehondo nehondo.

²⁷“Ndichavesa moto murusvingo rweDhamasikusi ucharoromesa nhare yokuzvidzivirira nayo muhondo yokwaBhenihadhadhi.”

²⁸Zvakatongerwa Kedhari nenyika dzeHazori dzakakundwa naNebhukadhireza mambo weBhabhironi. Zvanzi naTenzi, “Simukai murwise Kedhari! Paradzai vanhu vokumabvazuva!

²⁹Matendhe avo nezvipfuwo zvavo zvinofanira kuti zvitorwe namachira avo okudzikatirisa nezvinhu zvavo zvose, nengamera dzavo vanofanira kuti vazvitore zviendwe nazvo. Varume vachadaidzira kwavari vachiti, ‘Hokoyoi kumativi kwose kwaipa.’

³⁰Tizai, dzengererai muri kure, garai makadzika, imi vagari veHazori. Ndizvo zvinotaura Tenzi. Nokuti Nebhukadhireza mambo weBhabhironi akurongerai zano rakaipa, ane chinangwa chakaipa.

³¹“Zvanzi naTenzi, Simukai munorwisa rudzi ruri pamutambaratede, rugere zvarwo pasina chinorunetsa rusina misuo mukuru kana zvihuri runogara ruri rwoga.

³²Ngamera dzavo dzinofanira kutorwa, matanga avo emombe apambwa. Vose vanogera vhudzi kuitwa makona mumusoro ndichavati mwarara kumativi kwose. Ndichaita kuti nyatwa dzivakombe kumativi ose, ndizvo zviri kutaura Tenzi.

³³Guta reHazori richava dambiro zvaro ramakava richazogara riri dongo nokusingaperi. Hapana munhu achagaramo kana wokumbogarawo zvake kwekanguva chete imomo.”

³⁴Izwi raTenzi rakauya kumuporofita Jeremiya richitaura nezveEramu pakutanga kwokutonga kwaZedhekiya mambo wokwaJudha rikati,

³⁵Zvanzi naTenzi wehondo nehondo, “Regai muone zvenyu ndichatyora uta hweEramu, musimboti wesimba ravo.

³⁶Ndichaita kuti Eramu ivingwe nemhepo dzokumativi mana edenga ndigovati mwarara kumhepo ina dzose idzodzo. Hakuna rudzi rwavanhu kusingazoendwi nevanenge vadzingwa muEramu.

³⁷Ndichapinza muEramu mweya woumbwende, wokutya vavengi vavo, navanhu vanotsvaka zvokupfuudza upenyu hwavo. Ndichavapinza nhamo ndigouya nehasha dzinotyisa ndizvo zviri kutaura Tenzi. Ndichavatumidzira bakatwa rivaronde kudzamara ndavapedza kuti nho.

³⁸Izvozvo ndichaisa chigaro changu choumambo muEramu ndigoparadza mambo wavo namachinda avo, ndizvo zvinotaura Tenzi.

³⁹Asi mumazuva okupedzesera ndichadzosera Eramu makomborero ayo, ndizvo zviri kutaura Tenzi.”