Read Bhaibhiri Idzva rechiShona Ezekieri 21 Bible Online

Ezekieri 21 - Bhaibhiri Idzva rechiShona bible

Ezekieri 21

¹Izwi raTenzi rakauya kwandiri rikati,[16]

²“Iwe mwanakomana womunhu wochinangana neJerusaremu uparidze wakanangana nenzvimbo dzacho dzinoera uporofite wakanangana nenyika yeIsiraeri

³uti kunyika yeIsiraeri, zvanzi naTenzi chinzwa, ndanangana newe zvino. Ndichaburitsa bakatwa rangu muhara ndiuraye mukati mako vakarurama navakaipa.

⁴Sezvo ndichauraya mukati menyu vakarurama navakaipa kudaro saka bakatwa rangu richabudira muhara vanhu vose kubvira kumaodzanyemba dzamara kuchamhembe.

⁵Vanhu vose vachaziva kuti ini Tenzi ndini ndaburitsa bakatwa rangu muhara. Harichadzoserwazve muhara.

⁶Ungudza iwe munhu! Ungudza nomwoyo wakasuruvara nokushungurudzika kukuru vachiona nameso avo.

⁷“Kana vakakuti zvauya sei kuungudza kudai, iwe uti ‘Pamusana pamashoko. Paachasvikira munhu wose achadumbirwa nazvo; maoko avose achapera simba, mweya yose ichirukitika; mabvi ose achati rukutu semvura zvayo. Hezvo rosvika uye richatoitika.’ ” Ndizvo zviri kureva Tenzi Mwari.

⁸Shoko raTenzi rakauya kwandiri rikati,

⁹“Iwe mwanakomana womunhu porofita uti zvanzi naTenzi, iti: Bakatwa, bakatwa rakarodzwa uye rikakwenenzverwawo

¹⁰richirodzerwa kuuraya nokukwenenzvererwa kupenya semheni! Ndipo patingabva tatofaririra nhai? Tarisai muone tsvimbo youmambo yapenyeserwa mwanakomana wangu kuti azvidze zvimiti zvokunamata.[17]

¹¹Bakatwa rakanzi rirodzwe kuti ribatwe. Rakarodzwa rikakwenenzverwa kuti riiswe mumaoko momuurayi.

¹²“Ridza mhere uchihwihwidza, iwe mwanakomana womunhu pamusana pezvawira vanhu vangu zvichinangana namachinda eIsiraeri ose. Ipapo vanofanira kuuraiwa nebakatswa iwe chibata rushaya,

¹³nokuti kuedzwa hakusi kuzorega kuuya chamakazvidzira tsvimbo youmambo chii? Hamusi kuzobudirira.” Ndizvo zviri kutaura Tenzi Mwari.

¹⁴“Saka zvino chiporofita iwe mwanakomana womunhu. Rovanisa maoko bakatwa rigouya pasi kaviri kana katatu kese, ibakatwa ravanofanira kuti vaurayiwe. Ibakatwa rokuuraya vanhu kwakanyanyisa rakatarisana navo

¹⁵kuitira mwoyo yavo idedere, vazhinji vafe mumaguta mavo mose. Ndakapa bakatwa rinopenya. Heekaka! Rakagadzirwa semheni rikaputirwa kuitira kuzourayisa.

¹⁶Nyatsocheka uku nouku kunenge kwangonanga rutivi runocheka.

¹⁷Ini ndicharovanisawo maoko angu ndichipedza hasha dzangu. Ndini Tenzi ndazvireva.”

¹⁸Izwi raTenzi rakauyazve kwandiri richiti,

¹⁹“Iwe mwanakomana womunhu tara nzira mbiri dzokuitira hondo yebakatwa yamambo weBhabhironi ichauya. Dzose dziri mbiri dzichabva kunyika imwecheteyo. Umise chikwangwani uchidzike pakona yomugwagwa wokupinda muguta.

²⁰Tara nzira yebakatwa inoenda kuguta reRabha rokuvaAmoni neinoenda kwaJudha muguta retsvingo reJerusaremu.

²¹Ndinodaro nokuti mambo weBhabhironi anosvikomira pamhararano penzira idzodzo panoparadzana nzira mbiri idzodzo oshopera. Anoita miseve hakata dzokukandira nadzo, obvunzira kutumwari twechiterafimu achinan'anidza pachiropa.

²²Muruoko rwake rworudyi chin'ange chinenge chabata Jerusaremu kuti iisirwe zvombo zvakaita sehondohwe zvokudhugumurisa, nokundoshamarara kuridza mhere dzokuuraya nokudaidzirisa kwazvo nokumisa zvombo zvakaita sehondohwe zviya zvokudhugumurisa zvakatarisana nemisuo mikuru yacho nokuzoriisira chinenge musana wenzou chevhu kurusvingo nokuzovaka nokuchera mugero.

²³Asi kwavari ivo zvichatarisika sokushopera kusina maturo vachitozviti vakapika mhiko chaidzo dzakasimba. Asi achaita kuti mhosva yavo iyeukwe kuitira kuti vagobatwa.

²⁴“Naizvozvo zvanzi naTenzi Mwari pamusana pokuti makaita kuti chitadzo chenyu chiyeukwe nokuiswa pachena kwaitwa chitadzo chenyu zvokuti muzviito zvenyu zvose zvazvo, zvitadzo zvenyu zvava kuonekwa, zvaita kuti imi muyeukwe; muchaiswa mumaoko mavo.

²⁵Iwe muipi, akan'ora, muchinda weIsiraeri zuva rokutongwa kwako kwokupedzisira rasvika zvino.

²⁶Zvanzi naTenzi Mwari bvisa ngundu ukutunure chiremba choumambo. Zvinhu hazvicharamba zvakaita zvazvakaita. Vapasi vachasimudzwa vapamusoro vachaderedzwa.

²⁷Ndichaita kuti uve dongo, dongo, dongo zvaro zvisati zvamboitika kusvikira ane mvumo yokuritonga[18] auya ndiye wandicharipa.

²⁸“Zvino iwe mwanakomana womunhu porofita uchiti, ‘Zvanzi naTenzi Mwari nezvevaAmoni uye nezvokunyadziswa kwavo achiti, bakatwa, bakatwa raburitswa muhara kuzorakatisa.’ “Rakakwenenzverwa zvokuva nokupenya kunenge kwemheni

²⁹ivo vachikuonerai zviratidzo zvenhema kudaro vachishopera zvenhema nezvenyu saizvozvo bakatwa richazoiswa pamutsipa yavakaipa vakan'ora vasvikirwa nenguva yokutongwa kwavo kwokupedzisira.

³⁰Ridzosere muhara maro. Munzvimbo mawakasikwa imomo munyika mawakaberekerwa ndimo mandichakutongera.

³¹Ndichapedzera shungu dzangu pauri ndichava moto moto kukuvirukira nehasha dzangu. Ndichakuisa mumaoko mavanhu voutsinye mharadzi chaidzoidzo.

³²Muchava huni dzokupisa moto, ropa renyu richierera mukati menyika. Hamuchazoyeukwazve nokuti ini Tenzi ndazvireva.”