Read Bhaibhiri Idzva rechiShona Ezekieri 34 Bible Online

Ezekieri 34 - Bhaibhiri Idzva rechiShona bible

Ezekieri 34

¹Izwi raTenzi rakauya kwandiri richiti,

²“Iwe mwanakomana womunhu porofita wakanangana navafudzi veIsiraeri, porofita uti kwavari, kuvafudzi ivava uti, zvanzi naTenzi Mwari, ‘Nhaimi vafudzi veIsiraeri, imi munozvifudza zvenyu. Vafudzi havafaniri kufudza hwai here?’

³Munodyaka imi mafuta muchizvipfekedza zvenyu newuru, muchiuraya zvenyu hwayana dzakakodzwa asi kufudza hwai musingafudzi.

⁴Dzakarukutika hamuna kudzisimbisa, dzinorwara hamuna kudzirapa, dzakatyoka makumbo hamuna kudzisunga kasekete, dzinotetereka hamuna kudzidzora, dzakarasika hamuna kudzitsvaga. Uye makadzitonga nechisimba nehasha.

⁵Naizvozvo dzangopararira zvadzo pamusana pokuti pakanga pasina mufudzi dzikava zvadzo chokudya chezvikara zvose zvesango.

⁶Hwai dzangu dzakapararira, dzakateterekera mumakomo mose nomuzvikomo zvose zvirefu. Hwai dzakapararira nenyika yose dzisina anodzironda kana kudzitsvaka.

⁷“Naizvozvo imi vafudzi chinzwai shoko raTenzi.

⁸Zvanzi naTenzi Mwari, hezvino ndakadai, pamusana pokuti hwai dzangu dzakava zvadzo nyama, hwai dzangu dzakava chokudya chezvikara zvose zvesango pamusana pokuti pakanga pasina mufudzi uye pamusana pokuti vafudzi vangu havana kutsvaka hwai dzangu asi vafudzi vakatozvifudza ivo pachavo asi hwai dzangu havana kudzifudza,

⁹naizvozvo imi vafudzi chinzwai shoko raTenzi;

¹⁰zvanzi naTenzi Mwari, ‘Chionai ndanangana navafudzi. Wandichabvunza wacho ndivo vafudzi. Ndichavamisa kufudza hwai dzacho zvokuzvifudza ivo vafudzi zvichapera. Ndichanunura hwai dzangu pamiromo yavo kuitira kuti dzirege kuva chokudya chavo.’

¹¹“Chiripo ndechokuti zvanzi naTenzi Mwari, chionai, ini iyeni pachangu ndini ndicharonda hwai dzangu ndidzitsvake.

¹²Sezvinongoita mufudzi anotsvaka hwai dzake kana dzimwe dzapararira[41] ndizvozvo zvandichaita kutsvaka hwai dzangu. Ndichadzinunura munzvimbo madzakapararira, pamusi wamakuti nerima rakati kwirindindi.

¹³Ndichadziburitsa mukati memarudzi ndichidzikokorodza mudzinyika uye ndichadziunza munyika yadzo. Ndichadzifudzira mumakomo eIsiraeri nomuzvitubu zvemvura nomunogara vanhu mose zvamo munyika iyoyi.

¹⁴Ndichadzifudzira pamafuro akanaka uye napamusoro pamakomo marefu eIsiraeri pachange pari pamafuro adzo. Imomo dzicharara mumafuro akanaka, dzichifura mumafuro chaiwo manyoro mumakomo eIsiraeri.

¹⁵Ini ndini ndichafudza hwai dzangu, ndini ndichadzirarisa pasi. Ndizvo zviri kutaura Tenzi Mwari.

¹⁶Dzinenge dzarasika ndichidzitsvaka ndichadzora dzinenge dzatetereka, dzinenge dzakuvara ndichidzisunga kasekete, dzinenge dzarukutika ndichidzisimbaradza. Asi dzakakora nedzakasimba ndichadzitarisa[42] ndichidzifudza noruenzaniso.

¹⁷“Kana zviri zvenyu imi danga rangu, zvanzi naTenzi Mwari, chinzwai, ini ndichatonga pakati pehwai nehwai napakati pehondohwe nezvikotora.

¹⁸Hazvikwane here kwamuri kuti mufure mumafuro akanaka zvamunobva matsokodzera zvenyu mafuro mamwe ose netsoka dzenyu? Hazvikwane here kwamuri kuti mumwe mvura yakachena, zvamunobva mabvongodza imwe yose namakumbo enyu?

¹⁹Hwai dzangu dzinofanira kudya zvamunenge matsokodzera netsoka dzenyu nhai, dzichinwa mvura yamunenge mabvongodza henyu namakumbo enyu?

²⁰“Naizvozvo zvanzi naTenzi Mwari kwavari, chinzwai, ini iyeni ndichatonga pakati pehwai yakakora nehwai yakaonda.

²¹Imi zvamunosairira norutivi nebendekete muchibaya ndonda dzose nenyanga dzenyu kusvikira dzachiti mwarara kunze,

²²ndichanunura danga rangu hadzizovizve nyama yamagora, ndichatonga pakati pehwai nehwai.

²³Ndichadziisira mufudzi mumwechete. Achadzifudza, iye muranda wangu Dhavhidhi. Iyeyo ndiye achava mufudzi wadzo.

²⁴Ini Tenzi ndini ndichava Mwari wavo, muranda wangu Dhavhidhi ariwo jinda pakati pavo. Ini Tenzi ndini ndazvireva.

²⁵Ndichaitirana navo chitenderano chorugare ndigobvisa munyika zvikara zvesango kuitira kuti dzigozogara hadzo murenje pasina chinodziwana dzichirara zvadzo mumasango.

²⁶“Ndichaita kuti idzo nenharaunda yapachikomo changu zvive chikomborero. Ndichatumira mvura inonaya nomwaka wayo. Mvura yacho inonaya ichava chikomborero.

²⁷Izvozvo miti yomusango ichabereka michero yayo, nyika ichaberekawo michero yayo, vachagara pasina chinovawana. Vachaziva zvavo kuti ndini Tenzi pandichatyora zvikei zvejoko ravo ndichivanunura mumaoko mavanhu vanovaita varanda.

²⁸Havachazovizve nyama yemagora kumarudzi avanhu kana kuparadzwa nemhuka dzomunyikamo. Vachagara havo pasina chinovawana pasinawo chinovatyisa.

²⁹Ndichavaita kuti vave nenzvimbo yokurima ine mukurumbira zvokuti havazombopararizve neshangwa yenzara munyika imomo kana kuzonyarazve nokusveeredzwa namarudzi.

³⁰Ndipo pavachaziva kuti ini Tenzi, Mwari wavo ndinavo uye kuti ivo vemba yaIsiraeri, vanhu vangu. Ndizvo zviri kutaura Tenzi Mwari.

³¹Imimi ndimi hwai dzangu, hwai dzomumafuro angu. Iniwo ndini Mwari wenyu” ndizvo zviri kutaura Tenzi Mwari.