Read Bhaibhiri Idzva rechiShona Ezekieri 20 Bible Online

Ezekieri 20 - Bhaibhiri Idzva rechiShona bible

Ezekieri 20

¹Mugore rechinomwe mumwedzi wechishanu pamusi wechigumi wemwedzi iwoyo, vamwe vakuru vakuru veIsiraeri vakauya kuzoda kunzwa kuti Tenzi anoti kudii. Vakasvikogara mberi kwangu.

²Ipapo izwi raTenzi rakauya kwandiri rikati,

³“Iwe mwanakomana womunhu taurira vakuru vakuru veIsiraeri ava uvaudze kuti, zvanzi naTenzi Mwari, ‘Chamavinga pano apa kuda here kuzonzwa kuti ndinoti kudii?’ Zvino hezvinoi ndakadai, ndizvo zviri kureva Tenzi, zvokuti imi muuye kuzonzwa kuti ini ndinoti kudii handizvidi.

⁴Iwe mwanakomana womunhu wotovatongaka! Vatonge vazivise unyangadzi hwakan'ora hwamadzibaba avo uchivaudza kuti,

⁵Zvanzi naTenzi Mwari, pazuva randakasarudza Isiraeri, ndakatsidza nemhiko kumbeu yemba yaJakobho ndichizvizivisa kwavari munyika yeIjipiti. Ndakatsidza nemhiko kwavari ndichiti ndini Tenzi, Mwari wenyu.

⁶Pazuva iroro ndakatsidza kwavari nemhiko kuti ndichavaburitsa munyika yeIjipiti ndichivaendesa kunyika yandakavatsvakira, nyika youchi nomukaka, nyika yakakurumbira kwazvo kupinda nyika dzose zvadzo.

⁷Izvozvo ndakavati kandai pasi zvinhu zvounyangadzi hwakan'ora zvamunofarira kuona nameso enyu ani naani zvake wenyu murege kuzvin'oresa nezvifananidzo zvokunamata zveIjipiti, ini ndini Tenzi, Mwari wenyu.

⁸Asi vakandipandukira vakarega kunditeerera. Mumwe nomumwe wavo haana kukanda pasi zvinhu zvinosemesa zvavaifarira kuona nameso avo kana kusiyana nezvifananidzo zvokunamata zveIjipiti. Ipapo ndakafunga zvokuvavirukira nehasha, ndipedzere hasha dzangu pavari mukati menyika yeIjipiti.

⁹Asi ndakaitira kuti zita rangu rirege kun'oreswa mumaziso avanhu vechirudzi mavakanga vagere nokuti ndakanga ndazvionesa kwavari ndichivazivisa kuti ndichazoburitsa vaIsiraeri munyika yeIjipiti.

¹⁰Ipapo ndakavaburitsa munyika yeIjipiti ndikavaunza murenje.

¹¹Ndakavapa mirao yangu ndikavarayiridza mitemo yangu yokuti munhu anenge aichengeta ararame nayo.

¹²Ndakavapawo mazuva angu eSabata sechiratidzo pakati pangu navo kuti vazive kuti ini Tenzi, ndini ndinovaita kuti vave vatsvene.

¹³Asi imba yaIsiraeri yakandipandukira murenje. Havana kutevedza mirao yangu asi vakaramba mitemo yangu yokuti munhu anenge aichengeta anorarama nayo. Masabata angu vakan'oresa zvikuru. Ndipo pandakafunga zvokuti ndipedzere hasha dzangu pavari murenjemo kuti ndibva ndanyatsovatsakatisa.

¹⁴Asi ndakaitira kuti zita rangu rirege kun'oreswa mumaziso avanhu vechirudzi vakanga vaona nameso avo ndichivaburitsa.

¹⁵Uyewo ndakapika kwavari murenje nemhiko kuti handisi kuvasvitsa kunyika yandakanga ndavapa, nyika yakanaka nyika yomukaka nouchi nyika yakakurumbira kwazvo kupinda nyika dzose

¹⁶nokuti vakaramba zvirongwa zvangu vakarega kutevedza zvirevo zvangu vakan'oresa masabata angu nokuti vakanga vatorwa mwoyo nezvifananidzo zvavo zvokunamata.

¹⁷“Zvakadaro zvazvo ndakavaitira tsiye nyoro ndikarega kuvaparadza kana kubva ndanyatsovatsakatisa murenjemo.

¹⁸Ndakatiwo kuvana vavo murenje, musatevedze mirao yamadzibaba enyu kana kuteerera mitemo yavo kunyange kuzvin'oresa nezvifananidzo zvavo zvokunamata.

¹⁹Ini Tenzi, ndini Mwari wenyu, tevedzai mirao yangu muchenjerere kuteerera mitemo yangu

²⁰muerese masabata angu kuitira kuti uve somucherechedzo pakati pangu nemi mugoziva kuti ini Tenzi ndini Mwari wenyu.

²¹“Asi vana vavo vakandipandukira vakarega kutevedza mirao yangu uye havana kuitira mitemo yangu hanya yokuichengeta yokuti munhu anenge aichengeta anorarama nayo. Vakan'oresa masabata angu. Ndipo pandakafunga kuti ndivavirukire nehasha ndipedzere hasha dzangu pavari murenje imomo.

²²Asi ndakadzora ruoko rwangu, ndichiitira kuti zita rangu rirege kun'oreswa mumaziso avanhu vechirudzi.

²³Uyezve ndakavapikira murenje kuti ndichavaparadzira mukati memarudzi ndichivaendesa kudzinyika

²⁴nokuti havana kuchengeta mitemo yangu asi kuti vakaramba mirao yangu vakan'oresa masabata angu izvozvo meso avo akanga angova pazvifananidzo zvokunamata zvamadzibaba avo.

²⁵Uyewo ndakavapa mirao yakanga isina kunaka nemitemo yaiita kuti vatadze kuwana upenyu.

²⁶Ndakavan'oresawo nezvipo zvavo izvozvo ndichiita kuti vapire nomoto somupiro matangwe avo ose echikomana kuitira kuti vadumbirwe nazvo. Ndakazviita kuti vazive kuti ini ndini Tenzi.

²⁷“Naizvozvo iwe mwanakomana womunhu taurira imba yaIsiraeri uchivaudza kuti, zvanzi naTenzi Mwari hechinoi chimwezve chakaitwa namadzibaba enyu chokundishonha nokusatendeka kwandiri.

²⁸Ndinodaro nokuti pandakavaunza munyika yandakatsidza kuzovapa vaiti vakangoona chikomo chirefu kana muti wakasvibira, ipapo vaibva vatopira zvibayiro zvavo vachipa mipiro yavo inotsamwisa vachipwitititsirapo zvavo zvinonhuwirira uye vachiteurira ipapo mipiro yavo yokuteura.

²⁹(Ndakavati ndiko kui kunzvimbo dzakatunhumara dzokuteurira kwamunoenda? Sakawo zita rapo rakanzi ‘Pakatunhumara.’[14] Kusvikira pari nhasi.)

³⁰Nezvo chiti kumba yaIsiraeri, zvanzi naTenzi Mwari munodirei kuzvin'oresa sezvakaita madzibaba enyu muchiteterekera mutome kutevera unyangadzi hwavo hwakan'ora?

³¹Pamunopira zvipo zvenyu nokubayira vanakomana venyu sechibayiro pamoto muchizvin'oresa nezvifananidzo zvenyu zvose zvokunamata kusvikira pari nhasi. Pakadai ndipo here pamungazoda kundinzwa kuti ini ndinoti kudii, nhai imba yaIsiraeri? Hezvino ndakadai ndizvo zviri kureva Tenzi Mwari, handidi zvangu kuti imi muzobvunza kuti munzwe kuti ini ndinoti kudii!

³²“Zviri mumwoyo menyu izvozvo hazvisi kuzofa zvakaitika zvokufunga kuti tinoda kuve sevechirudzi kuti muite samarudzi ari mudzinyika uye kuti munamate zvimiti namatombo.

³³“Zvanzi naTenzi Mwari, ‘Hezvino ndakadai, ndikarega ini kukutongai muri mumaoko mangu shamhu yangu iri mudenga uye ndikaviruka nehasha, handisirini.

³⁴Ndichakubvisai mukati memarudzi iwayo ndigokukokorodzai munyika dzamunenge mapararira. Ndichazviita izvozvo namaoko angu aya shamhu yangu iri mudenga ndakaviruka nehasha.

³⁵Ipapo ndichakuunzai murenje revechirudzi ndigokupinzai dare takatarisana uso nouso.

³⁶Ndichakutongesai sokutongesa kwandakaita madzibaba enyu murenje renyika yeIjipiti,’ ndichakukwidzai dare ndizvo zviri kutaura Tenzi Mwari.

³⁷“Ndichakuitai kuti mupfuure napasi petsvimbo yangu ndichikuunzai muchisungo chechitenderano changu.

³⁸Ndichabvisa vapanduki pakati penyu navavo vanenge vandikanganisira. Ndichavaburitsa munyika mavari kumbogara asi havasi kuzopinda munyika yeIsiraeri. Ndipo pamuchaziva kuti ndini Tenzi.

³⁹“Asi kana zviri zvenyu, imimi vemba yaIsiraeri, zvanzi naTenzi Mwari endaika zvenyu mumwe nomumwe kundonamata zvifananidzo zvake zvokunamata asi mushure maizvozvo kunyange zvazvo mukarega kunditeerera asi zita rangu rinoera hamusi kuzorin'oresazve nezvipo zvenyu nezvifananidzo zvenyu zvokunamata.

⁴⁰Zviripo ndezvokuti pagomo rangu rinoera gomo refu reIsiraeri, ndizvo zviri kutaura Tenzi Mwari, ipapo imba yose yavaIsiraeri vose zvavo vachandinamata munyika imomo. Ipapo ndichavagamuchira, ipapowo ndichati muite mudememudeme muchibvisa zvipo zvenyu zvakanakisisa nemipiro yenyu yose inoera.

⁴¹Ndichakugamuchirai somupiro unonhuwirira pandichakubvisai mumarudzi ndichikukokorodzai kudzinyika kwamakapararira. Ndicharatidza kuera kwangu pakati penyu marudzi achiona.

⁴²Muchabva maziva kuti ndini Tenzi pandichakuunzai munyika yeIsiraeri, nyika yandakatsidzira kuzopa madzibaba enyu.

⁴³Imomo muchayeuka kuita kwenyu nezviito zvose zvamakazvin'oresa nazvo, muchatozvisema nezvakaipa zvose zvamakaita.

⁴⁴Uye muchaziva kuti ndini Tenzi kana ndava kuzoita nemi zvandinoita ndichiremekedza zita rangu, kwete zvinokodzerana nenzira dzenyu dzakaipa kana zviito zvenyu zvakaora, iyemi vemba yaIsiraeri,” ndizvo zviri kutaura Tenzi Mwari.

⁴⁵Shoko raTenzi rakauyawo kwandiri rikati,[15]

⁴⁶“Iwe Mwanakomana womunhu wochinangana nemaodzanyemba uparidze wakanangana namaodzanyemba uporofite wakanangana namaruwa amasango okuNegevhu.

⁴⁷Iti kusango rokuNegevhu, inzwai izwi raTenzi. Zvanzi naTenzi Mwari, chinzwa, ndichabatidza moto mauri ucharoromesa muti wose wakasvibira uri mauri nomuti wose wakaoma usingazodzimiki; rimi rinonganduka risingadzimuriki. Uchavavaidza uso hwose kubvira kumaodzanyemba dakara kuchamhembe.

⁴⁸Vose vose vachaona kuti Tenzi ndiye akabatidza moto iwoyo usingadzimuriki.”

⁴⁹Ini ndipo pandakati, “Aa-a nhai Tenzi Mwari inga vari kutaura nezvangu vachiti haasi munhu wokungotaura namadimikira here?”