Read Bhaibhiri Idzva rechiShona Ezekieri 37 Bible Online

Ezekieri 37 - Bhaibhiri Idzva rechiShona bible

Ezekieri 37

¹Ruoko rwaTenzi rwakava pandiri. Akandiburitsa nesimba raMweya waTenzi akandondiisa mubani, rakanga rizere namapfupa.

²Akandifambisa mukati mawo kutenderera, wonei akanga ari hungwandagwanda kuwanda mubani imomo uye akanga akati papata kwazvo kuoma.

³“Akanditi nhai mwanakomana womunhu mapfupa aya angava mapenyu here?” Ini ndakati, “Imi Tenzi Mwari ndimi munoziva.”

⁴Akanditizve porofita kumapfupa iwaya uti kwaari, “Imi mapfupa akaoma inzwai shoko raTenzi.

⁵Zvanzi naTenzi Mwari kumapfupa aya, chinzwai, ndichapinza mweya mamuri mugorarama.

⁶Ndichaisa marunda pamuri, ndichaitawo kuti nyama ive pamuri ndikuputirei neganda ndigokufemerai mweya mamuri muchiva vapenyu. Muchabva maziva kuti ndini Tenzi.”

⁷Saizvozvo ndakaporofita sokuudzwa kwandakanga ndaitwa. Pandaiporofita kudaro pakaita ruzha, pakave nokukwacharika. Mapfupa achienda kundobatana pamwechete, pfupa richienda pane rimwe pfupa raro.

⁸Ndakati tarisei onei ave namarunda uye ava nenyama, aputirwa neganda. Asi akanga asina mweya.

⁹Akazonditi porofita kumweya, mwanakomana womunhu, porofita uti kumweya, zvanzi naTenzi Mwari, “Iwe mweya uya uchibva kumativi mana ufemere pane vakauraiwa ava kuti vave vapenyu.”

¹⁰Saizvozvo ndakaporofita, sokuudzwa kwandanga ndaitwa, mweya ukapinda mavari vakava vapenyu, vakamira namakumbo avo ikava hondo huru huru yavanhu.

¹¹Zvino akanditi, “Iwe mwanakomana womunhu mapfupa iwaya ndiyo imba yose yaIsiraeri; onaka kuti vanoti mapfupa edu aoma chitarisiro chedu chapera uye taparara isu.

¹²Naizvozvo porofita uti kwavari, zvanzi naTenzi Mwari chinzwai, imi vanhu vangu, ndavakuzozarura makuva enyu ndikumutsei mumakuva enyu, ndikuunzei kumusha kwenyu kunyika yeIsiraeri.

¹³Ndipo pamuchaziva, imi vanhu vangu, kuti ndini Tenzi pandichazarura makuva enyu ndichikumutsai mumakuva enyu.

¹⁴Ndichaisa mweya wangu mamuri muchiva vapenyu. Ndichakuisai munyika menyu, ndipo pamuchaziva kuti ndini Tenzi ndataura uye ndini ndazviita.” Ndizvo zviri kutaura Tenzi.

¹⁵Izwi raTenzi rakauya kwandiri richiti,

¹⁶“Iwe mwanakomana womunhu tora tsvimbo unyore pairi kuti: “VokwaJudha navanhu vokwaIsiraeri vavanofambidzana navo. “Wozotorawo imwe tsvimbo unyorewo pachiri kuti: “VokwaJosefi, (tsvimbo yekwaEfuremu) navose vemba yokwaIsiraeri vavanofambidzana navo.

¹⁷“Unodzibatanidza pamwechete kuita tsvimbo imwechete kuti dzive chinhu chimwechete muruoko rwako.

¹⁸Vanhu vako kana vazokuti hamungatitaurirewo zvamunoreva nezvizvi,

¹⁹uti kwavari, zvanzi naTenzi Mwari, chinzwai, ndava kuda kutora tsvimbo yokwaJosefi iri muruoko rwevokwaEfuremu mumadzinza okwaIsiraeri vanofambidzana naye. Ndichaibatanidza netsvimbo yevokwaJudha kudziita tsvimbo imwechete kuitira kuti dzive chinhu chimwechete muruoko rwangu.

²⁰Tsvimbo dzauchanyora padziri padzinenge dziri muruoko rwako ivo vakatarisa nameso avo ipapo iti kwavari,

²¹Zvanzi naTenzi Mwari, chinzwai ndichatora vanhu veIsiraeri pakati pamarudzi kwavakaenda ndivakokorodze kumativi ose ndichivauyisa kunyika kwavo chaiko.

²²Ndichavaita kuti vave rudzi rumwechete munyika iyoyo mumakomo eIsiraeri uye vose zvavo vachatongwa namambo mumwechete. Havachazovezve marudzi maviri uyewo kana kuzombove noumambo huviri hwakaparadzana.

²³Havazombozvin'oresazve nezvifananidzo zvavo zvokunamata nezvinhu zvavo zvinosemesa kana nekai zvako kezvikanganiso zvavo. Asi kutoti ini ndichavanunura mune zvokudzokera shure mavakadai kupara chitadzo. Ndichavachenurawo ivo vagova vanhu vangu. Ini ndichava Mwari wavo.

²⁴“Muranda wangu Dhavhidhi achange ari mambo wokuvatonga uye vose vachava nomufudzi mumwechete. Vachatevedza mirao yangu vachiteerera mitemo yangu.

²⁵Vachagara havo munyika iyoyo yandakapa kumuranda wangu Jakobho ikagarwawo namadzibaba enyu. Ivo navana vavo navana vavana vavo, vachagara imomo narini wose uyu muranda wangu Dhavhidhi ndiye achava ishe wavo narini wose.

²⁶“Ndichaitirana navo chitenderano chorugare chichava chitenderano chokugara nokugara. Ndichavakomborera ndigoita kuti vawande uye ndichaisa Nzvimbo yangu Inoera pakati pavo narini wose.

²⁷Ndichaita musha wangu mukati mavo uye ndichava Mwari wavo, ivo vachavawo vanhu vangu.

²⁸Ndipo pachazoziva vemarudzi kuti ini Tenzi ndini ndinoeresa Isiraeri, Nzvimbo yangu Inoera painenge iri pakati pavo narini wose.”