Read Bhaibhiri Idzva rechiShona Ezekieri 30 Bible Online

Ezekieri 30 - Bhaibhiri Idzva rechiShona bible

Ezekieri 30

¹Izwi raTenzi rakauya kwandiri richiti,

²“Mwanakomana womunhu porofita uti zvanzi naTenzi Mwari: “Daidzira uchiti, ‘Hero zuva riya

³nokuti zuva racho rava kusvika. Zuva raTenzi rave pedyo, richange riri zuva rakati gude gude namakuti, nguva yokuparara kwamarudzi avanhu.

⁴Bakatwa richaparadza Ijipiti, Itiopia ichawirwa nenhamo, vanenge vaurayiwa muIjipiti vachiti rakata; upfumi hwayo huchaendwa nahwo, ugaro hwayo huchiputswa.’

⁵“Itiopia nePuti neRudhi neArabhia yose neRibhia [35] navanhu venyika dzine chirangano chokubatana vachanziwo nebakatwa pamwechete navo kata kata.”

⁶Zvanzi naTenzi Mwari, “Vanotsigira Ijipiti vachaputsika kuzvikudza kwayo nesimba kuchaderera kubvira kuMigidhori kusvikira kuAswani [36] vachati nebakatwa rakata mukati mayo. Ndizvo zviri kutaura Tenzi Mwari.

⁷“Vachasara vava renje rokupedzesera mukati medzimwe nyika dzakava renje uye maguta avo achiva maguta zvawo okupedzesera pakati pamamwe akaparadzwa

⁸ndipo pamuchazoziva kuti ndini Tenzi kana ndapisa Ijipiti nomoto vatsigiri vayo vose vakaparadzwa.

⁹“Pazuva iroro nhumwa dzichabva kwandiri nengarava dzichindotyisidzira vanhu veItiopia vakavarairwa zvavo. Nhamo ichavawira zuva iroro rokuparara kweIjipiti nokuti hero rouya.”

¹⁰Zvanzi naTenzi Mwari; “Ndichaita kuti mhomho[37] dzeIjipiti padzo padziperere mumaoko maNebhukadhireza mambo weBhabhironi.

¹¹Iye pamwechete navarwi vake vanachazezesa vacho kumarudzi avanhu vachaunzwamo kuzoparadza nyika iyoyo. Vachaburitsira Ijipiti mapakatwa avo vagozadza nyika yacho navanhu vanenge vaurayiwa.

¹²Ipapo ndichaomesa rwizi rweNairi, nyika yacho ndoitengesa mumaoko avanhu vakaipa. Ndichaita kuti nyika iyoyo iparadzwe navatorwa pamwechete nezvinhu zvose zvirimo ini Tenzi ndini ndataura.”

¹³Zvanzi naTenzi Mwari, “Ndichaparadza zvifananidzo zvokunamata ndichigumisa zvifananidzo zvokunamata zviri muguta reMemufisi. Munyika yeIjipiti hamuchafa makaita jinda remo nezvo ndichaisa kutya munyika yeIjipiti.

¹⁴Dunhu rePatirosi ndichariita renje zvaro ndichibva ndabatidza moto kuZoani uye ndichagadza dare guta reTebhesi ndichiranga guta iroro.

¹⁵Ndichavirukira guta rePerusiumu nehasha nhare yeIjipiti ndichirakatisa kuuraya gurusvusvu racho reTebhesi.

¹⁶Ijipiti ndichaitungidza nomoto Perusiumu icharwadziwa zvikuru. Tebhesi ichakoromorwa rusvingo rwayo rugopazwa.[38]

¹⁷Majaya okuOni nokuPibheseti vacharakatiswa nebakatwa vanhukadzi vachaenda kuutapwa.

¹⁸KuTehafunehesi kuchasviba masikati machena pandichaparadzako umambo hweIjipiti uye kuzvitutumadza kwaro nesimba kuchapera rigonzi kwidiba negore. Vanasikana varo vachaenda kuutapwa.

¹⁹Ndizvo zvandichaita kuIjipiti pandichaigadza dare. Ndipo pavachaziva kuti ndini Tenzi.”

²⁰Mugore regumi nechiposhi, mumwedzi wokutanga pazuva rechinomwe remwedzi iwoyo, izwi raTenzi rakauya kwandiri richiti,

²¹“Iwe mwanakomana womunhu ndaparadza simba roruoko rweIjipiti. Asi tarisa uone hakuna arisunga kuti ripore nokurisunga nebhandeji kuitira kuti risimbe zvokugona kuvheesa bakatwa.

²²Naizvozvo zvanzi naTenzi Mwari chiona ndanangana naFarao mambo weIjipiti. Ndichatyora maoko ake ose ari maviri, rwakasimba nerwakambotyoka rwuya. Uye ndichamukandisa pasi bakatwa riri muruoko rwake.

²³Ndichaita kuti vaIjipiti vapararire nomumarudzi avanhu ndichivati mwarara nedzinyika.

²⁴Ndichasimbaradza maoko amambo weBhabhironi ndiise bakatwa rangu mumaoko make. Asi ndichatyora maoko aFarao, agombe ari mberi kwake somunhu akuvara zvokufa chaizvo.

²⁵Ndichasimbaradza maoko amambo weBhabhironi asi Farao achati maoko regwede. Ndipo pavachaziva kuti ndini Tenzi. Pandinenge ndaisa bakatwa rangu mumaoko amambo weBhabhironi, acharisimudzira nyika yeIjipiti.

²⁶Ndichaparadza vaIjipiti mukati memarudzi ndichivamwararisa nomudzinyika. Ndipo pamuchaziva kuti ndini Tenzi.”