Read Bhaibhiri Idzva rechiShona Ezekieri 28 Bible Online

Ezekieri 28 - Bhaibhiri Idzva rechiShona bible

Ezekieri 28

¹Izwi raTenzi rakauya kwandiri richiti,

²“Iwe mwanakomana womunhu iti kujinda reTire, zvanzi naTenzi Mwari: “Pamusana pokuti une mwoyo wokuzvikudza, uchizviti ndiri mwari; ndinogara pachigaro chavamwari; pakati chaipo pamakungwa asi iwe uri munhu zvako asiri Mwari kunyange zvazvo uchifunga kuti uri mungwaru saMwari.

³Ichokwadi kuti wakangwaraka iwe kupinda Dhanieri hakuna chakavandika kwauri,

⁴noungwaru hwako nokunzwisisa kwako wakazviwaniraka upfumi iwe ukazviunganidzira ndarama nesirivha munzvimbo dzako dzaunochengetera upfumi iwe;

⁵nouchenjeri hwako hwakadzama mumhindu dzokutengeserana ukawedzera upfumi hwako ukava nomwoyo wokuzvikudza mukupfuma kwako ikoko,

⁶nezvo zvanzi naTenzi Mwari, ‘Iwe zvaunozviti mumwoyo mako uri mungwaru saMwari,

⁷naizvozvo chirega uone, ndichakuunzira vatorwa pauri, vanhu vakaipa mwoyo pamarudzi ose. Vachaburitsira bakatwa ravo voparadza runako rwoungwaru hwako uye vagosvibisa iyo mbiri yako.

⁸Vachakukanda mugomba, uchafa rufu rwokupondwa mukatikati memakungwa.’

⁹“Uchazoramboti ndiri mwari here pamberi pavanokuuraya, iwe uri munhu zvako usiri Mwari izvozvo uri mumaoko mavanokukuvadza?

¹⁰Uchafa rufu rwavasina kudzingiswa uchifira mumaoko mavatorwa nokuti ndini ndataura.” Ndizvo zvinotaura Tenzi Mwari.

¹¹Izwi raTenzi rakauyazve kwandiri richiti,

¹²“Iwe mwanakomana womunhu ungudza uchichema mambo weTire uti kwaari, zvanzi naTenzi Mwari: “Iwe waiva mucherechedzo wokukwana uzere noungwaru norunako rwakakwana.

¹³Mawakanga ugere muEdheni, mumunda waMwari, ibwe rose rakakosha riri chishongo chako pachiti mabwe erubhi neekaneriani netopazi nejasipa needhaimhondi nebheriri neonikisi neesafaya neketekoizi neemeradhi; tumasefa twako twokugadzikira twakanga twakaitwa nendarama nezvimwe zvako zvawakaveza.[33] Pazuva rawakasikwa zvakanga zvatogadzirirwa.

¹⁴Ndakakuisapo hangu nekeribhu rokukuchengetedza ukava pamusoro pegomo rinoera raTenzi. Pakati pemabwe omoto ndipo pawaifamba napo.

¹⁵Wakanga usina chinongo mukuita kwako kubvira panguva yawakasikwa kudzamarara pakuzowanikwa uipi mauri.

¹⁶Mukuwanda kwemhindu dzako dzokutengeserana wakazara utsinye ukazoita chitadzo. Ipapo ndakakukanda pasi sechinhu chakan'ora zvacho kubva pagomo raMwari. Ipapo kerubhu rokuchengetedza rakazokudzinga pakati pamabwe omoto.

¹⁷Wakava nomwoyo wokuzvikudza pamusana porunako rwako; wakaodza ungwaru hwako uchifuririka nomukurumbira wako. Ndakakunda pasi ndikakuisa pachena zvapo panotoonekwawo namamwe madzimambo kuti vakutarise zvavo.

¹⁸Nokunyanyawo kwakanga kwaita kuipa kwako mukushaya kwako nduramo pamhindu dzako dzokutengeserana wakan'oresa Nzvimbo dzako Dzinoera. Naizvozvo ndakatungidza moto mukati mako ukakuroromesa ndikakuita madota zvawo ari pasi mumaziso mevose vaikuona.

¹⁹Vose zvavo vanokuziva mukati memarudzi avanhu, vakadumbirwa nezvako wasvika pamugumo wakaipa uye hauchazovipo narini wose.”

²⁰Izwi raTenzi rakauya kwandiri rikati,

²¹“Iwe mwanakomana womunhu chinangana neSidhoni uporofite wakanangana neguta iroro uchiti:

²²“Zvanzi naTenzi Mwari, ‘Chinzwa, ndanangana newe iwe Sidhoni. Ndichaonesa mbiri yangu mukati mako imomo. Ndipo pavachazoziva kuti ndini Tenzi pandicharitemera chirango charo ndicharatidza kuera kwangu mariri.

²³Ndinodaro nokuti ndichatumira denda kwariri nokudeuka kweropa mumigwagwa yaro. Vanenge vaurayiwa vachati rakata mukati maro nebakatwa rinenge rorirwisa kumativi ose zvawo. Ndipo pavachazoziva kuti ndini Tenzi.’

²⁴“Zvino kana zviri zvemba yaIsiraeri hakuzombovizve norukato runobaya kana munzwa unovakuvadza pakati pavavakagarisana navo vaimbovashora. Ipapo ndipo pavachazoziva kuti ndini Tenzi Mwari.”

²⁵Zvanzi naTenzi Mwari, “Pandichakokorodza veimba yaIsiraeri mukati memarudzi mavakapararira ndichiratidza kuera kwangu mavari mumaziso mendudzi idzodzo, vachazogara munyika yavo yandakapa kuna Jakobho muranda wangu.

²⁶Ivo vachagara pasina chinovawana mairi; vachavaka dzimba vachisima minda yamagirepisi. Vachagara zvavo pasina chinovawana pandicharanga vavakagarisana navo vose ivo vaya vakambovashora. Ipapo ndipo pavachazoziva kuti ndini Tenzi Mwari wavo.”