Read Bhaibhiri Idzva rechiShona Ezekieri 45 Bible Online

Ezekieri 45 - Bhaibhiri Idzva rechiShona bible

Ezekieri 45

¹Pamunogova nechin'ange nyika senhaka munofanira kutsaurira Tenzi chimwe chikamu chenyika iyoyo sedunhu rinoera rinoita gumi ramakiromita rina makiromita maviri nehafu kureba chichiita makiromita gumi upamhi. Nharaunda yayo yose inenge iri dunhu rinoera.

²Padunhu racho ngapave nenzvimbo yakaenzana mativi ose, divi roga roga richiita mazana maviri amamita ana mamita makumi mashanu, iyoyo ichave Nzvimbo Inoera.

³Mudunhu rinoera iroro unofanira kuera utsaure nzvimbo inoita makiromita gumi namaviri nehafu kureba ine upamhi hwamakiromita mashanu, muchava Nzvimbo Inoera, Nzvimbo Inoeresesa.

⁴Chikamu chenyika ichocho chichava chikamu chinoera. Chichava chavapristi vanoshanda muNzvimbo Inoera vanoenda panaTenzi kundomushandira. Nzvimbo iyo ichava nzvimbo yedzimba dzavo uye ichava nzvimbo tsvene yeNzvimbo Inoera.

⁵Rimwewo dunhu rinoita gumi ramakiromita rina makiromita maviri ane hafu kureba iine makiromita mashanu kufara, rinofanira kuva ravaRevhi vanoshanda kuTemberi; ndiyo nzvimbo yamaguta avo okuti vagare.[51]

⁶Pakavambirana nedunhu rinenge ratsaurwa racho sedunhu rinoera, unofanira kuganhurira guta nzvimbo inoita makiromita maviri ane hafu upamhi iine urefu hunosvika gumi ramakiromita rine hafu.

⁷Nyika iri kumativi maviri ose edunhu rinoera ichange iri yashe pamwechete nezvinhu zveguta iroro zvichitevedza dunhu rinoera nezvinhuwo zveguta iroro kumadokero nokumabvazuva zvakangoreba zvakaenzana nedunhu rerimwe ramadzinza zvichienda zvakadaro kubvira kumuganhu wokumadokera kudzamarara kumuganhu wokumabvazuva wenyika.

⁸Ndiwo uchava mugove wake iwoyo muIsiraeri. Madzishe angu iwayo haazodzvinyiriri vanhu vangu, asi kutoti vachaita kuti vemba yaIsiraeri vawane nyika maererano namadzinza avo.

⁹Zvanzi naTenzi Mwari, “Zvakwana, imi madzishe eIsiraeri. Kandai pasi utsinye noudzvinyiriri mutonge vanhu noruenzaniso nourarami. Zvokudzinga vanhu vangu izvi ngazvipere, ndizvo zviri kutaura Tenzi Mwari.

¹⁰“Munofanira kuva nezvikero zvakarurama nebhagidhi nomugoro zvakarurama.

¹¹Bhagidhi racho nomugoro zvinofanira kuva zvakaenzana. Mugoro wacho unofanira kuva namarita makumi maviri ana maviri, uye bhagidhi richifanirawo kuva namarita makumi maviri ane maviri. Marita mazana maviri ane marita makumi maviri ndiwo anofanira kuva mwero wacho chaiwo wokueresa.

¹²Mari yeshekeri inofanira kuita zana ramagiramu rina magiramu makumi maviri uye mashekeri mashanu achiita makumi mashanu amagiramu ane magiramu manomwe ane hafu uyewo gumi ramashekeri richiitawo magiramu zana rine gumi namashanu, minawo renyu rimwechete richiita mamirigiramu makumi matanhatu.

¹³“Mupiro wenyu unofanira kuva wakadai sezvizvi: Pamabhagidhi gumi ekoroni munobvisa marita matatu ana makumi matanhatu amamiririta ane mamiririta matanhatu. Pagumi ramabhagidhi ebhari, munobvisawo marita matatu ane makumi matanhatu emamiririta ane mamiririta matanhatu.

¹⁴Mafuta acho anozoramba achingovapo chete anofanira kuti aite marita maviri ane mamiririta makumi maviri pamazana maviri amarita ane marita makumi maviri. (Mwero wokupimisa wainzi koru nounonzi homa yakafanana mumwe nomumwe wakanga uchiita sewainziwo bhati waive negumi ramabhagidhi.)

¹⁵Kubva mumhuri dzavaIsiraeri, padanga roga roga remazana maviri ehwai ngapabviswe hwai imwechete. “Iyoyi ndiyo mipiro yekoroni, nemipiro yokupisa, nemipiro yokuwadzana iri mipiro yokupfupira zvitadzo. Ndizvo zviri kutaura Tenzi Mwari.

¹⁶“Vanhu vose muIsiraeri vanofanira kupa mupiro iwoyo kunashe.

¹⁷Ishe ndiye achave nebasa rokuona kuti pane mipiro yokupisa, mipiro yekoroni nemipiro yokuteura pamazuva makuru, naPakugara kweMwedzi, nepamaSabata napamazuva ose makuru akatemwa emba yaIsiraeri. Ibasa rake rokuona kuti pane mipiro yokupfupira zvitadzo nemipiro yekoroni nemipiro yokupisa nemipiro yokuwadzana iri mipiro yokuripira zvitadzo zvemba yaIsiraeri.”

¹⁸Zvanzi naTenzi Mwari, “Pamwedzi wokutanga pazuva rokutanga romwedzi, unofanira kutora handira ichiri duku isina chinoshoreka pairi uchenure Nzvimbo Inoera.

¹⁹Mupristi anotora rimwe ropa rechibayiro chokupfupira zvitadzo arizore pamagwatidziro eTemberi nepamakona mana echimbimbi chokunze cheatari napamapango paSuo Guru renhandare yomukati.

²⁰Unofanira kuita izvozvi pazuva rechinomwe remwedzi uchiitira ani naani zvake anenge atadzira Mwari mukukanganisa kana mukusaziva. Saizvozvo ucharipira zvitadzo zvomuTemberi.

²¹“Mumwedzi wokutanga pazuva regumi nerechina muchachengeta Zuva Guru rePasika. Kwamazuva manomwe kunofanira kudyiwa chingwa chisina mbiriso.

²²Pazuva iroro ishe anofanira kuzviwanira iye nevanhu vose venyika handira ndiki yokupfupira zvitadzo.

²³Pamazuva manomwe iwayo mumazuva makuru anofanira kuti pave nenzombe dzichiri diki nomwe, nehondohwe nomwe dzisina chinoshoreka dzomupiro wokupisa kuna Tenzi pazuva nezuva mumazuva manomwe iwayo, uyewo zuva nezuva gotora rokupfupira zvitadzo.

²⁴Anofanira kuona kuti pane bhagidhi roupfu pahandira yoga yoga uye bhagidhi roupfu pahondohwe imwe neimwe namarita mana amafuta eorivhi pabhagidhi roga roga pamupiro wembesanwa.

²⁵Mumwedzi wechinomwe pamusi wegumi nechishanu womwedzi iwoyo uye napamazuva manomwe ezuva guru iroro, anofanira kuona kuti zvimwechetezvo zvavepo kuitira mipiro yokupirira zvitadzo nemipiro yokupisa nemipiro yembesanwa uye neyamafuta.”