Read Bhaibhiri Idzva rechiShona Kuungudza 3 Bible Online

Kuungudza 3 - Bhaibhiri Idzva rechiShona bible

Kuungudza 3

¹Ini ndiri munhu ndakaziva nhamo neshamhu yehasha dzaMwari.

²Akandidzinga akandiendisa murima kwete muchiedza.

³Anonditendeudzira atendeudzazve shamhu yake muswere wose.

⁴Akaita kuti ndiperezeke muviri neganda rangu zviperezeke; akandityora mapfupa.

⁵Akandikomberedza akandiputira nenhamo namatambudziko.

⁶Akandigarisa murima savafi vepasi chigare.

⁷Akandipoteredza nechidziro zvokuti handikwanise kupunyuka, akandisunga nengetani dzake dzinorema.

⁸Kunyange ndikachema ndichikumbira kubatsirwa kunamata kwangu akakuvhariridza.

⁹Akadzivirira nzira dzangu namabwe akavezwa akamonyorotsa nzira dzangu.

¹⁰Kwandiri akaita sebere rakavandira uye seshumba yakahwanda.

¹¹Akanditsautsa munzira yangu akandibvadzura-bvadzura akandisiya ndachiti dano!

¹²Akakunga uta hwake, chaainanga chacho ndini.

¹³Akandinanga pakaipa nemiseve yegoba rake.

¹⁴Ndakave chiseko chevanhu vose ndikave rumbo kwavari muswere wose.

¹⁵Akandigutsa nezvinovava akandiraradzisa negavakava.

¹⁶Akaita kuti mazino angu agejere namatombo akandiumburudza kumadota.

¹⁷Akandibvisira paupenyu chinounza rugare, ndakatokanganwawo chinonzi kugarika.

¹⁸Saka ndichiti zvangu zvomukurumbira wangu zvakapera uyewo zvandaitarisira kuna Tenzi zvakapera.

¹⁹Ndikafunga nhamo namatambudziko angu ini, igavakava nenduru zvayo.

²⁰Ndinoramba ndichingozvifunga iwe, uye ndave hotakota mukati mangu.

²¹Asi izvi ndicharamba ndichizviyeuka uye zvichandipa chitarisiro ndezvizvi zvokuti:

²²Mwoyochena waTenzi hauperi tsitsi dzake hadziperi.

²³Mangwanani oga oga zvinenge zviri zvitsva. Kutendeka kwenyu kwakakura.

²⁴Ini ndinoti Tenzi ndiye nhaka yangu, naizvozvo ndiye chitarisiro changu.

²⁵Tenzi akanaka kuna vanomumirira kumunhu anomutsvaka.

²⁶Chinhu chakanaka kumirira ruponeso rwaTenzi chinyararire.

²⁷Chinhu chakanaka kuti munhu atakure joko rake achiri mudiki.

²⁸Ngaagare pasi chinyararire nokuti ndiMwari anenge ariisa paari.

²⁹Ngaaise zvake muromo wake pavhu zvichida pane chitarisiro chichiripo.

³⁰Ngaaperekere zvake dama rake kune anorova ashorwe zvake zvizere.

³¹Nokuti Tenzi haarase munhu zvachose.

³²Anogona kurwadzisa zvake asi ane tsitsi maererano nokuwanda kwemwoyochena wake.

³³Hachisi chinhu chinomufadza kutambudza kana kurwadzisa vanhu.

³⁴Zvokuti vasungwa vose vapasi pose vatsikwe-tsikwe pasi petsoka;

³⁵kana kurega kupa munhu zvaanokodzera, zvaanemvumo nazvo pamberi paWokumusorosoro

³⁶kana kusatonga mhosva dzavanhu zvakanaka izvozvi izvi Tenzi haazvidi.

³⁷Ndiani angati chinhu ngachiitike chichibva chaitika kusatoti Tenzi ada kuti chiitike.

³⁸Zvingave zvinhu zvakanaka kana zvakaipa handiti zvinenge zvatobva mumuromo woWokumusorosoro here?

³⁹Chero munhu ari mupenyu chete anganyunyutirei kana achirangirwa zvitadzo zvake.

⁴⁰Ngatitarisei tiongorore nzira dzedu tidzokere kuna Tenzi.

⁴¹Ngatisimudzirei mwoyo yedu namaoko edu kuna Mwari kudenga tichiti,

⁴²“Takatadza tikapanduka; asi imi hamuna kuregerera.

⁴³Makamonerwa nehasha mukatironda muchiuraya zvisina tsitsi.

⁴⁴Makazviputira imi negore zvokuti hapana munamato unogona kupfuura.

⁴⁵Makatiita zvinhu zvisina maturo namarara pakati pavanhu.

⁴⁶“Vavengi vedu vanotisveeredza.

⁴⁷Kutya nehunza kwatiri zvauya uye kupera nokuparadzwa.

⁴⁸Maziso angu anoyerera hova dzemisodzi pamusana pokuparadzwa kweguta[9] ravanhu vangu.

⁴⁹“Maziso angu acharamba achingosvimha misodzi pasina zvokumbomira.

⁵⁰Kusvikira Tenzi atarisa kubva kudenga azviona.

⁵¹Zvandinoona zvakaitika kuvakadzi vose veguta rangu zvinondirwadza.

⁵²“Ndakavhimwa ndavhimwazve seshiri navakanga vari mhandu dzangu pasina chikonzero.

⁵³Vakandipinza mugomba ndiri mupenyu vakakungurutsira dombo pandiri.[10]

⁵⁴Mvura yakandikwidibira musoro ndikati ndaparara ini.

⁵⁵“Ndakakudaidzai nezita imi Tenzi, ndiri pasi pegomba.

⁵⁶Makanzwa imi chichemo changu musadzivire nzeve yenyu pandinochemera rubatsiro.

⁵⁷Makauya pedyo pazuva randakadanidzira kwamuri mukanditi, ‘Usatye.’

⁵⁸“Makaita hanya nezvenyaya yangu, Tenzi mukanunura upenyu hwangu.

⁵⁹Imi Tenzi makaona zvakaipa zvakaitwa kwandiri. Ndienzanisireiwo nyaya yangu.

⁶⁰Makaona, imi, kutsividza kwavo kwose netwavaindirongera.

⁶¹“Makanzwa imi Tenzi kunyomba kwavo netwose twavanondirongera vanondinyeya nokundifungira

⁶²vavengi vangu vanondinyeya vachindifungira muswere wose wezuva.

⁶³Kunyange pavanenge vagere zvavo kana kuti pavanenge zvino vamira ini ndini ndinongova rumbo rwavo.

⁶⁴“Tenzi, dai mukavadzorera maererano nezviito zvamaoko avo.

⁶⁵Vaomeserei mwoyo muvarengerere rushambwa.

⁶⁶Muvadzingirire nehasha muvaparadze imi Tenzi, mudenga imomo.”