Read Bhaibhiri Idzva rechiShona Jeremiya 5 Bible Online

Jeremiya 5 - Bhaibhiri Idzva rechiShona bible

Jeremiya 5

¹Bvongodzai nomumigwagwa yeJerusaremu mutarise muongorore. Tsvakurudzai mumisika yaro muone, kana mukawana mumwechete zvake anoita zvine ruenzaniso uye ari pachokwadi, ndiriregerere guta irori.

²Kunyange zvazvo vachiti, “NaTenzi chaiye mupenyu,” izvozvo vanenge vachipika zvenhema.

³Nhai Tenzi, handiti meso enyu anotsvaga chokwadi here? Kuvarova makavarova zvenyu asi hazvina kuvarwadza. Makavakuya, imi, asi vakaramba kudzorwa. Vakatoomesa musoro kutopinda dombo, vakaramba kutendeuka.

⁴Ini ndokuti, “Ava vanhu varombo zvavo chete havanzwisisi nokuti nzira yaTenzi havaizivi, iwo mutemo waMwari wavo.

⁵Ndichaenda kuvakuru vakuru vacho ndigotaura navo nokuti vanoziva nzira yaTenzi, iwo mutemo waMwari wavo. Asi vose zvavo vakaita zvimwechetezvo vakatyorawo joko racho vakadambura zvitorobho.

⁶“Naizvozvo shumba ichabva mudondo ivauraye, mhumi yokugwenga ichavaparadza; mbada iri kuhwandira mumaguta avo. Ani naani anongobudamo achabvamburwa-bvamburwa. Nokuti kukanganisa kwavo kwawanda; umhandupandu hwavo hwanyanya.

⁷“Ndingagokuregererai seiko? Vana venyu vakandifuratira vakatopika zvavo navasiri vamwari. “Pandaivapa chokudya vachiguta ivo ndopavakaita upombwe vachiunganidzana kudzimba dzepfambi.

⁸Vakanga vava mikono yamabhiza yakakodzwa yava kuda makadzi, rimwe nerimwe rohwihwidzira mukadzi werimwe raro.

⁹Ndingarege here kuvarangira zvinhu izvozvi? Ndozviri kutaura Tenzi. Ndingarege here kutsividza rudzi rwakaita sairworu?

¹⁰“Pindai nomumitsara yemigirepisi yake muchiparadza, asi musabva maparadza zvachose. Mukwazhurei mapazi ake nokuti haasi mapazi aTenzi.

¹¹Ndinodaro nokuti vemba yokwaIsiraeri nevemba yokwaJudha, vakanga vari vanhu vasina kunyatsotendeseka kwandiri. Ndizvo zviri kutaura Tenzi.”

¹²Vanoreva nhema nezvaTenzi vachiti, “Hapana chaanoita uyu. Hapana nhamo ichatiwira. Hondo yemapakatwa, hatisi kuzomboiona isu, kana zveshangwa yenzara.”

¹³Vaporofita vangova mhepo zvayo mavari hamuna shoko racho. Saka izvozvo ndozvichaitwa kwavari!

¹⁴Naizvozvo zvanzi naTenzi Mwari wehondo nehondo, “Chinzwa, pamusana pomuromo wavanotaura[6] iwoyo, ndichaita kuti mazwi angu anobva mumuromo mako ave moto, vanhu ivava vanenge vari ivo huni dzacho; moto iwoyo uchavaroromesa.”

¹⁵Chinzwai, imi vemba yaIsiraeri ndiri kukuunzirai rudzi rwavanhu, vanobva kure, kure ndizvo zviri kutaura Tenzi. Rudzi rwacho rudzi rwapasichigare rudzi rwaivapo kubvira chingo nechingo, rudzi runo mutauro wamusingazivi vamusingagoni kunzwisisa kutaura kwavo.

¹⁶Mukutu wavo unenge guva rakashama, vose zvavo magamba okurwa chaiwo.

¹⁷Vachadya goho renyu nechokudya chenyu Vachaparadza vanakomana venyu navanasikana venyu. Vachadya matanga emombe dzenyu neezvimwe zvipfuwo zvenyu. Vachadya magirepisi enyu uye maonde enyu. Maguta enyu etsvingo amunovimba nawo vachaaparadza nehondo yebakatwa.

¹⁸Asi zvanzi naTenzi, “Kunyange mumazuva iwayo handisi kuzobva ndakutsakatisai.

¹⁹Vanhu vokwako ava kana vokubvunza vachiti, ‘Tenzi, Mwari wedu akaitireiko zvinhu izvi kwatiri?’ Iwe vataurire kuti, ‘Sokundifuratira kwamakaita muchindonamata vaMwari vasiriivo munyika menyu, saizvozvowo muchandonamatawo vamwari vasirivo kunyika isiri yenyu.’ ”

²⁰“Paridzai izvozvi kune vemba yokwaJakobho; zivisai izvozvi mune vemba yaJudha.

²¹Chinzwai izvi mazungairwa avanhu, vanhu vasina pfungwa, vana maziso, asi havaoni, vane nzeve, asi kunzwa vasinganzwi.

²²“Tenzi anoti, hamundityi here, uye hamundidederi here? Ini ndakaisa jecha samahombekombe egungwa. Muganhu wokugara wakadaro warisingagoni kudimura. Kunyange mafungu akausunda haanga usudurudze kunyange zvazvo akatinhira haakwanisi kuudarika.

²³Asi vanhu ivava itsvuuramuromo dzavanhu vane mwoyo woumhandupandu vakatsauka vakateterekera kure.

²⁴Mumwoyo mavo havambozvitiwo, ngatityei Tenzi, Mwari wedu, anonayisa mvura mumwaka wayo; nemvura yobumharutsva neyomunhuruka, nokutipa masvondo akatemerwa nguva yokukohwa.

²⁵Uipi hwenyu ndohurikuzvitandira kure, zvitadzo zvenyu ndizvo zviri kukutadzisai kuwana zvakanaka

²⁶nokuti pakati pevanhu vangu pane vamwe vanhu vakaipa. Vanohwandira savateyi veshiri vakagaririra. Vanoteya chokuteyesa vachibata vanhu.

²⁷Setswanda yokuteyesa shiri yazara nadzo, dzimba dzavo dzakati pamu pamu kuzara nezvinhu zvoujarijari. Saizvozvo vava mbombo chaidzo dzakapfuma,

²⁸vakakora, vakaita miviri unoyevedza. Kuita kwavo kwouipi hakuna muganho, havatonge zvine ruenzaniso; mhaka dzenherera kuti dzibudirire. Havambomiririra varombo pazvinhu zvinofanira kuve zvavo.

²⁹“Tenzi ari kuti ndingarege here kuvarangira zvinhu izvozvi? Ndingarege here kutsividza rudzi rwevanhu vakadai urwu?

³⁰Kwaitika chinhu chinodumbirisa chinhu chakaipisisa kwazvo munyika ino

³¹chokuti: vaporofita vari kuporofita zvenhema vapristiwo vachitonga vachingoita kuti zvivanakire. Vanhu vangu ndozvavari kutodawo zvakadaro izvozvo, asi muchaita sei kana kuguma kwazvosvika?”