Read Bhaibhiri Idzva rechiShona Jeremiya 6 Bible Online

Jeremiya 6 - Bhaibhiri Idzva rechiShona bible

Jeremiya 6

¹Tizai muJerusaremu munohwanda imi vanhu vokwaBhenjamini, ridzai hwamanda muTekoa, uye simudzai mumise chiratidzo paBhetihakeremu, nokuti heyo nhamo youya ichibva kuchamhembe, kuparadza kukuru chaizvo.

²Guta reJerusaremu, mukunda weZiyoni kunyange rakanaka zvaro kudaro ndichariparadza.

³Vafudzi namatanga ezvipfuwo zvavo, vachadzika misasa yavo yematendhe vakarikomberana mumwe nomumwe achifudzira zvake pachindima chake.

⁴“Gadzirirai hondo tivarwise, simukai tivarwise zuva richirova nhongonya.” “Inga tapinda nhamoka isu zuva rava kuvira kudai mimvuri yokudoka kwokunze yava kureba.

⁵Simukai tirwise nousiku tiparadze mizinda yaro.”

⁶Nokuti zvanzi naTenzi Tenzi wehondo nehondo, “Temerai pasi miti yaro muvake nevhu chinenge musana wenzou kurusvingo rweJerusaremu. Guta irori iri, iguta rinofanira kurangwa, udzvinyiriri ndohuzeremo chete.

⁷“Sezvinoita tsime kunyatsochengetedza mvura yaro yakanaka, ndizvo zviri kuita guta irori kunyatsochengetedza uipi hwaro. Utsinye nokuparadza ndizvo zvinonzwika mariri urwere namaronda zviri kugara zviri pameso pangu.

⁸Iwe Jerusaremu uchinzwawo! Ndingadaro ndikachekana ukama newe ndinokusiya wangova nzvimbo chete, nyika isina ageremo.”

⁹Zvanzi naTenzi Mwari wehondo nehondo: “Vachanyatsoita sokufuhwa mugirepisi vachifuhwa chitsama chavakasara cheIsiraeri, somutanhi wamagirepisi dzokererazve kupinza ruoko rwako mumapazi awo.”

¹⁰“Ndiani chaizvo wandingataurire ndichiyambira kuti vanzwe? Hezvi nzeve dzavo dzakadzivira, havanzwi. Zvamunoona, kwavari ivo, shoko raTenzi rangova chinhu chinoshoreka, havachamborifarirai

¹¹Ndokusaka ndakapaka kuzara nehasha dzaTenzi, ndaneta nadzo kudzinyaradza. Dzidururire pavana vari mumugwagwa napamapoka amajayawo. Vose zvavo murume nomukadzi vachatapwa, vezera ravakura navakwegura chaivo.”

¹²“Misha yavo ichava yavamwe pamwechete neminda yavo namadzimai avo nokuti ini noruoko rwangu ndichasumudza shamhu yokuranga vagari venyika ino, ndizvo zviri kutaura Tenzi,

¹³nokuti kubvira kumudiki kusvikira kumukuru wacho chaiye, munhu wose ano makaro okuwana zvinhu nenzira isina kururama, kubvira kumuporofita kusvikira kumupristi munhu wose ari kungoita zvounyengedzi.

¹⁴Kurapa ronda ravanhu vangu, vanorapa zvavo asi zvechipa meso vachiti, ‘Rugare, rugare,’ ipo pasina rugare rwacho.

¹⁵Havaifanira kunyara here pavakaita zvakaipa zvisingadiwi naMwari? Kwete havana kana kumbonyara ava. Havazivi kuti kunonyarwa sei. Naizvozvo vachafawo panofira vamwe, panguva yandichavaranga ndipo pavachakundwa, ndizvo zviri kutaura Tenzi.”

¹⁶Zvanzi naTenzi, “Mirai pamhararano munyatsotarisa, mubvunzisise nezvenzira dzakare kuti gwara rakanaka nderipi mufambe naro muzviwanire zororo.” Asi ivo vakatoti, “Hatidi kufamba mariri.”

¹⁷Ndakaisa vatariri vokukutarirai, ndichiti, “Teererai kurira kwehwamanda.” Asi vanoti, “Hatimboda kana kuzvinzwa izvozvo.”

¹⁸“Saka zvino chinzwai munzwe imi ndudzi dzavanhu, imi gungano ravanhu muzive zvinhu zvichavawira.

¹⁹Iwe nyika, teerera unzwe! Tarisa uone, nhamo dzandava kuuyisa pavanhu ava zvibereko zvetwavanoita, nokuti vakarega kuteerera shoko rangu. Mutemo wangu vakauramba.

²⁰Chandinouyisirwa rusenzi runobva kuShebha chii, kana idzo nzimbe dzinotapira dzokunyika yokure? Mipiro yenyu yokupisa haigamuchiriki, zvibayirowo zvenyu hazvindifadzi.

²¹Ndokusaka zvanzi naTenzi, chinzwa, ndava kuisira vanhu ava zvinhu zvokuvagumbura zvichavagumbura, madzibabawo pamwechete navakomana, vachaparara muvakidzani neshamwari vachaparara.”

²²Zvanzi naTenzi, “Chinzwa, kune vanhu vari kuuya vachibva kunyika yokuchamhembe, rudzi rukuru rwavanhu rwuri kuzhandanuka ruchibva kure kwakaperera nyika chaiko.

²³Vakapakata uta namapfumo, vanoutsinye uye havana tsitsi. Ruzha rwavo runenge ruzha rwegungwa, vanotasva mabhiza akarongana savanhu vari kundorwa hondo kuzorwisa iwe Jerusaremu, mukunda weZioni!”

²⁴“Takanzwa runyerekupe rwazvo, maoko edu akabva arengenduka, takarwadziwa isu namarwadzo anenge omukadzi ari kusununguka.

²⁵Regai kupinda mumunda kana kufamba pamugwagwa nokuti muvengi ane bakatwa, zvinotyisa zvapoteredza.”

²⁶“Iwe mukunda wavanhu vangu, Jerusaremu pfeka masaga uwumburuke mudota uchichema sokuchema mwana mukomana mumwechete oga, kuchema kunosiririsa kwazvo, nokuti nenguva isipi, muparadzi achatiwira.

²⁷Ndakakuita kuti uve muongorori nomuonorori mukati mavanhu vangu kuti uzive uye uongorore nzira dzavo.

²⁸Vose zvavo inhunzvatunzva dzakapanduka, vanofambidzana navanamuzvinaguhwa. Vangova sendarira nesimbi; vose zvavo vano kuita kwakaora.

²⁹Mvuto dziri kufutidza zvinotyisa, mutobvu wonyungurutswa nomoto zvokuuchenesa pasina, nokuti vatadzi havana kubviswa.

³⁰Vachanzi, marara zvawo esirivha nokuti Tenzi akavaramba.”