Read Bhaibhiri Idzva rechiShona Ezekieri 24 Bible Online

Ezekieri 24 - Bhaibhiri Idzva rechiShona bible

Ezekieri 24

¹Mugore rechipfumbamwe mumwedzi wegumi pamusi wechigumi wemwedzi iwoyo, izwi raTenzi rakauya kwandiri rikati,

²“Iwe mwanakomana womunhu, nyora zita rezuva ranhasi, iro ranhasi chairo. Mambo weBhabhironi atokomba Jerusaremu iye nhasi uno chaiye.

³Zvino wochitaura nomuenzaniso kumba yavapanduki uvati zvanzi naTenzi Mwari, “Gadzai poto, gadzai poto pamoto mudirewo mvura mairi.

⁴Rongererai mairi nhindi dzenyama, nhindi dzose dzakanaka dzenyama dzechidya nedzebandauko, muiti pamu pamu kuzadza namapfupa akanakisisa ayo

⁵mutore chipfuwo chakanakisisa chomudanga murongerere huni[26] pasi pacho mubike[27] nhindi dzacho, mapfupa acho abikei pamwechete nacho.”

⁶Naizvozvo zvanzi naTenzi Mwari, “Zvichakuwana, iwe guta rinodeura ropa, iyewe poto ine ngura, ngura isina kumbopera. Chachurai mukati mayo nhango nenhango pasina zvokuswerosarudza

⁷nokuti ropa raro rakadeurwa richiri mukati maro. Rakariisa paruware pachena zvapo. Harina kudira ropa iroro pasi kuitira kuti rifushirwe zvaro nevhu.

⁸Ndakaisa ropa rarakadeura racho paruware pachena zvapo kuitira kuti rirege kufushirwa kuitira kuti hasha dzangu dzigomuka ndigotsividza.”

⁹Naizvozvo zvanzi naTenzi Mwari, “Zvichariwana guta rokudeura ropa. Ndichaita kuti pave nezirimi romoto.

¹⁰Unganidzai matanda mubatidze moto mubike zvakanaka nyama mukune muto wayo murege mapfupa atsve.

¹¹Gadzai poto yacho pamazimbe omoto isina chinhu mukati kuitira kuti ipise, mhangura yayo itsvuke kuitira kuti tsvina yayo yainayo inyongodeke; ngura yayo iroromeswe.

¹²Chandakanetera hapana apa, ngura yacho yakanyanyisa haibve nomoto.

¹³Ngura yacho kushaya hunhu hwako nokuti ndingadai ndakatokuchenura asi hauna kuzochenurwa kuuipi hwako. Hausi kuzochenurwa kusvikira hasha dzangu pauri dzapera.

¹⁴Ndini Tenzi ndataura! Zvichatoitika ndichazviita! Handisi kuzodzokera shure! Handisi kuzonzwira tsitsi! Handisi kuzodzora mwoyo. Uchatongwa zvinofambiranawo nokuita kwako uye nezviito zvako.” Ndizvo zviri kutaura Tenzi Mwari.

¹⁵Izwi raTenzi rakauyawo kwandiri richiti,

¹⁶“Iwe mwanakomana womunhu, chinzwaka, ini ndava kukutorera iye paswerameso wako chaiye kamwe kamwe nedenda. Asi iwewe haufaniri kuungudza kana kuhwihwidza kunyange kusvimha misodzi.

¹⁷Tura befu zvisinganzwiki usacheme vakafa. Monerera nguwani yako upfeke shangu dzako mumakumbo. Usafukidze miromo kana kudya chokudya chaparufu.”[28]

¹⁸Saizvozvo ndakataurira vanhu kumangwanani, kumanheru mudzimai wangu achibva afa. Mangwana acho mangwanani ndakaita sezvandakanga ndaudzwa.

¹⁹Ipapo vanhu vakati kwandiri, “Hamutiudzewo here kuti zvamuri kuita izvi zvinorevei kwatiri?”

²⁰Ini ndakati kwavari,

²¹“Izwi raTenzi rakauya kwandiri rikati iti kumba yaIsiraeri zvanzi naTenzi Mwari, chinzwai, ndichan'oresa Nzvimbo yangu Inoera, iyo yacho yamunoinzva nayo, iyo paswerameso yenyu iyoyo, pane mwoyo wenyu chaipo. Vanakomana navanasikana venyu vamakasiya vachafa nebakatwa rehondo.

²²Muchaitawo sezvandaita. Hamuchazofukidza miromo yenyu kana kudya chokudya chaparufu.

²³Muchange makapfeka nguwani dzenyu mumusoro, shangu dziri mumakumbo. Hamufaniri kuchema vakafa kana kuhwihwidza. Asi muchangoperezeka muuipi hwenyu muchigomera.

²⁴Saizvozvi Ezekieri achava chiratidzo kwamuri. Zvaanenge aita ndizvo zvamuchaitawo. Kana izvi zvoitika muchabva maziva kuti ndini Tenzi Mwari.

²⁵“Iwe mwanakomana womunhu, musi wandichavatorera musimboti wavo, chinovapa rufaro nembiri chacho, paswera meso pavo pane mwoyo wavo chaipo; uyewo vana vavo vakomana navasikana,

²⁶musi iwoyo munhu anenge apunyuka achauya kwaari kuzokutaurira shoko racho.

²⁷Musi iwoyo muromo wako uchazaruka kumunhu iyeyo anenge apunyuka, ugotaura, zvokuva chimumumu zvichibva zvapera. Saizvozvo uchave chiratidzo kwavari vagoziva kuti ndini Tenzi.”