Read Bhaibhiri Idzva rechiShona Ezekieri 22 Bible Online

Ezekieri 22 - Bhaibhiri Idzva rechiShona bible

Ezekieri 22

¹Uyewo izwi raTenzi rakauya kwandiri richiti,

²“Iwe mwanakomana womunhu tonga guta iri guta remhosva yokudeura ropa, ritonge. Ritaurire zviito zvaro zvose zvinosemesa.

³Unofanira kuti, zvanzi naTenzi Mwari, “Guta rokudeura ropa mukati maro nguva yako yazosvika; iyewe nyakugadzira zvifananidzo zvokunamata zvokuzvin'oresa!

⁴Une mhosva iwe pamusana peropa rawakadeura ukan'oreswa nezvifananidzo zvokunamata zvawakaita. Ipapo wakaita kuti zuva rako risvike, nguva yako yamakore awakatarirwa yasvika. Naizvozvo ndakuita kuti uve chiseko zvacho kumarudzi nechinhu chinoshoreka munyika dzose zvadzo.

⁵Vepedyo nevokure newe vachakunyomba, iwe nhunzvatunzva izere mheremhere.

⁶“Tarisa uone, machinda eIsiraeri, mumwe nomumwe sokugona kwake, anokarira kudeura ropa.

⁷Vanhu vava kuzvidza baba naamai mauri iwe guta, vava kutorera mari vaenzi nenzira dzokusevenzesa chisimba mukati mako. Vanhu vava kuitira zvakaipa nherera nechirikadzi mauri iwe.

⁸Munozvidza zvinhu zvangu zvinoera muchin'oresa mazuva angu eSabata.

⁹Mauri iwe, vanhu vari kudeura ropa namakuhwa avo, uye vanhu vari mauri iwe vanodyira mumakomo[19] vava kuita zvinhu zvisina hunhu mukati mako.

¹⁰Mauri iwe vanasikana vari kufeva namadzibaba avo. Mauri iyewe varume vari kumanikidza kugara navakadzi vari panguva yavo yokutevera.

¹¹Mumwe anoita zvinhu zvinosemesa nomudzimai womumwe, mumwewo achiita upombwe hunotonyadzisa nomuroora wake. Mumwezve murume mauri iwe anotadza nehanzvadzi yake, mwana wababa vake chaiye.

¹²Mauri vanhu vanogamuchira chiokomuhomwe chokuti vadeure ropa. Munokweretesa mari nechimbadzo muchitarisira kuti idzoke yabereka muchizviwanira zvinhu nokutorera vamwe nenzira dzokushandisa chisimba mukandikanganwa.” Ndizvo zviri kutaura Tenzi Mwari.

¹³“Chinzwa, naizvozvo ini ndinorova pasi nechibhakera changu ndichikomekedza nezvokuwana zvinhu nokubiridzira kwamunoita uye ndichikomekedza nezveropa rinodeurwa pakati pako.

¹⁴Naicho chivindi chako ichochi ungapamire here, kana kutokwinyirirawo kwazvo namaoko ako iwe mumazuva andinenge ndanangana newe? Ini Tenzi ndini ndataura uye ndichazviita.

¹⁵Ndichakutii mwarara mukati memarudzi ndichiita kuti mupararire nedzinyika. Ndicharoromesa zvakaora mauri.

¹⁶Muchava vanhu vakan'ora mukuona kwamarudzi. Ndipo pamuchaziva kuti ndini Tenzi.”

¹⁷Shoko raTenzi rakauyazve kwandiri rikati,

¹⁸“Iwe mwanakomana womunhu, imba yaIsiraeri yangova marara zvawo outare kwandiri. Vose zvavo, vaita sesirivha nendarira noutare hwerata nesimbi nomutobvu zviri muvirira romoto vangova marara hawo outare.

¹⁹Ndokusaka zvanzi naTenzi Mwari, mose zvenyu zvamava marara zvawo outare kudai naizvozvo, chinzwai, ndichakuunganidzai pakati peJerusaremu.

²⁰Sokuunganidza kunoitwa sirivha nendarira nesimbi nomutobvu noutare hwerata muvirira romoto zvigovhutirwa moto kuitira kuti zvinyongodeke, ndokuunganidza kwandichakuitai ndakashatirwa ndakatsamwa ndichakurongererai imomo ndikunyongodesei.

²¹Ndichakuunganidzai ndigokuvhutirai nemoto chaiwo wehasha dzangu. Muchanyongodeka mukati mawo.

²²Sokunyongodeka kunoita sirivha muvirira ndiko kunyongodeka kwamuchaita mukati mawo. Ndipo pamuchaziva kuti ini Tenzi ndini ndakuvirukirai nehasha.”[20]

²³Izwi raTenzi rakauya kwandiri rikati,

²⁴“Iwe mwanakomana womunhu iti kunyika iyi uri nyika isina kuchenurwa, isina kuniwa nemvura pazuva rehasha.

²⁵Machinda, mukati mayo vakaita seshumba dziri kuwomba dzichibvambura-bvambura nyama. Vakapfuudza upenyu hwavanhu. Vakapamba upfumi nezvinhu zvakakosha. Vakaita kuti vazhinji vave chirikadzi mukati mayo.

²⁶Vapristi vayo vakatyoranisa mutemo wangu, vakan'oresa zvinhu zvangu zvinoera; havana kusiyanisa chinhu chinoera nechinhuwo zvacho. Havanawo kudzidzisa kusiyana kwezvan'ora nezvisina. Masabata angu havana kuaitira hanya zvokuti ndava chinhu chakan'ora pakati pavo.

²⁷Machinda, mukati mavo, vava mhumi zvadzo dzinobvambura-bvambura nyama nokudeura ropa vachiparadza upenyu vachizviwanira zvinhu nenzira dzisina kutendeka.

²⁸Uye vaporofita vayo vanodzurura nesuko vachiona zviratidzo zvenhema vachishopera chiporofita chamanyepo vachiti zvanzi naTenzi Mwari; iye Tenzi asina chaataura.

²⁹Vanhu venyika iyoyi vanotorera vanhu zvinhu nechisimba uye vanopamba. Vanoonesa nhamo varombo navasina chavanacho; vanoitira zvakaipa mueni zvisina ruenzaniso.

³⁰Zvino ndakatsvaga pakati pavo munhu angavake rusvingo, anomira pakakoromoka pamberi pangu, akamiririra nyika kuitira kuti ndirege kuiparadza. Asi hapana wandakawana.

³¹Ipapo ndakavavirukira nehasha ndikavaroromesa nomoto wehasha dzangu. Maitiro avo ndakati avapfukire.” Ndizvo zviri kureva Tenzi Mwari.