Read Bhaibhiri Idzva rechiShona Jeremiya 51 Bible Online

Jeremiya 51 - Bhaibhiri Idzva rechiShona bible

Jeremiya 51

¹Zvanzi naTenzi: “Chinzwa, ndava kumutsa mweya womuparadzi wokuzorwisa Bhabhironi, achirwisa vagari veKaridhea.

²Ndichatumira kuBhabhironi vapepeti vachazoipepeta zvavo vachirozva nyika yayo kusiya isisina chinhu, pavachaivinga vakaita zvokuikomberana, pazuva iroro renhamo.

³“Murwi wouta ngaarege kukunga uta kana kumira ari mademautare. Majaya avo musaasiye ari mapenyu paradzai zvokuparadza zviye hondo yayo yose zvayo.

⁴“Vachati rakata kufa munyika yevaKaridhea vamwe vakuvadzwa mumigwagwa yayo

⁵nokuti vokwaIsiraeri nevokwaJudha havana kubva vafuratirwa naMwari wavo, iye Tenzi wehondo nehondo. Asi nyika yevaKaridhea yakati pamu pamu kuzara nemhosva dzavakatadzira Mutsvene weIsiraeri.

⁶“Tizai mukati meBhabhironi regai munhu wose azviponese upenyu. Regai kutsakatiswawo mukurangwa kwayo nokuti iyi ndiyo nguva yokutsividza kwaTenzi achiiwanisa zvakakodzeranawo nayo.

⁷“Bhabhironi, mumaoko aTenzi yaiva mukombe chaiwo wendarama ichiraradzisa pasi pose zvapo. Marudzi aidutira waini yayo ndokusaka marudzi akapengeswa nayo.

⁸“Bhabhironi yangoyerekana yati ngondo ngondo yapwanywa, ichemei! Iigirei mushonga webharumu wokuitira kurwadzwa kwayo zvimwe ingarapike.

⁹“Taida kurapa Bhabhironi asi haina kurapika. Isiyei tiende mumwe nomumwe kunyika kwake nokuti kutongwa kwake, kwasvika kana nokudenga kunyange nomuchadenga umu.

¹⁰“Tenzi aburitsa pachena kuti hatina mhosva. Chiuya tizivise vanhu muguta reZioni basa raTenzi, Mwari wedu.

¹¹“Rodzai miseve! Zadzai mikutu! “Tenzi amutsa mweya wamadzimambo wavaMidhi nokuti chinangwa chake neBhabhironi ndechokuiparadza, ikoko ndokutsiva kwaTenzi achitsividzira Temberi yake.

¹²“Misai mureza patsvingo dzeBhabhironi, zvokugariridza ngazvisimbaradzwe, isai varwi vokugaririra; vokuhwandira ngavagadzirire. Nokuti Tenzi akaronga uye akaita zvaakataura nezvevagari veBhabhironi.

¹³“Imi vokugara kumvura yakawanda imi muzere noupfumi penyu pakupererai, mudzira wakabata upenyu hwenyu wadimurwa.

¹⁴“Tenzi wehondo nehondo apika naiye pachake kuti, ndichakuti farara kuzadza navanhu semhashu vacharidza mupururu wokukurira.

¹⁵“Iye nesimba rake ndiye akaita nyika, ndiye noungwaru hwake akasika nyika. Uye nokunzwisisa kwake akawarira matenga.

¹⁶“Paanongoti buritsei muromo mumwechete mvura inodhiriridza mumatenga. Anoita kuti mhute isimuke kubvira kwakaperera nyika achiita kuti mumvura inonaya muve nemheni achiuyisa mhepo ichibva maanoichengetera.

¹⁷“Munhu wose rangova zungairwa, vanongova vanhu vasina ruzivo, mhizha yose yezvendarama ichinyadziswa nezvifananidzo zvayo zvokunamata nokuti zvifananidzo zvayo zvokunamata hazvina maturo uye hazvina mweya unofema mazviri.

¹⁸“Hazvina kana namaturo ibasa risina musoro. Panguva yazvo yokurangwa zvichaparara.

¹⁹“Iye haana kumboita saizvozvi iye mugove wevokwaJakobho nokuti ndiye akasika zvinhu zvose uye verudzi rwechiIsiraeri ndivo rudzi rwake rwenhaka. Zita rake rinonzi Tenzi wehondo nehondo.

²⁰“Ndiwe nyundo yangu nechombo changu chehondo. Newe ndinopwanyanisa marudzi newe ndinoparadza umambo hwedzinyika.

²¹“Newe ndinobvambura-bvambura bhiza nomutasvi waro; newe ndichityoranisa ngoro yehondo nomuchairi wayo.

²²“Newe ndinoita kanyama-kanyama murume kana mukadzi, newe ndichiita kanyama-kanyama munhu wechikuru kana wechiduku. Newe ndinodambura-dambura jaya kana mhandara.

²³“Newe ndinoita kanyama-kanyama mufudzi nedanga rake rezvipfuwo. Newe ndinoita kanyama-kanyama murimi nevechikwata chake. Newe ndinoita kanyama-kanyama vatongi namadzishe.

²⁴“Ndichatsividza Bhabhironi navagari vose vokuKaridhea iwe uchiona nameso ako pari pamusana pouipi hwose hwavakaita muguta reZioni, ndizvo zviri kutaura Tenzi.

²⁵“Chinzwa, ndanangana newe zvino iyewe gomo roumharadzi, ndizvo zviri kutaura Tenzi; iwe unoparadza pasi pose. Ndichasumudza ruoko rwangu ndakanangana newe, ndigokukungurutsira pasi pamawere ndichikuita gomo rakatsva.

²⁶“Mauri hamusi kuzombotorwa ibwe rokuvakisa pakona, kana ibwe zvaro rokuvakisa ugaro, asi kuti uchava dongo rechigariro, ndizvo zviri kutaura Tenzi.

²⁷“Misai mureza pasi ridzai bhosvo mukati memarudzi, gadzirirai marudzi kuti aite hondo nayo. Kokerai umambo hwedzinyika dzimurwise imi munoti vokuArarati nevokuMini nevokuAshikenazi sarudzai mutungamiriri wehondo vokundoyirwisa unzai mabhiza semhashu dzinoparadza.

²⁸“Gadzirirai marudzi azoita hondo nayo iwo madzimambo okuMidhi namasadunhu awo navatevedzeri vavo nenyika yose zvayo iri pasi payo.

²⁹“Pasi padedera pamononoka namarwadzo nokuti zvakarongerwa Bhabhironi naTenzi zvinotoitika, zvokuita kuti nyika yeBhabhironi ive dongo zvaro risina ageremo.

³⁰“Varwi veBhabhironi varega kurwa vangova munhare dzavo dzokuzvidzivirira nadzo hondo simba ravo rapera, vava vakadzi chaivo, misha yavo iri kuririma nomoto zvihuri zvayo zvatyoka.

³¹“Vokumhanya vari kuita zvokutosangana nhume ichisanganawo nenhume kundosvitsa shoko kuna mambo weBhabhironi rokuti guta rake ratorwa mativi ose zvawo.

³²“Mazambuko ava mumaoko mavavengi, nhare dzokuzvidzivirira muhondo dzaroromeswa nomoto, varwi vehondo vatenderera nazvo musoro

³³nokuti zvanzi naTenzi wehondo nehondo, Mwari weIsiraeri, iye mwanasikana uyu, Bhabhironi ava kunge buriro panguva yokupura. Kwangosara kanguva kadikidiki nguva yokukohwa yotosvika.”

³⁴Nebhukadhireza mambo weBhabhironi[48] akandizhanya akanditsonda. Akaita kuti ndive mudziyo zvawo usina chinhu, andimedza segaranyanya. Azadza dumbu rake noudobo hwangu andidzumburudza.

³⁵Utsinye hwandakaitirwa ini pamwechete nehama dzangu, ngahuitirwewo kuBhabhironi. Vagari veguta reZioni ngavati: “Ropa rangu ngaripfukire vagari vekuKaridhea,” regai Jerusaremu idaro.

³⁶Naizvozvo zvanzi naTenzi, “Chinzwa, ini ndichakumiririra ndigokutsividzira. Gungwa rake ndichariomesa, kasipiti kake ndikaomese kuti gwa.

³⁷Bhabhironi ichava murwi wamatongo dambiro zvaro ramakava nechinhu chinokatyamadza, chinhu chinoridzirwa muridzo wokusiririswa, isina ageremo.

³⁸“Vachadzvovedzana pamwechete seshumba vachihon'erana sevana veshumba.

³⁹Pavanenge vane manyawi kudaro ndichavagadzirira mabiko ndivararadzise kusvikira vafarisa uye kuti vakotsire hope dzomutorododo dzavasingazopepukizve, ndizvo zviri kutaura Tenzi.

⁴⁰Ndichavadzikisa kundobayiwa sehwayana nehondohwe nezvikotora.

⁴¹“Bhabhironi chaiyo, kutorwa uku nhai! Kubatwa here chokwadi iyo chidadiso chapasi pose! Chaiyo Bhabhironi here kuva chinhu chinokatyamadza mukati memarudzi!

⁴²“Gungwa rachiti fushe fushe kukwidibira Bhabhironi; Bhabhironi rakwidibirwa namasaisai aro anovhavhamuka,

⁴³maguta aro ava renje zvaro nyika yakaoma, gwenga zvaro nyika isingagare munhu isina kana munhu anopfuura nomo.

⁴⁴Uye ndicharangawo Bheru Mwari wavo, muBhabhironi. Ndichamurutsisa zvose zvaakamedza. Marudzi haasi kuzodiranazve kwaari rusvingo rweBhabhironi rwapazika.

⁴⁵“Vanhu vangu! Budai mukati mayo! Munhu wose ngaazviponese upenyu kuhasha dzaTenzi dzinotyisa.

⁴⁶Regai kurasa mwoyo kana kutya namarehwarehwa anonzwika munyika. Kana pakauya marehwarehwa gore iri kana kuzouya mamwe marehwarehwa mune rimwe gore, kunyange utsinye hwava munyika mutongi worwisana nomutongi.

⁴⁷“Naizvozvo, chinzwa, mazuva ari kuuya andicharanga nawo zvifananidzo zvokunamata zveBhabhironi. Nyika yayo yose ichanyadziswa Vose vanenge vaurayiwa vachati rakata mukati mayo.

⁴⁸“Izvozvo matenga napasi nazvose zviri mazviri, zvichaimba nomufaro pamusoro peBhabhironi nokuti mharadzi dzichauya kuzoirwisa dzichibva kuchamhembe ndizvo zviri kutaura Tenzi.

⁴⁹“Bhabhironi inofanira kuti iparadzwewo pamusana pavaIsiraeri vakaurayiwa, sokuti Bhabhironi yakaparadzawo vanhu vakaurayiwa vepasi pose.

⁵⁰“Imi vanyakupunyuka bakatwa, chitoendai musambomira henyu. Muri kure kudaro yeukai Tenzi murangarire Jerusaremu kuti:

⁵¹“Takanyadziswa isu, kutsiudzwa takakunzwa takadonha uso nokunyara nokuti vechirudzi vakapinda munzvimbo dzinoera dzetemberi yaTenzi.

⁵²“Naizvozvo, mazuva ari kuuya. Ndizvo zviri kutaura Tenzi pandicharanga zvifananidzo zvayo. Munyika yayo yose, vanenge vakuvara vachagomera.

⁵³“Kunyange Bhabhironi ikareba kukwira mudenga. Uye kunyange kukwira kwayo mudenga kukasimbaradzwa, ndichangoiunzira mharadzi. Ndizvo zviri kutaura Tenzi.

⁵⁴“Heyo mhere yokuchema muBhabhironi, ruzha rwokuparadza kukuru, ruri kubva munyika yevaKaridhea

⁵⁵nokuti Tenzi ari kuparadza Bhabhironi achiita kuti ruzha rwayo rukuru runyarare. Masaisai avo anoriridza semvura zhinji, mheremhere yamazwi avo yakwira mutanda

⁵⁶nokuti mharadzi yaivinga yasvikira iyo Bhabhironi. Varwi vayo vehondo vatapwa, uta hwavo hwatyorwa-tyorwa nokuti Tenzi, ndiMwari anotsiva achanyatsotsividza.

⁵⁷“Ndichararadzisa machinda ayo navangwaru vayo namasadunhu ayo pamwechete navatungamiriri vehondo vayo navarwi vayo vehondo. Vachakotsira hope dzomutorododo dzavasingazopepukizve ndizvo zviri kutaura Mambo iye anonzi Tenzi wehondo nehondo.

⁵⁸“Zvanzi naTenzi wehondo nehondo rusvingo rwakapamhama rweBhabhironi ruchanyatsonzi pasi mwarara, nemisuo mikuru yaro yakareba kudaro icharirimiswa nomoto. Marudzi achashandira nhando, ndudzi dzavanhu dzichitambudzikira zvinhu zvinopiswa nomoto.”

⁵⁹Izvi ndizvo zvakarongwa nomuporofita Jeremiya kuti zviitwe naSeraya mwanakomana waNeriya vokwaMahiseya pavakaenda kuBhabhironi naZedhekiya mambo wokwaJudha mugore rake rokutonga rechina. Seraya akanga ari jinda racho.

⁶⁰Jeremiya akanyora mubhuku nyatwa dzose dzaizofanira kuwira Bhabhironi namazwi ose iwaya akanyorwa anoera nezveBhabhironi.

⁶¹Jeremiya akati kuna Seraya, “Ukange wazosvika kuBhabhironi, uone kuti mashoko ose iwaya waaverenga uti,

⁶²‘Imi Tenzi makataura nezvenzvimbo ino kuti muchanyatsoiparadza zvokuti hapana chichazombogaramozve kunyange munhu kana mhuka. Asi kutoti ichava dongo narini wose.’

⁶³Paunenge wapedza kuverenga bhuku irori risungirire dombo urikande murwizi rwaYufuratesi

⁶⁴utaure uchiti, ‘Ndiko kunyura kuchaitawo Bhabhironi ikoku risingazodzumbunukizve zvichikonzerwa nenyatwa dzandichaiunzira.’ ”[49] Apa ndipo paperera mazwi aJeremiya.