Read Bhaibhiri Idzva rechiShona Jeremiya 7 Bible Online

Jeremiya 7 - Bhaibhiri Idzva rechiShona bible

Jeremiya 7

¹Iri ndiro izwi rakauya kuna Jeremiya richibva kuna Tenzi richiti,

²“Mira pasuo guru remba yaTenzi uzivise vanhu ipapo shoko iri, uti inzwai shoko raTenzi imi mose vokwaJudha munopinda napamisuo mikuru ino iyi muchindonamata Tenzi.

³Zvanzi naTenzi wehondo nehondo, iye Mwari weIsiraeri, ‘Gadziridzai nzira dzenyu nezviito zvenyu, iniwo ndipo pandichakuitai kuti mugare munzvimbo ino.’

⁴Regai kuvimba namazwi aya anonyengedza muchingoti, ‘Iyi iTemberi yaTenzi, Temberi yaTenzi, Temberi yaTenzi.’

⁵“Chiripo ndechokuti kana mukanyatsogadziridza nzira dzenyu namaitiro enyu, muchinyatsoitirana zvinhu zvine ruenzaniso

⁶mukaregawo kudzvanyirira muuyi kana nherera kana chirikadzi, kana zvokudeura ropa romunhu asina mhosva munzvimbo ino, uyewo kana mukakanda pasi zvokuteveredzana navamwe vamwari zvinokupinzai munhamo,

⁷ndopandichakuregai makagara munzvimbo ino, munyika yandakapa kare kumadzibaba enyu narini narini wose.

⁸“Chinzwai, izvozvi imi muri kungovimba namazwi anonyengedza zvisina chimuko.

⁹Mungati here imi maba, mauraya munhu, maita upombwe, mapika zvenhema, mapisira rusenzi kuna Bhaari matevedza vamwe vamwari vamusingazivi

¹⁰pedzepo mouya kuzomira pandiri muimba ino, imba inodaidzwa nezita rangu muchitoti zvenyu, ‘Takaponeswa isu,’ imi muchingoenderera mberi chete kuita zvinondisemesa zvose izvi?

¹¹Ko iyo imba iyoyi inodaidzwa nezita rangu, mukuona kwenyu yatova bako remakororo nhai? Chinzwai, ini iyeni ndakatozviona, ndizvo zviri kutaura Tenzi.

¹²Asi chimboendai kunzvimbo yangu yaiva kuShiro, kwandakamboisa zita rangu pokutanga muone zvandakaita kwairi pamusana pouipi hwavanhu vangu vaIsiraeri.

¹³Zvanzi naTenzi zvino pamusana pezvose zvamakaita izvi, pandakaramba ndichingotaura kwamuri, imi makarega kuteerera. Pandakakushevedzai hamuna kudaira.

¹⁴Naizvozvo ndichaita kuimba iyi inodaidzwa nezita rangu, yamunovimba nayo yacho uye kunzvimbo yandakapa kwamuri nokumadzibaba enyu, sezvandakaita kuShiro.

¹⁵Ndichakudzingirai kure neni sokudzinga kwandakaita hama dzenyu dzose dzechizvarwa chokwaEfuremu.”

¹⁶“Iwe rega kunamatira vanhu ivava kana kuvaisira chichemo kana munamato. Usavateterere kwandiri nokuti handimbokuteerera.

¹⁷Hausi kuona here zvavari kuita mumaguta okwaJudha nomumigwagwa yeJerusaremu?

¹⁸Vana ndivo vokutsvaga huni madzibaba acho achikuhwidza moto madzimai varivo vokukanya mukanyiwa wokubikisa zvingwa zvokupira kuna vahosi vamambo wedenga. Vanotoita mipiro yokuteura kune vamwe vamwari kuti vandishatirise.

¹⁹Wavari kurwadzisa ipapa ndini here? Ndozviri kutaura Tenzi. Havasi kutozviparira zvavo here vachitozodzungaira?

²⁰Naizvovo zvanzi naTenzi Mwari tarisa uone ndava kuvirukira nzvimbo ino nehasha ndakashatirirwa vanhu nemhuka nemiti yesango nemichero yenyika. Uchava moto moto usingadzimurike.”

²¹Zvanzi naTenzi wehondo nehondo, iye Mwari weIsiraeri, “Wanziridzai zvenyu iyo mipiro yenyu yokupisa kututsira zvibayiro zvenyu muchidya nyama dzacho.

²²Chiripo ndechokuti musi wandakavaburitsa munyika yeIjipiti, handina ini kutaurira madzitateguru enyu kana kuvapa somurao nezvemipiro yokupisa kana nezvezvibayiro.

²³Asi chandakavapa somutemo ndechichi chokuti, “Teererai zvandinoreva ini ndichava Mwari wenyu imi muchava vanhu vangu mufambe nenzira dzandakareva kuti zvikunakirei.

²⁴Asi havana kuteerera kana kurerekera nzeve dzavo. Vakatotevedza zvomusoro wavo nemwoyo yavo yakapanduka yakaipa vakadzokera shure kunze kwokuti vatoenda mberi.

²⁵Kubvira zuva rakabuda madzitateguru enyu munyika yeIjipiti kusvikira pari nhasi, ndanga ndichingovatumira varanda vangu vose vaporofita mangwana mangwana.

²⁶Asi havana kumbonditeerera kana kurerekera nzeve dzavo. Vakatoomesa musoro vakatoita zvakaipa kupinda madzibaba avo.

²⁷“Ipapo uchataura zvako mazwi ose iwaya kwavari asi havambokuteerera. Uchavashevedza zvako asi havambokudavira.

²⁸Asi unofanira kuvataurira kuti, rudzi urwu, rudzi rwavanhu vasingateereri zvinotaura Tenzi, Mwari warwo, rudzi rwavanhu vasingadzoreke. Mavari, chokwadi chakapera, pamuromo pavo hapachambobuda chokwadi.

²⁹“Vevurai vhudzi renyu murirase, tangai kuungudza pamitunhu yakatunhumara nokuti Tenzi aramba akafuratira chizvarwa ichi chevanhu ava chaachapedzera shungu dzehasha dzake.

³⁰“Chiripo ndechokuti, vokwaJudha vakaita zvakaipa mumaziso mangu, ndizvo zviri kutaura Tenzi. Vakaisa zvinosemesa mumba inodaidzwa nezita rangu kuin'oresa.

³¹Vakavakawo nzvimbo yakatunhumara yokuteurira kuBisiro[7] nzvimbo iri mubani roMwanakomana wokwaHinomu pokupisira sechibayiro vanakomana vavo navanasikana vavo mumoto. Izvozvo zvinhu zvandisina kumbotema ini uye hazvina kana kumbouya mupfungwa dzangu.

³²Naizvozvo, chinzwa, zvanzi naTenzi kuchasvika mazuva aisiri kuzombonzizve kuBisiro kana kunzi kuBani reMwanakomana wokwaHinomu. Asi kuchatonzi kuBani rokuDeurirwa ropa, nokuti vachatoviga vanhu kuBisiro ikoko pamusana pokuti kumwe kose kuchange kusisina nzvimbo.

³³Uye zvitunha zvavanhu ivava zvichave chokudya cheshiri dzedenga nezvikara zvenyika pasina anozvidzinga.

³⁴Ndichagumisa mumaguta okwaJudha nomumigwagwa yeJerusaremu chikwe-e chokuseka kana mheremhere yokufara nokupemberera mwenga kana kufarira murume wacho pamusana pokuti nyika ichasara isisina chinhu.”