Read Bhaibhiri Idzva rechiShona Kuungudza 2 Bible Online

Kuungudza 2 - Bhaibhiri Idzva rechiShona bible

Kuungudza 2

¹Pamusana pehasha dzake Tenzi, kukwidibira here ikoko kwamakaita Jerusaremu negore! Akapatitsira pasi kubva mudenga chinonzi mbiri yaIsiraeri ichocho. Pazuva rehasha dzake haana kuyeuka chitambarariko chetsoka dzake.

²Tenzi zvaasina kuitira tsitsi vagari vose vokwaJakobho akavaparadza akakoromora nehasha nhare dzokuzvidzivirira nadzo muhondo dzemisha yokwaJudha. Akaputsira pasi nyika nevatongi vayo akadzinyadzisa.

³Akaparadza nehasha simba rose reIsiraeri. Rubatsiro rwake akarega kuvapa, izvozvo muvengi achiuya. Akapisa, somoto, vokwaJakobho akaroromesa nharaunda yose.

⁴Akakunga uta hwake somuvengi, rudyi rwake rwateya kune mhandu. Akauraya vanhu vapamwoyo pedu akaviruka nehasha somoto muJerusaremu.

⁵Tenzi aita somuvengi; aparadza Isiraeri, aparadza mizinda yayo yose. Nhare dzayo dzokuzvidzivirira nadzo muhondo, akadziita matongo zvawo. Akawanziridza muJerusaremu[4] kuchema nokuungudza.

⁶Akaparadza musasa[5] wake somusasa womubindu achiita kuti nzvimbo yamazuva ake makuru ive dongo. Tenzi zvamazuva makuru namaSabata akazvimisa. Madzimambo navapristi akavazvidza pamusana pehasha dzake dzinotyisa.

⁷Tenzi akashora atari yake. Akaramba Nzvimbo yake Inoera. Tsvingo dzemizinda yake akadziisa mumaoko avavengi. Mumba yaTenzi makaitwa ruzha sapazuva guru rakatemwa.

⁸Tenzi akatema zvokuita kuti rusvingo rweJerusaremu[6] ruve dongo, akaiganhura netambo rutivi rwaakanyatsoparadza. Nhare norusvingo zvakaungudza zvikadhirika pamwechete.

⁹Misuo yaro mikuru yakanyura muvhu akaondonga nokutyora zvihuri zvaro mambo waro namachinda aro vari mukati mevechirudzi. Zvomutemo hapachisina; vaporofita havachawana zvavanooneswa naTenzi.

¹⁰Vakuru vakuru veJerusaremu vanogara pasi vakanyarara vakazvidira ivhu mumusoro vakapfeka masaga, vasikana veJerusaremu vakakotamisa misoro yavo pasi.

¹¹Maziso angu aneta nokuchema, iyeni pachangu ndadumbirwa shungu dzandipedza mwoyo pamusana pokuparadzwa kweguta[7] ravanhu vangu nokuti vacheche netusvava twuri kuziya mumigwagwa yomuguta.

¹²Vanochema kunana amai vavo vachiti, “Chingwa newaini zviripi pavanoziya kudaro savarume vakuvadzwa mumigwagwa yeguta vachitandadza vari pamakumbo amai vavo.”

¹³Ndoti kudiiko kwauri ndokuenzanisa neiko iwe guta[8] reJerusaremu? Ndokufananidza neiko kuti ndikunyaradze iwe mhandara tsvene yeZioni nokuti sokukura kwakaita gungwa ndokukurawo kwakaita kuparadzwa kwako. Ndiani angakudzorere pakare?

¹⁴Vaporofita venyu vaikuonerai zviratidzo zvenhema zvokunyengedza. Uipi hwenyu havana kuhuburitsa pachena kuti zvakanaka zvenyu zvidzokere kwamuri; vakakuonerai zviratidzo zvenhema zvinokutungamirirai kusiri iko.

¹⁵Vose vanopfuura nenzira vanorovanisa maoko; vanoridza tsamwa vachidzungudza musoro kuguta reJerusaremu, vachiti, “Ndiro guta riya here iri rainzi rakanakisisa kwazvo rinopa rufaro pasi pose.”

¹⁶Vavengi vako vose vanokusveeredza vachiridza tsamwa vachikunyinurira mazino. Vanotodanidzira vachiti, “Takariparadza; ndiro zuva rataimirira zvino tavanaro, tinoriona.”

¹⁷Tenzi akaita zvaakanga aronga akaita zvaakamboyambira sokutema kwaakanga azviita pasi chigare. Akapaza zvisina tsitsi akaita kuti muvengi afare nezvakaitika kwauri, akasimudzira pamusoro simba ravavengi vako.

¹⁸Mwoyo yavanhu inochema kuna Tenzi iwe rusvingo rweJerusaremu misodzi yako ngaiyerere serwizi siku nesikati usazorore kana kuzorodza maziso ako.

¹⁹Simuka ucheme usiku pakutanga panguva dzakasiyana-siyana dzokugaririra, durura zviri pamwoyo pako semvura mberi kwaTenzi. Simudzira maoko ako kwaari kuitira upenyu hwavana vako vari kurezuka nenzara pakona yoga yomugwagwa.

²⁰Tarisai muone zvenyu, Tenzi kuti ndiani chaizvo wamuri kuitira izvozvi. Madzimai adye here mapudzi avo, vana vavo chaivo vavanochengeta nerudo kana kuti vapristi navaporofita vauraiwe muNzvimbo Inoera yaTenzi.

²¹Panze zvapo vakuru navadiki hero gatakata. Mhandara nemajaya vakauraiwa nebakatwa pazuva rehasha dzenyu pamakavauraya muchavakatakazha zvisina tsitsi.

²²Makakoka kubva kumativi ose zvinotyisa sokunge pane, zuva guru rakatemwa iyi yakanga iri nguva yenyu yehasha, Tenzi. Hapana aipapunyuka ipapo kana kupararama vandairezva vacho ndichirera vavengi vangu vakavaparadza zvavo.