Read Bhaibhiri Idzva rechiShona Ezekieri 23 Bible Online

Ezekieri 23 - Bhaibhiri Idzva rechiShona bible

Ezekieri 23

²“Mwanakomana womunhu, paivapo vakadzi vaviri vaiva vana vamai vamwechete.

³Vakaita unzenza muIjipiti. Vakaita ufeve hwacho vachiri vechiduku vachidzvanywa mazamu avo minyatso yavo youmhandara ichibatwa-batwa.

⁴Mukuru wacho ainzi Ohora[21] munun'una wake achinziwo Ohoribha.[22] Vakava vangu vakabereka vana vakomana navasikana. Pamazita avo apa Nyadumba iSamaria, Mudumba iJerusaremu.

⁵“Ohora akaita upfambi iye ari wangu. Mwoyo wake waidokwairira zvikomba zvake vaAsiria ivo

⁶varwi vakapfeka hanzu dzoruvara rwohute, masadunhu navatungamiriri vakuru vehondo vose, zvavo vari majaya anoyemurika, varwi vamabhiza vanotasva mabhiza.

⁷Akaita ufeve hwake navo ivo varume vakanakisisa veAsiria vose zvavo vachizvin'oresa nezvifananidzo zvokunamata zvomumwe nomumwe wose waaidokwairira.

⁸Haana kumbosiyana noufeve hwaaiita mazuva aaiva muIjipiti nokuti paakanga achiri wechiduku varume vairara naye vachibata-bata nyatso dzake dzoumhandara vachipedzera shungu dzoruchiva rwavo paari.

⁹Naizvozvo ndakamuisa mumaoko mezvikomba zvake izvozvo, mumaoko mavaAsiria vaaidokwairira vacho.

¹⁰Ivava vakamupfekenura kumusiya ava mutwi. Vakabata vanakomana vake navanasikana vake. Iye vakamuuraya nebakatwa akabva ava tsumo zvayo pakati pavakadzi paakanga zvino atemerwa chirango chake.

¹¹“Munun'una wake uya, Mudumba izvozvi zvaiva mumaziso make asi akava mukadzi ane tsika dzakatonyanyisisa kuora kumudarika iye mukudokwaira mwoyo woufeve hwake hwakanga hwakatoipisisa kupfuura hwomukoma wake.

¹²Mukadzi uyu akadokwairira vaAsiria, masadunhu acho navatungamiriri vakuru vehondo ivo varwi vakanga vakapfeka zvinhu zvokuhondo chaizvo zvakakwana vari varwi vemabhiza vachitasva mabhiza, vose vari majaya anoyemurika.

¹³Ipapo ndakaona kuti akanga aton'oreswa uye vose vari vaviri vakanga vatora nzira imwecheteyo.

¹⁴“Asi iye akatopindiridza kwazvo ufeve hwake. Akaona varume vakanzi chechetere pamadziro, mifananidzo yavanhu vechiKaridhea yakanzi kumadziro chechetere neingi tsvuku

¹⁵vakasunga mindya muchiuno vaine ngundu mumusoro dzinoti rembe rembe. Vose vaitarisika savakuru vakuru uri mufananidzo zvawo wevaBhabhironi vagari venyika yeKaridhea.

¹⁶Paakavaona akavadokwairira mwoyo akatumira nhume kwavari kuKaridhea.

¹⁷VaBhabhironi vakauya kwaari vakaenda naye pamubhedha wezverudo vakamun'oresa nehavi dzavo. Mushure mokunge an'oreswa navo kudaro, akavaramba asviba mwoyo.

¹⁸Paakanga oita ufeve hwake pasina zvokuvanza wongoita ufambi zviri pachena achizviyanika muviri wake, ndakasviba mwoyo ndikamuramba sezvandakaita mukoma wake.

¹⁹Asi ufeve hwake ndipo paakatohunyanya oyeuka zvino mazuva oumhandara hwake paaiita ufeve nenyika yeIjipiti

²⁰kwaaidokwairira mhombwe dzake ikoko dzine mhuka dzinenge dzamadhongi dzinowadzura mbeu samabhiza makono.

²¹Ndokusuwira kwawaiita kushaya hunhu pahudiki hwako zviya zvokuIjipiti kwawaibatwa-batwa minyatso yako uchidzvanywa mazamu ako akanga achiri echidiki.”

²²Naizvozvo iwe Ohoribha zvanzi naTenzi Mwari, “Chinzwa ndichaita kuti upandukirwe navadiwa vako ivavo vawakaramba wasviba mwoyo. Zvino ndichavaunza vagokukomberana kumativi ese,

²³ivo vaBhabhironi navanhu vose vechiKaridhea vokuPekodhi nokuShoa nokuKoa uye nevaAsiria vose vavanavo, majaya acho anoyemurika, masadunhu navatungamiriri vakuru vehondo, vose vakuru vakuru, varwi[23] vose zvavo vakatasva mabhiza.

²⁴“Vachakuvinga vachibva kuchamhembe vaine ngoro dzehondo nezvikochikari negurusvusvu ravanhu vamarudzi. Vacharongana kuzokurwisa kumativi ose vaine nhoo huru neduku nenguwani dzesimbi. Ndivo vandichati vakugadze dare; vachakutonga iwe maererano nematongerowo avo.

²⁵Iwewe ndiwe wandichanangana naye ndakashatirwa ivowo vagokuitira zvehasha. Vachacheka mhuno dzako nenzeve dzako, vanenge vasara vokwako vachifa nebakatwa. Vachabata vanakomana navanasikana vako. Vanenge vasara vokwako vachavaroromesa nomoto.

²⁶Vachakupfekenurawo hanzu dzako vachikutorerawo zvishongo zvako zvakanakisisa.

²⁷Saizvozvo ndichapedza kushaya kwako hunhu uye ufeve hwako hwakabva kunyika yeIjipiti zvokuti hauzombotarisa kana kuyeukazve vaIjipiti,

²⁸nokuti zvanzi naTenzi Mwari chinzwa, ndava kukuisa mumaoko mavavo vaunovenga mumaoko maavo vawakaramba wasviba mwoyo.

²⁹Ivo zvavachaita kwauri vachakuitira noruvengo, vachakutorera zvose zvawakawana nokushanda kwako vagokusiya wangodaro wakashama mutwi uye ufeve hwako huchasiyiwa hwava pachena. Pamusana pokushaya hunhu hwako noufeve hwako

³⁰unenge wawirwa nezvinhu izvozvi nokuti wakaita ufeve namarudzi avanhu ukazvin'oresa nezvifananidzo zvavo zvokunamata.

³¹Wakatevedza nzira yomukoma wako, nezvo ndichaisa mukombe wake wehasha dzangu mumaoko mako.”

³²Zvanzi naTenzi Mwari, “Unofanira kuti utonwa mukombe womukoma wako, zigombe guru chairo. Uchasekwa nokudadirwa nokuti rine zvakawanda.

³³“Uchanyatsoraradza zvako ugonyatsosuruvara. Mukombe unodumbirisa wokuparadza ndiwo mukombe womukoma wako Samaria.

³⁴Uchaunwa zvokuukwengura ugotobanda zvimedu zvawo wobvanzura mazamu ako nokuti ndini ndazvireva.” Ndizvo zviri kutaura Tenzi Mwari.

³⁵Naizvozvo zvanzi naTenzi Mwari, “Pamusana pokuti wakandikanganwa ukandikanda kuseri kwako. Hezvoka worumwa nechokuchera nokushaya kwakoka hunhu nounzenza hwako.

³⁶“Tenzi akanditi iwe mwanakomana womunhu chitonga Ohora naOhoribha. Vazivise zviito zvavo zvinosemesa

³⁷nokuti vakaita ufeve uye vane ropa mumaoko. Vakaita ufeve nezvifananidzo zvavo zvokunamata vachitopira kwazviri sechokudya vana vaya vavakandiberekera.

³⁸Uyezve vakaita izvi kwandiri, vakan'oresa Nzvimbo yangu Inoera panguva imwechetewo vachin'oresa maSabata angu

³⁹nokuti pavakauraya vana vavo vachivaita chibayiro kuzvifananidzo zvavo zvokunamata pazuva rimwechetero vakauya kuNzvimbo yangu Inoera kuzoin'oresa. Hezvo, zvavakaita mumba mangu.

⁴⁰“Vakatotumira shoko rokukoka varume vanobva kure vakatumirwa nhume ndokubvawo vauya. Wakazvishambidza ukapenda maziso ako ukazvishongedza nezvishongo uchiitira ivo.

⁴¹Wakati tendhe kugara pachigaro chaiva neteburu yakagadzikirwa zvokudya mberi kwacho pawakanga iwe waisa rusenzi rwangu namafuta angu eorivhi.

⁴²Izvozvo paiva nemheremhere yemhomho yavanhu vaiva naye uye nezvidhakwa zvamadzenga zvawo avarume vokurenje. Vakaisa tsambo mumaoko avakadzi nendaza dzakanakisa pamisoro yavo.

⁴³Ndakazoti ko zvino ivo varume havaite upombwe[24] here kana vachiita ufeve naye?

⁴⁴Vakatadza naye sezvinoita varume vanotadza nepfambi. Ndiko kutadza kwavakaita naOhora naOhoribha vachiita zvisina hunhu.[25]

⁴⁵Vanhu vakarurama vachavatongera mhosva youpfambi uye nemhosva yavakadzi vanodeura ropa nokuti zvifeve uye vane ropa mumaoko mavo.”

⁴⁶Ndinodaro nokuti zvanzi naTenzi Mwari, “Vaunzire hondo kuzovarwisa uite kuti vave chinhu chinotyisa nechinhu chokupamba.

⁴⁷Hondo iyoyo inofanira kuvataka namabwe ivapfuudze namapakatwa ayo vachauraya vanakomana navanasikana vavo uye ichiroromesa dzimba dzavo.

⁴⁸Ndomapedzero andichaita kushaya hunhu munyika iyoyi kuitira kuti vakadzi vose vawane yambiro varege kuzoshaya hunhu sezvakaita imi.

⁴⁹Kushaya kwenyu hunhu kuchakupfukirai mugopiwa shamhu yechirango chechitadzo chenyu chokunamata zvifananidzo. Ipapo ndipo pamuchazoziva kuti ini ndini Tenzi Mwari.”