Read Bhaibhiri Idzva rechiShona Ezekieri 38 Bible Online

Ezekieri 38 - Bhaibhiri Idzva rechiShona bible

Ezekieri 38

¹Izwi raTenzi rakauya kwandiri richiti,

²“Iwe mwanakomana womunhu chitarisana naGogu wokunyika yokwaMagogu, iye muchinda mukuru wokuMesheki nokuTubhari uporofite kwaari uchiti,

³zvanzi naTenzi Mwari, chinzwa, ndanangana newe, iyewe Gogu muchinda mukuru wokuMesheki nokuTubhari.

⁴Ndichakupishinutsa ndikuise zvirauro mushaya dzako. Ndichakuunza nehondo yako yose, namabhiza navatasvi vacho vose zvavo vakapakata zvombo zvehondo zvinenge zviri gurumwandira guru ravanhu vose vaine nhoo huru nediki vachivhevhetesa mapakatwa,

⁵vePezhia neItiopia neRibhiya vanavowo vose vane nhoo neheremendi

⁶uye Gomera nemhomho dzake dzese neBhetitogarima vekwokupedzesera chaiko kuchamhembe nemhomhowo dzake dzose, gurusvusvu chairo raunenge unaro.

⁷Gadzirira ugare wakagadzirira iwe nehondo yevarwi yawakaunganidzana nayo, iyewe uve ndiwe wokuvachengetedza.

⁸Mushure memazuva mazhinji uchataurirwa zvaunofanira kuti uite, mushure memakore achauya uchandorwisa nyika inenge yambozororawo hondo, nyika yavanhu vanenge vakokorodzwa kubva kumarudzi akawanda mumakomo eIsiraeri yainge yava renje rokugara rakadaro. Vanhu vayo vakakokorodzwa kubva kumarudzi, pari zvino votogarawo zvavo vasina chinovawana vose zvavo.

⁹Uchauya uchisvika sedutu remhepo uchinge guti raputira nyika, iwewe nemhomho dzako uine gurusvusvu ravanhu.”

¹⁰Zvanzi naTenzi Mwari, “Nezuva iroro uchapindwa nepfungwa mumwoyo mako ugoronga mano akaipa.

¹¹Uchati regai ndiende kundorwisa nyika ine misha iri pachena zvapo ndichingoyerekana ndasvikira vanhu vakazvigarira havo vose vagere vasina rusvingo kana zvihuri kunyange misuo mikuru

¹²kundopamba zvinhu nokutakura zvinhu zvokupamba nokurwisa matongo ava kugara vanhu navanhu vaya vakakokorodzwa kubva kunamamwe marudzi avanhu vane mombe nezvinhu, vagere pakatikati penyika.

¹³VeShebha neDhedhani navanhu vemhindu dzokutengeserana vokuTashishi nemisha yayo vachati kwauri, ‘Mauya here kuzopamba zvinhu? Maunganidzira hondo yenyu kuzotakura zvinhu zvokupamba, kutakura sirivha nendarama nokuzotora zvipfuwo nezvinhu nokuzopamba zvinhu zvakawanda here?’

¹⁴“Naizvozvo, chinzwa, iwe mwanakomana womunhu chiporofita uti kuna Gogu zvanzi naTenzi Mwari. ‘Pazuva iroro vanhu vangu veIsiraeri, pavanenge vakazvigarira zvavo, uchasimuka

¹⁵wobuda mumana rako, kubva kwokupedzesera chaiko kuchamhembe, iyewe navanhu vazhinji vaunenge unavo, vose zvavo vachange vakatasva mabhiza vari gurusvusvu guru ravanhu, hondo huru.

¹⁶Uchauya kuzorwisa vanhu vangu vaIsiraeri segore raputira nyika iyoyi. Mumazuva achauya ndichakuunza kuzorwisa nyika yangu kuitira kuti marudzi vandizive pandichaonesa kuera kwangu nemairi iwe Gogu ivo vachiona nameso avo.’

¹⁷“Zvanzi naTenzi Mwari handiti ndiwe here wandaireva kubvira pasichigare nomuromo wavaranda vangu vaporofita veIsiraeri vakaporofita mumazuva iwayo kwamakore kuti ndichakuunza kuzovarwisa.”

¹⁸Zvanzi naTenzi Mwari, “Pazuva iroro richauya Gogu kuzorwisa nyika yeIsiraeri, ndichaviruka nehasha.

¹⁹Ndizvo zvandiri kutaura izvozvo ndiine shanje ndakaviruka nehasha nezuvaro pachaita kundengendeka kukuru munyika yeIsiraeri.

²⁰Hove dzegungwa neshiri dzedenga nemhuka dzesango nezvose zvinokambaira nokuzvova napasi navanhu vose zvavo vari panyika zvichahuta kudedera nokuvapo kwangu. Makomo achawisirwa pasi hunguruhwe dzamatombo dzichitozomokera pasi madziro ose achikoromokera pasi.

²¹Ndichatumira Gogu kose kose. Ndizvo zviri kutaura Tenzi Mwari. Vanhu vose vachabayana namabakatwa hama nehama.

²²Ndichamuranga nedenda nokudeurwa kweropa; ndichimubaya iye nemhomho dzake dzavanhu navanhu vazhinji vaanavo; bvachapfacha remvura nechimvuramahwe nomoto nesarufa.

²³Ndokuratidza kwandichaita ukuru hwangu nokuera kwangu ndichiita kuti ndizivikanwe namarudzi avanhu. Ndipo pavachaziva kuti ndini Tenzi.”