Read Bhaibhiri Idzva rechiShona Ezekieri 4 Bible Online

Ezekieri 4 - Bhaibhiri Idzva rechiShona bible

Ezekieri 4

¹“Iwe mwanakomana womunhu tora chidhina uchiise mberi kwako ukwenge pachiri mufananidzo weguta reJerusaremu.

²Uisepo zvokurikomba nazvo zvehondo, uye rusvingo rwakavakwa rwakaritenderera rwokurikomba narwo unyorewopo chinenge musana wenzou chevhu chakatsamirana naro. Utarepo musasa wematendhe wakarikomba ugoriisirawo zvombo zvakaita sehondohwe zvokuridhugumurisa zvakadzikwa zvakaritenderera.

³Unozotorawo chirata chesimbi wochimisa chakaita sorusvingo rwesimbi ruri pakati pako neguta racho iroro. Iwe wobva wanyatsotarisana naro uriite segutawo ratova mukukombwa chaimo uite kuti kukombwa kwacho kubva kwanyatsotsviriridzawo chaizvo. Ichochi ichi chiratidzo chokuitira imba yaIsiraeri.

⁴“Pedzezvo worara nokuruboshwe kwako iniwo ndichaisa uipi hweIsiraeri pauri, mazuva ose aunenge wakarara naikoko unenge wakatotakura chirango chavo.

⁵Ndiri kukutemera chirango cheIsiraeri chamazuva mazana matatu namazuva makumi mapfumbamwe, zuva roga roga richimirira gorewo rokurangwa kwavo.

⁶“Kana wapedza mazuva iwaya, unofanira kuvata kechipiri nokurudyi kwako utakure chirango chevemba yokwaJudha. Ndinokutemera makumi mana amazuva, zuva richimiririra gore.

⁷“Unofanira kutarisa wakanangana nokukombwa kweJerusaremu wakarikungira chibhakera pachena ugoporifita uchiyambira guta iroro kuti:

⁸‘Zvino chiteerera unzwe, ndichakusunga mbira dzakondo netambo zvokuti unotadza kupindukira kune rimwe divi kudzamara nguva yako yokukombwa yapera.’

⁹“Tora koroni nebhari nebhinzi nenyemba namapfunde nekoroni yesipereti uzvisanganise mumudziyo mumwechete ubike chingwa nazvo. Mumazuva acho aunenge wakatseyama norutivi aya, mazana matatu namakumi mapfumbamwe ndochaunenge uchidya.

¹⁰Chokudya chauchadya iwe pazuva chinofanira kunge chichirema mazana maviri amagiramu ana magiramu makumi matatu.

¹¹Izvozvo mvura yako yokunwa inenge ichitoitwa zvokuyerwa. Unofanira kunwa magirazi emvura[2] maviri kamwechete pazuva.

¹²Unofanira kuchidya sechingwa chebhari uchibike vachiona pamoto wendove yavanhu.”

¹³Tenzi akatiwo, “Ndomadyiro achaita vaIsiraeri chingwa chavo chakan'ora pakati pamarudzi kwandichavadzingira.”

¹⁴Ini ndikati, “Aa-a nhai Tenzi Mwari! Zvamunoona handisati ndambozvin'oresa kubvira pauduku hwangu kusvikira pari zvino. Handisati ndambodya chakafa choga kana chakaita zvokubvamburwa-bvamburwa nezvikara kana zvako kuisa mukanwa mangu'mu nyama yakaipa.”

¹⁵Iye akabva anditi, “Chiona, ndochikupa ndove yemombe panze pendove yomunhu yomoto paunobikira chingwa chako.”

¹⁶Iye akanditizve, “Iwe mwanakomana womunhu, chiona, ndichashomekesa kuwanda kwechokudya muJerusaremu. Vachadya chokudya chavo chichiita zvokutopimirwa vachitya, uye mvura yavo vachinwa ichiita zvokutoyererwa vachidumbirwa nazvo,

¹⁷ndichaiita izvozvo nokuti chokudya chavo nemvura zvichava zvishomashoma. Vachatarisana vagodumbirwa navo vagoperezeka nechirango chavo ichocho.