Read Bhaibhiri Idzva rechiShona Ezekieri 17 Bible Online

Ezekieri 17 - Bhaibhiri Idzva rechiShona bible

Ezekieri 17

¹Izwi raTenzi rakauya kwandiri richiti,

²“Iwe mwanakomana womunhu, rondedzera dimikira, utaure nomuenzaniso kuimba yeIsiraeri.

³Iti zvanzi naTenzi Mwari, “Rimwe gondo guru rina mapapiro makuru rine minhenga mirefu yakawanda ina mavara-mavara rakaenda kuRebhanoni rikatanha musoro womuti womusidhari.

⁴Rakatanha kapazi kapamusoro-soro chaipo rikakatakura kunyika yevemhindu dzokutengeserana. Rakanokaisa muguta ravashambadzi.

⁵Gondo rakatorawo mhodzi yomunyikamo rikaidyara muvhu rakaorera, rakaidyara munyasi memvura zhinji sekusimwa kunoitwa kapazi komuti womusambangwena.

⁶Mhodzi iya yakabuda ikava mugirepisi unoti unotanda napasi. Mapazi awo akakwira mudenga; akakura akananga kugondo riya. Midzi yawo yakadzika pasi. Saizvozvo wakava mugirepisi wakaita mapazi ukaita pfumvudza.

⁷Asi pakanga paine rimwezve gondo guru rina mamapiro makuru rine minhenga yakawanda. Zvino mugirepisi uya wakanangisa midzi yawo kwariri mugirepisi wakarerekera mapazi awo kwariri kuti gondo riudiridze. Gondo iri rakautora ipapo

⁸rikandousima pavhu rakanaka pane mvura yakawanda kuti uite mapazi akawanda ubereke muchero, uvewo mugirepisi wakanakisisa.

⁹“Taura uti zvanzi naTenzi Mwari, ‘Ucharara here? Gondo irori haiudzuri here richiutyora mapazi awo. Zvokuti pfumvudza dzawo dzinouna. Haumboda ruoko rwakasimba kana kuti vanhu vakawanda vokuudzura nemidzi.’

¹⁰Nhaimi, kana ukabviswa ipapa ukasimwa pamwe unorarama here? Haubva wanyatsouna here? Kana mhepo yokumabvazuva ikauvhuvhuta uchibva wauna panzvimbo ipapo pawasimwa.”

¹¹Izwi raTenzi rakazouya kwandiri richiti,

¹²“Taurira imba yakapanduka iyi kuti, ‘Hamuzivi here zvinoreva zvinhu izvozvi? Vataurire kuti Mambo weBhabhironi akauya kuJerusaremu akatora mambo waro namachinda aro akaenda navo kuBhabhironi.’

¹³Akatora mumwe wokumba huru semhodzi akaita chitenderano naye achimuita kuti apike nemhiko. Vakuru-vakuru vaakanga atora,

¹⁴akavatorera kuti nyika iyo ininipiswe irege kusimudza musoro. Uye kuti nokuchengeta kwainenge yaita chitenderano chake naye ikwanise kuramba imire.

¹⁵Asi akamupandukira nokutumira kwakaita nhume dzake kuIjipiti kuti imupe mabhiza nehondo huru. Achabudirira here? Munhu anoita zvakadai angapunyuke here? Anogona kutyora chitsidzirano achizopunyuka here?

¹⁶“Hezvino ndakadai, ndizvo zviri kutaura Tenzi Mwari, munhu uyu akarega kufira mukati imomo meBhabhironi, munzvimbo yacho yamambo akamugadza umambo ane chitsidzirano chaakashora uye ane chitenderano naye chaakatyora handisirini.

¹⁷Farao nehondo yake huru navanhu vazhinji haangagoni kumubatsira muhondo paye panenge paitwa mudhuri vatutira mavhu kurusvingo kuritenderedza kuita chokupindamo nacho kuti vauraye vanhu vazhinji,

¹⁸nokuti akazvidza mhiko akatyora chitenderano, asi akatosimudza ruoko kupika, pedzepo woita zvose izvi, haambopunyuki.”

¹⁹Naizvozvo zvanzi naTenzi Mwari, “Hezvino ndakadai, ndikarega ini kuti chitsidzirano changu chaakashora, nechitenderano changu naye chaakatyora zvimupfukire, handisirini.

²⁰Ndichamukanda mambure angu omuti mbunde-mbunde kumubata ndigoenda naye kuBhabhironi ndigomupinza dare ikoko nemhosva yokusatendeseka kwake kwandiri.

²¹Nyanzvi chaidzo dzevarwi vake vehondo vachafa nebakatwa; vanenge vapunyuka vachiti mwarara kumativi ose. Iwe uchabva waziva kuti ndini Tenzi ndazvitaura.”

²²Zvanzi naTenzi Mwari, “Iyeni pachangu ndichatanhawo pabazi rapamusorosoro chaipo pomuti murefu womusidhari bukira. Ndichatanha richiri idzva-idzva rapamusoro-soro penzvanzvana dzamapazi awo iyeni pachangu ndichirisima pamusoro pegomo rakakwirira refu-refu.

²³Ndicharisima pakakwirira mugomo reIsiraeri kuti uve nemapazi ubereke muchero uve musidhari wakanakisisa. Pasi pawo pachizogara mhuka dzamarudzi namarudzi, mumumvuri mawo shiri dzemhando nemhando dzichizoita matendere adzo.

²⁴Miti yose yesango ichaziva kuti ini Tenzi ndinopfupikisa muti murefu ndichirebesa muti mupfupi. Ndinoomesa muti munyoro ndichipfumvudzisa muti wakaoma. Ndini Tenzi ndazvitaura uye ndichazviita.”