Read Bhaibhiri Idzva rechiShona Kuungudza 5 Bible Online

Kuungudza 5 - Bhaibhiri Idzva rechiShona bible

Kuungudza 5

¹Yeukai, Tenzi zvakatiwira, mutarisewo zvenyu muone kunyadziswa kwedu.

²Nhaka yedu yashanduka yava yavatorwa, dzimba dzedu dzava dzamabvakure.

³Taita senherera dzisina baba; vanaamai vedu vaita sechirikadzi.

⁴Tavakutobhadhara mvura yatinonwa, huni dzatinowana totoita dzokutenga.

⁵Nejoko redu pamutsipa iwe, tinochairwa zvakaomarara uye taneta, zororo hatipiwi.

⁶Takaombera maoko isu kuvaIjipiti nokuvaAsiria kuti tiwane chokudya chakakwana.

⁷Madzitateguru edu akatadzira Mwari zvino havachisipo; asi isu ndisu tava kutakura mutoro wouipi hwavo.

⁸Tava kutongwa isu navaranda, wokutinunura kwavari hapana.

⁹Chokudya chedu tinochiwana nenhamo. Pamusana pehondo yebakatwa inobva kurenje'ku.

¹⁰Ganda redu ratumha kupisa sehovhoni pamusana pokupisa kwaita nzara.

¹¹Vakadzi vari kubhinywa muZioni'mu, mhandara dzichibatwa chibharo mumaguta okwaJudha.

¹²Machinda ari kurembedzwa akasungirirwa maoko; vakuru-vakuru rukudzo havachapiwaba.

¹³Majaya vanofondokeswa naro basa pamakuyo, vakomana vachidhadharika nawo masvinga ehunhi.

¹⁴Harahwa matare dzakaasiya vechidiki vakasiyawo zvokuimba.

¹⁵Rufaro rwatibva mumwoyo; kudzana kwedu kwasanduka kukava kuchema.

¹⁶Ndaza yakudubuka mumusoro medu; hamhenoka zvedu iyesu nokutadzira Mwari kwedu ikoku.

¹⁷Pamusana pazvo tinorwadziwa mwoyo, pamusana paizvozvo maziso tavakuonera madzerere.

¹⁸Guta reZioni rangove guta, ndomava mumusha memakava.

¹⁹Asi imi Tenzi munotonga nokusingaperi; chigaro chenyu choushe chinoramba chiripo kwezvizvarwa nezvizvarwa.

²⁰Munotikanganwireiko nokusingaperi munotirasireiko kwenguva yakareba kudai?

²¹Tidzorerei kwamuri Tenzi kuti tidzokere pakare. Vandudzai mazuva edu ave sakare.

²²Kana kuti mabva matiramwa zvachose here; uye hasha dzenyu dzakanyanyisa here?