Read Bhaibhiri Idzva rechiShona Ezekieri 27 Bible Online

Ezekieri 27 - Bhaibhiri Idzva rechiShona bible

Ezekieri 27

¹Izwi raTenzi rakauya kwandiri richiti,

²“Zvino iwe mwanakomana womunhu, ungudza pamusoro peTire

³uti kuTire, guta rigere pokupinda napo mugungwa, mushambadzi wezvoupfumi kumarudzi mazhinji enyika dzokumahombekombe kwegungwa iri zvanzi naTenzi Mwari: “Iwe Tire wakazviti, ndiri tsvarakadenga parunako.

⁴Miganhu yako iri pakatikati pegungwa vavaki vako vakaita kuti uve tsvarakadenga parunako.

⁵Mapuranga ako ose vakaaita nomusaipurasi wokuSiniri. Vakatora musidhari weRebhanoni kuti vakuitire musimboti wengarava.

⁶Mioku yokuBhashani ndoyavakakugadzirira nayo zvokukwasvisa mutumbi wako wengarava vakauita nemipaini yokumahombekombe kweSaipurasi wakanamirirwa nomunyanga wenzou mukati.

⁷Rineni yakanyatsorukirirwa yokuIjipiti ndoraiva jira rako rokufambisa ngarava richiita somureza wako. Jira roruvara rwedenga noruvara rwohute rokumahombekombe eErisha ndoraiva denga rayo.

⁸Vagari vokuSidhoni nokuArivhadhi ndovaiva vanhu vako vokukwasva nyanzvi dzavarume vaiva mauri ndivo vaifambisa ngarava.

⁹Vakuru vakuru vokuguta reGebhari nenyanzvi dzavarume dzeko dzaiva mauri ndichadzinama mumupendero yako. Ngarava dzose dzegungwa navashandi vemo vaiva mauri vachiita mhindu dzokutengeserana.

¹⁰“Pezhia neRudhi nePuti vaivawo muhondo yako savarwi vehondo vachiturika mauri nhoo nenguwani dzesimbi vachikupa mukurumbira.

¹¹Varume vokuArivhadhi nehondo yako yavarwi vaiva patsvingo dzako kukutenderera uye varume vokuGamadhi vaiva munharirire dzako. Vaiturikawo nhoo dzavo patsvingo dzako kukutenderera vachinyatsoita kuti uve norunako chairwo.

¹²“Tarishishi yaifambidzana newe pamusana poupfumi hwako hwakanyanya hwemhando nemhando hunoti sirivha nesimbi noutare hwerata nomutobvu zvavaitsinhana newe nezvako.

¹³Javhani neTubhari neMesheki dzaitengeseranawo newe. Vaitsinhana newe uchivapa midziyo yendarira ivo vachipa varanda.

¹⁴Bhetitogarima yaitengeserana newe ichikupa mabhiza, namabhiza ehondo namanyurusi iwe uchivapa zvinhu zvawainge wagadzira.

¹⁵Vanhu veRodhesi vaitengeserana newe. Nyika zhinji dzokumahombekombe dzaitenga kwauri dzichikubhadhara nyanga denzou nomuti weebhoni.

¹⁶Edhomu yaitengeserana newe pamusana pezvinhu zvako zvakawanda. Vaiita mutengano webveni newe, iwe uchivapa zvinhu zvakanaka zvawainge wagadzira ivowo vachikupa matombo anokosha eemeradhi nomushonga woruvara rwohute, namachira akarukirirwa nerineni yakanakisisa nekorari namatombo anokosha eageti.

¹⁷Judha nenyika yeIsiraeri vaitengeserana newe vachiita mutengano webveni newe wokukupa koroni namaorivhi namaonde okutanga nouchi namafuta eorivhi netwokuzora tunonhuwirira twebharimu.

¹⁸Dhamasikusi yaitengeserana newe pamusana pezvinhu zvako zvakawanda nokuda kwoupfumi hwako hwakawanda hworudzi norudzi newaini yokuHeribhoni newuru chena.

¹⁹Dhani neJavhani kubva kuUzari zvichienda mberi vaikuwanisa simbi netunonhuwira twekasia nekaramusi iwe uchivapa zvinhu zvako.

²⁰Dhedhani yaitengeserana newe machira ezvityaro akutasvisa.

²¹Arabhia namadzishe ose eKedhari vaitengeserana newe hwayana, nehondohwe nembudzi.

²²Vashambadzi vokuShebha nokuRaama vaitengeseranawo newe vachiita mutengano webveni newe vachikupa tunonhuwirira twakanakisisa twose twose, iwe uchivapa zvawainge wagadzira, namatombo ose anokosha nendarama.

²³Harani neKane neEdheni, neAshuru neKirimadhi vaitengeserana newe.

²⁴Ivava vaitengeserana newe hanzu dzakanakisisa, nehanzu dzoruvara rwedenga, namakapeti ana mavara-mavara akarukwa nemikosi netambo dzakakoswa zvakanaka. Izvozvi ndizvo zvavaitengeserana newe.

²⁵Ngarava dzokuTashishi dzaikutakurira zvinhu zvako zvokutengesa. “Saka wakanga wakati shutu kuzara wakaremerwa kwazvo kutakura mukatikati mawo makungwa.

²⁶Vakwasvi vako vakaenda newe kumakungwa ana mafungu Mhepo yokumabvazuva yakakuparadza mukatikati memakungwa.

²⁷Upfumi hwako nezvinhu zvawakagadzira nezvinhu zvoko zvokutengesa, vanhu vako vanoshanda mungarava navanhu vako vanofambisa ngarava namakapenda ako navatengesi vako vezvinhu navarwi vako vose vari mauri navamwe vose vari mauri vanonyura mukati memakungwa pazuva rako rokuparara.

²⁸“Nyika inodedera pakunzwa mhere inobva kuvafambisi vengarava.

²⁹Ipapo vakwasvi vose vachatiza ngarava dzavo. Vashandi vomungarava navafambisi vose vengarava vachandomira pamahombekombe egungwa.

³⁰Vacharidza mhere vachikuchema zvinosiririsa vachizvidira ivhu mumusoro vachiumburuka mudota.

³¹“Vanozviveura muparavara vachiitira iwe, vanopfeka masaga vachikuchema nemwoyo wakasuruvara vachiungudza zvinorwadza mwoyo.

³²Mukuridza kwavo mhere kudaro vachaungudza pamusoro pako vachikuchema vachiti: ‘Ndiani chaizvo akamboitwa hweTire akaparadzwa seTire pakati paro gungwa kudaro?

³³Zvinhu zvawainge wagadzira pazvaitutunurwa zvichibva kumakungwa waigutsa marudzi mazhinji, noupfumi hwako hwakanyanya uye neshavo huru youpfumi wakapfumisa madzimambo apanyika.

³⁴Zvino waparadzwa iwe namakungwa muhwenje yemvura yegungwa; shavo yako youpfumi navashandi vako vose vomungarava vanyura pamwechete newe.

³⁵Vagari vose venyika dzomumahombekombe megungwa vadumbirwa nezvako uye madzimambo avo vabayikana nokutya, uso hwavo hwadonha.

³⁶Vemhindu dzokutengeserana mukati mevemarudzi umu vava kukuridzira tsamwa magumo ako ashata hauchazovipo narini wose.’ ”