Read Bhaibhiri Idzva rechiShona Ezekieri 16 Bible Online

Ezekieri 16 - Bhaibhiri Idzva rechiShona bible

Ezekieri 16

¹Izwi raTenzi rakauyazve kwandiri richiti,

²“Iwe mwanakomana womunhu zivisa Jerusaremu unyangadzi hwaro hwakan'ora.

³Uti zvanzi naTenzi Mwari kuJerusaremu, kunyika yeKenani ndiko kwawakabva, ndiko kwawakaberekerwa. Baba vako vaiva muAmori, amai vako vaiva muHiti.

⁴Maberekerwo ako ndiwaya aya, pamusi wawaberekwa rukuvhute rwako haruna kuchekwa hauna kushambidzwa mumvura kuti uchene. Hauna kana kukwizwa munyu kana kuputirwa namachira.

⁵Hapana akambokuitira tsiye nyoro kuti akuitire kana chimwe chinhu zvacho chaizvozvi pamusana petsitsi kwauri. Asi wakatoraswa pachenachena musango nokuti waisemwa pamusi wawaberekwa.

⁶“Pandakapfuura nepawaiva ndakakuona uchitakanyika muropa rako. Uri muropa rako kudaro, ndakati rarama

⁷ukure sechinhu chinomera musango. Wakakura ukareba ukasvika pakutova mhandara. Mazamu ako akabuda, bvudzi rako rikakura asi wakanga uri mutwi, usina chawakapfeka.

⁸“Ndakazopfuura zvakare nepawaiva ndikakutarisa. Izvozvo wanga wasvika pazera rokuda zvokuroorwa ndakatambanudzira hanzu yangu pauri ndikakufukidza muviri wako waiva mutwi. Ndakaita chitsidzo changu kwauri ndikaita chitenderano newe; ndizvo zviri kutaura Tenzi Mwari, iwe ukabva wava wangu.”

⁹“Ndakazokushambidza nemvura ndichikushambidza ropa pauri ndikakuzora mafuta.

¹⁰Ndakakupfekedza nguo dzakarukirirwa ndikakupfekedza shangu. Ndakakupfekedza shangu dzeganda rembiti yakanakisisa ndikakupfekedza nesirika.

¹¹“Ndakakushongedza zvakanakisisa nezvishongo ndikaisa makoza mumaoko ako netimbwa[9] kechuma.

¹²Ndakaisa mhete mumhuno mako ndikakupfekedza mhete munzeve dzako. Ndakakugadza ndaza yakanakisa mumusoro.

¹³“Saizvozvo wakashongedzeka nendarama nesirivha. Zvipfeko zvako zvakanga zviri zverineni yakanakisisa nesirika namachira akarukirirwa. Waidya upfu hwekoroni hwakatsetseka nouchi namafuta. Wakabva wava nechimiro chakanakisisa kwazvo. Ukaita mambo chaiye wechikadzi.

¹⁴Mbiri yako yakadhumha mukati memarudzi avanhu pamusana porunako rwako nokuti rwakanga rwuri runako chairwo ruzere pamusana peururami hwandakanga ndakupa. Ndizvo zvinotaura Tenzi Mwari.

¹⁵“Asi wakavimba norunako rwako ukaita unzenza pamusana pembiri yako ukaita unzenza ihwohwo nomupfuuri nenzira ari wose.

¹⁶Wakatora dzimwe dzehanzu dzako ukadzishandisa kushongedza zvinoyemurika nzvimbo dzako dzokunamatira. Panzvimbo idzodzo wakaitira unzenza hwako ipapo. Hapana zvakadaro zvati zvamboitika kana zvichambofa zvakaitika kudaro.

¹⁷Wakatorawo iwe zvishongo zvako zvakanaka zvendarama yangu nesirivha yangu zvandainge ndakupa, ukazvishandisa kuzvigadzirira zvifananidzo zvevanhu ukaita zvounzenza nazvo.

¹⁸Wakatora iwe dzimwe dzehanzu dzako dzakarukirirwa uchizvishongedza nadzo uchipira mafuta angu norusenzi rwangu kwazviri.

¹⁹Chokudya chandakupa chaiti upfu hwakatsetseka hwandaikupa kuti udye namafuta nouchi wakandozvipira kwazviri somupiro unonhuwirira. Ndizvo zviri kutaura Tenzi Mwari.

²⁰Wakatora iwe vana vako vakomana navasikana vawakandiberekera ukavapira kuti vadyiwe zvavo. Ihwo hunzenza hwako ihwohwo hudiki nhai,

²¹hwokuti wakauraya vana vangu ukavapira kwazviri somupiro unopiswa nomoto?

²²Muzvinhu zvako izvozvo zvinosemesa nomuunzenza hwako hauna kurangarira mazuva ako epaucheche pawakanga uri mutwi usina chawakapfeka uchitakanyika uri muropa rako.

²³“Mushure mouipi hwako hwose uhu, (zvichakuwana zvako, ndizvo zviri kutara Tenzi Mwari).

²⁴Wakatozvivakira mupanda chaiwo nenzvimbo dzakatunhumara dzokuteurira munhandare yoga yoga.

²⁵Pakona yomugwagwa woga woga wakazvivakira nzvimbo dzakatunhumara dzokuteurira ukan'oresa noufeve runako rwako uchizarurira makumbo mupfuuri nenzira wose wose wonyanya nahwo hufeve hwako.

²⁶Wakaitawo ufeve iwe navaIjipiti ivo vavakidzani nemi voruchiva ava uchinyanya nahwo hufeve hwako kuti undishatirise.

²⁷“Saka naizvozvo chinzwa, ndakusimudzira shamhu muruoko ndichikutapudzira mugove wako wawakagoverwa ndichikuisa mumaoko mavavengi vako vana makaro, vanasikana vevaFirisitia, ivo vaitonyara nokuita kwako kwoufeve.

²⁸“Pamusana pokuti hauguti wakaita unzenza navaAsiria. Wakaita unzenza navo iwe asi kuguta hauna kuguta.

²⁹Wakanyanya nahwo hunzenza hwako nenyika youshambadzi yeKaridhea. Kunyange izvozvi hazvina kukugutsa.”

³⁰Zvanzi naTenzi Mwari, “Chakurwadza mwoyo ukadai chii zvokuti kunyange zvazvo uchionawo kuti zvose izvi, zviito zvenzenza chaiyo yokupedzesera,

³¹uchizvivakira mupanda chaiwo pakona yomugwagwa woga woga uchigadzira nzvimbo dzako dzakatunhumara dzokuteurira munhandare yokutandarira yoga yoga. Asi iwe hauna kuita sepfambi, unotoramba zvako muripo wacho.

³²Uri chifeve chaicho chomukadzi chinotorana navatorwa chichisiya murume wacho.

³³Varume ndivo vanobhadhara pfambi, vanhu vanotopa zvipo. Asi iwe ndiwe urikutopa zvipo kuzvikomba zvako zvose kuti vauye kwauri vachibva kumativi ose kuzoita upombwe newe.

³⁴Saka iwe wakasiyana chaizvo navamwe vakadzi muunzenza hwako. Hapana akakutsvetera kuti uite zvounzenza. Wakatopa muripo asi iwe muripo hauna kupiwa. Saka wakasiyana navamwe.”

³⁵Nezvo chinzwa iwe pfambi zviri kutaura Tenzi,

³⁶zvanzi naTenzi Mwari, “Pamusana poruchiva rwako rwakawanda wakazvipfekenura ukasara usisina chawakapfeka muunzenza hwako nezvikomba zvako uye pamusana pezvifananidzo zvako zvokunamata uye pamusana peropa ravana vako rawakapira kwazviri.

³⁷Naizvozvo, chiona, ndichaunganidza zvikomba zvako zvose zvawakazvifadza nazvo; zvikomba zvawaida nazvose zvawakanga usingadi. Ndichavakokorodza kumativi ose vakurwise ndigokupfekenura kuti vakuone zvawakaita uri mutwi.

³⁸Ndichakutonga sezvinoitwa vakadzi vanorambana navarume vavo uye savakadzi vanenge vadeura ropa. Ndichadeurawo ropa rako ndichikutsividzawo ndiine hasha neshanje.

³⁹Ndichakuisa mumaoko ezvikomba zvako. Ivo vachaputsira pasi mupanda wako vagowondomorera pasi nzvimbo dzako dzakatunhumara dzokuteurira. Vachakupfekenura hanzu dzako vachitora zvishongo zvako zvakanaka vachikusiya usina chawakapfeka, uri mutwi.

⁴⁰“Vachakuvinga nehondo yavarwi, vachikutaka namatombo vachakuita kanyama kanyama namapakatwa avo.

⁴¹Vachapisa dzimba dzako vachikuranga vakadzi vazhinji vachizviona. Ndichaita kuti zvounzenza uzvirege uyewo zvokupa zvipo kuzvikomba zvichabva zvapera.

⁴²Ndiko kupedzera hasha dzangu pauri kwandichaita. Kuva neshanje newe kunobva kwapera. Ndichabva ndagadzana mwoyo uye handichazoshatirwazve.

⁴³Pamusana pokuti hauna kuyeuka mazuva apauduku hwako asi kutoti wakandishatirisa nezvinhu izvozvi zvose, naizvozvo chinzwa, ini ndichakurangirawo zviito zvako. Ndizvo zviri kutaura Tenzi Mwari. Hauna here kupara mhosva younzenza pamusoro pezvimwe izvi zvose zvinosemesa zvaunoita.”

⁴⁴“Munhu wose wose anenge avakuzoda kutaura tsumo achishandisa tsumo iyi nezvako achiti ‘Mbudzi kudya mufenje kufana nyina.’

⁴⁵Iwe uri mwanasikana chaiye waamai vako vanovenga murume wavo navana vavo. Uri munun'una chaiye wavakoma vako vaivenga varume vavo navana vavo. Amai vako vaiva muHiti, baba vako vaiva muAmori.

⁴⁶Mukoma wako ndiSamaria aigara navana vake vasikana kuchamhembe kwako. Munun'una wako aigara kumaodzanyemba kwako ndiSodhomu navana varo vasikana.

⁴⁷Asi hauna kuda kutevera nzira dzavo chete kana kuita zvinhu zvavo zvinosemesa asi kutoti nakanguva kaduku wakanga watoshata kupinda ivo mumaitiro ako ose.

⁴⁸“Hezvino ndakadai, ndizvo zviri kutaura Tenzi Mwari, munun'una wako Sodhomu navana vake vasikana havana kuita sezvawakaita iwe navanasikana vako.

⁴⁹Chiona, iyi ndiyo mhosva yakanga iri yomunun'una wako Sodhomu. Iye navanasikana vake vaizvikudza, vaine zvokudya zvakawandisa nokugarika vari vanhu vari pamutambaratede asi haana kubatsira varombo nevaiva muushai.

⁵⁰Vaizvikudza vachiita zvinhu zvinosemesa mumaziso angu naizvozvo ndakavabvisa pandakazviona.

⁵¹“Pazvitadzo, Samaria haina kumboita hafu yezvako. Iwe wakaita zvinosemesa zvakawanda kupinda Samaria. Wakatoita kuti mukoma wako aite somururami pamusana pezvinosemesa zvawakaita.

⁵²Zvino newewo unofanira kunyara nokuti wakatoita kuti mukoma wako nomunun'una wako vaite savarurami pamusana pezvitadzo zvako zvawakaita zvinosemesa kupinda zvavo. Ivo vanotova varurami kudarika iwe saka nyarawo iwe utakurane nenyadzi dzako nokuti wakaita kuti mukoma wako nomunun'una wako vaite savarurami panewe.

⁵³“Ndichadzorera zvakare kubudirira kweguta reSodhomu nemisha yaro[10] nokubudirira kweSamaria nemisha yayo. Ndichaita kutiwo kubudirira kwako kudzokere pakare mukati mavo.

⁵⁴Uku kunenge kuri kuitira kuti ufumuke unyare nezvose zvawakaita uchizova chinhu chinovanyaradza.

⁵⁵Kana zviri zvomukomanomunun'una newe; Sodhomu navanasikana varo richadzokera richiva zvaraiva riri kare Samariawo navanasikana varo[11] richadzokerawo kuva zvarakanga riri. Newewo navanasikana vako uchadzokerawo kuva zvawakanga uri.

⁵⁶Pamazuva ako awaizvitutumadza, munun'una wako, Sodhomu, akanga asiri chiseko pamuromo pako here

⁵⁷iwe kuipa kwako husati hwabuda pachena? Iye zvino wangoitawo saiye, wava chiseko chemisha yeEdhomu navavakidzani nemisha yavaFirisitia vari munharaunda yako vanokushora.

⁵⁸Unofanira kutakura mutoro wokuipa kwako nezvinhu zvako zvinosemesa.” Ndizvo zviri kutaura Tenzi.

⁵⁹Chiripo ndechokuti zvanzi naTenzi Mwari, “Ndichaita kwauri sekuitawo kwawakaita iwe wakashora mhiko nokutyora kwawakaita chitenderano.

⁶⁰Asi ndinoyeuka chitenderano changu newe pawakanga uchiri muduku. Ndichaita newe chitenderano chokugara nokugara.

⁶¹Ndipo pauchayeuka maitiro ako uchinyara pandinenge ndatora mukoma wako nomunun'una wako vose vari vaviri ndichizovapa kwauri savanasikana vako asi kwete pamusana pechitenderano changu newe.

⁶²Ndichaita chitenderano changu newe. Uchabva waziva kuti ndini Tenzi.

⁶³Ndinenge ndichiitira kuti uyeuke udumbirwe nazvo urege kuzofa wakazarura muromo wako zvakare pamusana penyadzi dzako pandinenge ndakuregerera zvose zvawakaita.” Ndizvo zviri kutaura Tenzi Mwari.