Read Bhaibhiri Idzva rechiShona Ezekieri 39 Bible Online

Ezekieri 39 - Bhaibhiri Idzva rechiShona bible

Ezekieri 39

¹“Iwe mwanakomana womunhu porofita kuna Gogu uti, zvanzi naTenzi Mwari chiona, ndanangana newe Gogu, jinda guru rokuMesheki nokuTubhari.

²Ndichakupishinudza ndigokutinhira mberi ndikuunze kubva kwokupedzesera chaiko kudivi rokuchamhembe ndigokutungamirira kundorwisa makomo eIsiraeri.

³Ipapo ndicharova uta hwako muruoko rworuboshwe ndigokudonhedzesa miseve muruoko rwako rworudyi.

⁴Uchafira mumakomo meIsiraeri, iyewe nemhomho dzako idzodzo navanhu vaunenge unavo. Ndichakuita nyama yamagora kushiri dzinodya nyama dzorudzi norudzi uye kuzvikara zvesango kuti udyiwe.

⁵Uchafira musango zvamo nokuti ndini iyeni ndakataura, ndizvo zviri kutaura Tenzi Mwari.

⁶Ndichatumira moto kuna Magogu nokuvanhu vakazvigarira havo munyika dzokumahombekombe kwegungwa. Ndipo pavachaziva kuti ndini Tenzi.

⁷Zita rangu rinoera, ndichaita kuti riziikanwe pakati pavanhu vangu vaIsiraeri. Handizorega zita rangu richin'oreswa zvakare. Ipapo marudzi ndipo paachaziva kuti ndini Tenzi, Anoera muIsiraeri.

⁸Hero rouya uye zvichatoitika, ndizvo zviri kutaura Tenzi Mwari. Ndiro zuva riya randaireva.

⁹“Vagari vamaguta eIsiraeri vachabuda vakavesera zvombo zvokurwa moto vachizvipisa. Zvose zvinoti nhoo duku nenhoo huru, nouta namapfumo, netsvimbo nemiseve. Vachazvivesera moto kwamakore manomwe

¹⁰zvokuti havazoda huni musango kana kundodzitema musango. Moto wavo vachauvesa nezvombo zvavo izvozvo zvehondo. Vanenge votopamba vanhu vakambovapamba vachitorera zvinhu vanhu vaya vakambovatorerawo zvinhu, ndizvo zviri kutaura Tenzi Mwari.

¹¹“Pazuva iroro ndichapa Gogu nzvimbo yokuviga vanhu muIsiraeri, nzvimbo yeBani reVerwendo[44] kumabvazuva kwegungwa uchadzivirira verwendo nokuti imomo ndomunenge makavigwa Gogu nemhomho yake yose. Ichange yava kunzi, ‘Baniremhomhoyokwagogu.’

¹²Kwemwedzi minomwe, imba yaIsiraeri ichange ichingovaviga kuitira kuti ichenure nyika.

¹³Vanhu vose venyika iyoyi vachavaviga zvichivawanisa mukurumbira pazuva randicharatidza mbiri yangu. Ndizvo zviri kureva Tenzi Mwari.

¹⁴Vachatsaura varume vanoramba varipo vokuviga vanenge vasaririra pamusoro payo nyika kuitira kuti ichenurwe, mushure memwedzi minomwe iyoyo ndomavachange vachitsvaga saizvozvo.

¹⁵Ivava pavanenge vachienda nomunyika kudaro, anenge angoona pfupa romunhu anobva aisa mucherechedzo pedyo naro kusvikira vokuviga vaya variviga muBaniremhomhoyokwagogu.

¹⁶(Gutawo rinonzi Mhomho richange riripowo.) Ndokuchenura kwavachaita nyika iyoyo.

¹⁷“Asi iwe mwanakomana womunhu zvanzi naTenzi Mwari taura kushiri dzemhando dzose nokumhuka dzose dzesango kuti unganai muuye, kokorodzanai kumativi ose kumabiko echibayiro andiri kukugadzirirai, mabiko makuru echibayiro pamakomo eIsiraeri. Muchadya nyama nokunwa ropa.

¹⁸Muchatodya zvenyu nyama yamagamba muchinwa ropa ramachinda apanyika ndovanenge vari hondohwe nehwayana nembudzi nehandira dzacho vose zvavo vari ivo zvipfuwo zvacho zvakakodzwa zveBhashani.

¹⁹Muchatodya zvenyu mafuta kusvikira maguta mugonwa ropa kusvikira matoraradza pamabiko echibayiro andiri kukugadzirirai.

²⁰Pateburu yangu ipapo muchaguta nokudya mabhiza navatasvi vacho namagamba avarwi navarwi vemhando nemhando. Ndizvo zviri kutaura Tenzi Mwari.

²¹“Ndicharatidza mbiri yangu kumarudzi avanhu uye marudzi ose achaona kutonga kwangu kwandinenge ndaita nesimba randakasevenzesa pavari namaoko angu.

²²Imba yaIsiraeri ichaziva kuti ndini Tenzi, Mwari wavo kubvira musi iwoyo zvichienda mberi.

²³Marudziwo avanhu achaziva kuti imba yaIsiraeri yakaenda kuutapwa pamusana pouipi hwavo nokuti havana kutendeka kwandiri zvokuti ndakazvivanza uso kwavari ndikavaisa mumaoko avavengi vavo ndokubva vose vaurayiwa nehondo yebakatwa.

²⁴Ndakaita kwavari maererano nokun'ora kwavo uye nokukanganisa kwavo ndikazvivanza uso kwavari.”

²⁵Naizvozvo zvanzi naTenzi Mwari, “Zvino ndava kudzosera pakare makomborero okwaJakobho ndichiitira tsiye nyoro imba yaIsiraeri yose uye ndichaitira shanje zita rangu rinoera.

²⁶Vachakanganwa kunyadziswa kwavo nokusatendeka kwose kwavakandiitira pavachange vagara havo munyika yavo pasina chinovawana pasina anovatyityidzira.

²⁷Izvozvo ndinenge ndavadzosa vabva kumarudzi ndavakokorodza kunyika dzavavengi vavo uye nemavari ndaratidza kuera kwangu marudzi namarudzi avanhu achiona.

²⁸Ndipo pavachaziva kuti ini ndini Tenzi, Mwari wavo nokuti ndakambovaendesa kuutapwa pakati pamarudzi acho ndikabva ndazovakokorodza munyika yavo chaiyo. Hapana wandichasiya ikoko.

²⁹Uye handichazozvivanzazve uso kwavari pandichadururira Mweya wangu pamba yaIsiraeri” ndizvo zviri kutaura Tenzi Mwari.