Read Bhaibhiri Idzva rechiShona Ezekieri 19 Bible Online

Ezekieri 19 - Bhaibhiri Idzva rechiShona bible

Ezekieri 19

¹Chiimba rwiyo rwokuungudza kuchema machinda eIsiraeri

²uchiti: “Ii-i amai vako vaiva shumba chaiyo pane dzimwe shumba, yaiti pasi hwatata pakati peshumba diki ichirera vana vayo.

³“Yakayarutsa mumwe mwana wayo akava mukono uchiri kuzvinzwa, yakadzidza udzimba hwokubata nyama ikadya vanhu.

⁴Runyerekupe rwezvazvo rwakazengezanwa mumarudzi, yakawira muhunza yavo. Vakaiendesa iine zvikochekero kunyika yeIjipiti.

⁵“Payakaona kuti zvayaitarisira zvaponga, chitarisiro chayo chapera, yakatora mumwe mwana wayo ikamuita kuti ave chimukono cheshumba.

⁶Chaizvikakanyadza mukati medzimwe shumba chikava chimukono chaicho cheshumba, yakadzidza udzimba hwokubata nyama yakava yokudya vanhu.

⁷Yakabvongodza munhare dzavo dzokuhwanda muhondo, ikaparadza maguta avo; nyika navagari vomo ikashaya pokuisa mwoyo nokutya payainge yodzvova.

⁸“Marudzi akaiteya kumativi ose. Vakaikanda mambure avo ikabva yabatwa muhunza yavo.

⁹Iine zvikochekero kudaro vakaipfigira muchizarira vakaiendesa kuna mambo weBhabhironi vakaizaririra muchitokisi kuti pasave neanonzwa izwi rayo mumakomo eIsiraeri.

¹⁰“Amai vako vaiva somugirepisi wakarimwa mumunda wamagirepisi wakasimwa pedyo nemvura unowa michero wakati mapazi sarara pamusana pemvura zhinji.

¹¹Mapazi awo akaita hunde akakura kuita tsvimbo dzoumambo, wakareba mudenga nomukati megwindingwi ramapaazi. Nokureba kwawo uchioneka wakati dzu-u mudenga uina mazhinji mapazi.

¹²“Asi mugirepisi iwoyo wakadzipurwa nehasha ukarigirwa pasi, mhepo yokumabvazuva yakauomesa michero yawo ikakurumurwa. Hunde yawo yakasvava ukaroromeswa nomoto.

¹³Zvino wakasimwa mugwenga munyika yakaoma ine nyota.

¹⁴Moto wakabva pahunde yacho ukaroromesa mapazi awo nomuchero wawo zvokuti pauri pakanga pasisina rumuti rwakasimba runogona kana kuitwa tsvimbo youmambo.” Irworu rwiyo rwokuungudza rwava rwiyo rwokuungudza.