Read Bhaibhiri Idzva rechiShona Ezekieri 26 Bible Online

Ezekieri 26 - Bhaibhiri Idzva rechiShona bible

Ezekieri 26

¹Mugore regumi nechiposhi, pazuva rokutanga romwedzi iwoyo, izwi raTenzi rakauya kwandiri richiti:

²“Iwe mwanakomana womunhu, guta reTire zvarakati nezveJerusaremu, ‘Hero Suo Guru revechirudzi rapazika, razarukireni regai ndichizvigutsa hangu sezvo raparadzwa kudai,’

³naizvozvo Tenzi Mwari ati chinzwa iye zvino ndanangana newe Tire. Ndichakuunzira marudzi akawanda kuzorwisana newe segungwa ramutsa mafungu aro.

⁴Vachaparadza tsvingo dzeTire vachiriga pasi nharirire dzaro. Ndichaparadza kubvisa ivhu raro mariri ndichiita kuti rive ruware zvarwo.

⁵Tire richava mukati chaimo megungwa richiva nzvimbo zvayo yokuyanikira usvasvi. Ndinodaro nokuti ndini ndataura ndizvo zviri kutaura Tenzi Mwari. Uye richava sechinhu chokupamba kumarudzi.

⁶“Vanasikana[31] varo vari panyika huru vacharakatika kuurayiwa nebakatwa ndipo pavachazoziva kuti ndini Tenzi.

⁷“Zvavepo ndezvokuti zvanzi naTenzi Mwari chinzwa, ndichaita kuti Tire ivingwe nomumwe wokuchamhembe, Nebhukadhireza, mambo weBhabhironi, ndimambo wamadzimambo, iyeyo aina mabhiza nengoro dzehondo navarwi vamabhiza nehondo yavarwi vazhinji.

⁸“Iye achauraya nebakatwa vanasikana vako vari munyika yomukati. Achakuisira rusvingo rwokukurwisa narwo agokuvakirira nevhu chinenge musana wenzou kurusvingo agokusumudzira denga zvaro renhoo.

⁹Achanangisa kwauri iwe kuriridza kwezvombo zvake zvehondo zvinenge hondohwe zvokudhugumurisa tsvingo dzako iwe. Namatemo ake achapaza nharirire dzako.

¹⁰Mabhiza ake achange akawanda zvokuti huruva yawo ichakuputira. Tsvingo dzako dzichazunguzika pamusana poruzha rwavamabhiza nengorowo zvadzo nengoro dzehondo dzamabhiza, paachapinda pamisuo mikuru yenyu somunhu anopinda muguta rapazwa rusvingo.

¹¹Nematsiko amabhiza ake achatsokodzera migwagwa yenyu yose achauraya vanhu vako nebakatwa Misimboti yako yakasimba iyoyo ichati pasi gwajata.

¹²Vachapamba upfumi hwako. Vachakubvutira zvamunoshava nazvo upfumi vachapaza tsvingo dzako vachiwondomorera pasi mizinda yenyu yedzimba, matombo ako nemiti yako zvichanzi mukati memvura bvuva bvuva.

¹³Ndichagumisa mimhanzi wenziyo dzako kurira kwezvipendani zvako hakuchazombonzwikazve.

¹⁴Ndichakuita kuti uve ruware rusina chinhu. Uchava nzvimbo zvayo yokuyanikira mimbure hauchazombofa wakavakwazve nokuti ndini Tenzi ndataura.” Ndizvo zviri kureva Tenzi Mwari.

¹⁵Tenzi Mwari ari kutaura akanangana neTire kuti nyika dzomumahombekombe megungwa hadzisi kuzondengendeka here nokuriridza kwokuputsika kwako, pachauraiwa vanenge vakuvadzwa mukati mako marakatiswa kuuraya vanhu?

¹⁶Ipapo machinda okugungwa ose achabva pazvigaro zvawo zvouchangamire vagokatanura majasi avo vagobvisa magemenzi avo akarukirirwa. Vachaputirwa nokudedera, vachagara pasi vachiramba vachingodedera vadumbirwa nezvako.

¹⁷Vachakuimbira ngondo vachikuti: “Kubva watonyangarika kudai mumakungwa iwe guta rembiri, waimbova nesimba guru nezvokugungwa iwe navagari vako waivhundutsa nyika dzose dzomukati.

¹⁸Zvino zvitsuwa zvodedera pazuva rokuputsika kwako. Heeka, zvitsuwa zviri kugungwa zvakangaidzika nomupfuuriro wako.”

¹⁹Chikonzero ndechokuti zvanzi naTenzi Mwari, “Pandichakuita kuti usare wava renje zvaro reguta samaguta asina ageremo pandichakuti ndondondo muhwenje hwegungwa, mvura zhinji igokuti fuse fuse.

²⁰Naizvozvo ndichakukanda pasi pamwechete navanoenda mugomba; kuvanhu vakare. Ndichati ugare munzvimbo yapasi pasi penyika, munzvimbo yamatongo akare-kare pamwechete navanodzika mugomba zvokuti hapana achaita musha mauri kana kuwanawo nenzvimbo[32] mukati menyika yavapenyu.

²¹Ndichakusvitsa pamugumo unosiririsa, pako panenge pakuperera, vanhu vachakutsvaka zvako asi hauzowanikwazve.” Ndizvo zviri kutaura Tenzi Mwari.